കോട്ടയം: പ്രസംഗം തുടങ്ങിയിട്ടും നിർത്താതെ തുടർന്ന ചെണ്ടമേളത്തിന് നേരെ രൂക്ഷവിമർശനവുമായി മുഖ്യമന്ത്രി പിണറായി വിജയൻ. കോട്ടയത്ത് കെ.എസ്.ടി.എ സംസ്ഥാന സമ്മേളനത്തിന്റെ ഭാഗമായുള്ള പൊതുപരിപാടി ഉദ്ഘാടനം ചെയ്യുന്നതിനിടെയാണ് മുഖ്യമന്ത്രി പരസ്യമായി രോഷം പ്രകടിപ്പിച്ചത്.

മുഖ്യമന്ത്രി പ്രസംഗം ആരംഭിച്ചിട്ടും മൈതാനത്തിന് പുറത്ത് ചെണ്ടമേളം മുറപോലെ തുടരുകയായിരുന്നു. ശബ്ദം തടസ്സമായതോടെ പ്രസംഗം പാതിവഴിയിൽ നിർത്തി മുഖ്യമന്ത്രി മൈക്കിലൂടെ സംഘാടകരോട് കയർത്തു. ഏത് പരിപാടിയുടെ ഭാഗമായാണ് ഈ മേളം നടക്കുന്നത്? നിങ്ങളുടെ പരിപാടിയിൽ സംസാരിക്കുന്നത് നിങ്ങൾ തന്നെ കേൾക്കാൻ പാടില്ല എന്ന രീതിയിലാണോ ഈ ചെണ്ടകൊട്ട്? എന്നും മുഖ്യമന്ത്രി ചോദിച്ചു. മുഖ്യമന്ത്രിയുടെ കർക്കശമായ ഇടപെടലിനെത്തുടർന്ന് ഉടൻ തന്നെ വാദ്യമേളം നിർത്തിവെപ്പിച്ചു.

ചെണ്ടമേളവുമായി ബന്ധപ്പെട്ട് മുഖ്യമന്ത്രി പ്രകോപിതനാകുന്നത് ഇതാദ്യമായല്ല. മുൻപും സമാനമായ സാഹചര്യങ്ങൾ വാർത്തകളിൽ ഇടംപിടിച്ചിട്ടുണ്ട്. തിരുവനന്തപുരം സെൻട്രൽ സ്റ്റേഡിയത്തിൽ മെഡിസെപ് പദ്ധതിയുടെ ഉദ്ഘാടന പ്രസംഗത്തിനിടെ ചെണ്ടകൊട്ടിയ വാദ്യസംഘത്തോടും മുഖ്യമന്ത്രി നീരസം പ്രകടിപ്പിച്ചിരുന്നു. അന്ന് മുഖ്യമന്ത്രി പ്രസംഗം നിർത്തിയതിനെത്തുടർന്ന്, വേദിയിലുണ്ടായിരുന്ന ധനമന്ത്രി കെ.എൻ. ബാലഗോപാൽ നേരിട്ട് ഇടപെട്ട് പൊലിസിനോട് നിർദ്ദേശിച്ചാണ് മേളം നിർത്തിച്ചത്.

During the inauguration of the KSTA State Conference in Kottayam, Kerala Chief Minister Pinarayi Vijayan expressed his strong displeasure when a loud Chenda Melam (traditional percussion) performance continued even after he began his speech.