കോഴിക്കോട്: തിരുവോണമെത്തിയതോടെ നഗരത്തിലെ കാറ്ററിങ് യൂനിറ്റുകള്‍ക്കു തിരക്കോടു തിരക്ക്. നഗരത്തിലെ മിക്ക വീട്ടുകാരും ഓണസദ്യയൊരുക്കാന്‍ കാറ്ററിങ് യൂനിറ്റുകളെയാണ് ആശ്രയിക്കുന്നത്. അണുകുടുംബങ്ങളില്‍ സദ്യയൊരുക്കാന്‍ ആവശ്യത്തിന് ആളില്ലാത്തതും, പണിച്ചെലവും ഭാരവുമില്ലെന്നതും, ഫ്‌ളാറ്റുകളില്‍ സദ്യയൊരുക്കാനുള്ള സൗകര്യമില്ലാത്തതുമെല്ലാമാണ് കാറ്ററിങ് യൂനിറ്റുകളെ ആശ്രയിക്കാന്‍ ആളുകളെ പ്രേരിപ്പിക്കുന്നത്.
തിരുവോണ സദ്യയ്ക്കു പുറമെ ദിവസേന ഉച്ചയ്ക്ക് ഓണസദ്യ നല്‍കി വരുന്ന ഹോട്ടലുകളും നഗരത്തിലുണ്ട്. തിരുവോണസദ്യയൊരുക്കി വീടുകളിലെത്തിച്ചു നല്‍കുന്ന സംവിധാനവും കാറ്ററിങ് യൂനിറ്റുകള്‍ക്കുണ്ട്. പായസം മാത്രം തയാറാക്കുന്ന യൂനിറ്റുകളുമുണ്ട്. 100 രൂപ മുതല്‍ 400 രൂപ വരെ വിലയുള്ള ഓണസദ്യകളാണു പൊതുവെ കാറ്ററിങ് യൂനിറ്റുകള്‍ ഒരുക്കുന്നത്. ഹോട്ടല്‍ മലബാര്‍ പാലസില്‍ ഒരു സദ്യയ്ക്ക് 400 രൂപയാണു വില. കഴിഞ്ഞ പത്തു വര്‍ഷമായി ഇവിടെ സദ്യയൊരുക്കി വരുന്നുണ്ട്. മുന്നൂറോളം പേര്‍ക്കുള്ള സദ്യയാണ് ഇവിടെ തയാറാക്കുന്നത്. രണ്ടു പായസമടക്കമുള്ള 22 വിഭവങ്ങളാണു സദ്യയിലുണ്ടാകുക. ആവശ്യക്കാര്‍ക്കു മുന്‍കൂട്ടി ബുക്ക് ചെയ്യാം.
നഗരത്തിലെ സദ്യയൊരുക്കുന്നതില്‍ ശ്രദ്ധനേടിയ തളിയിലെ ശാന്തിമാമിക്ക് 18 വിഭവങ്ങളുള്ള സദ്യയ്ക്ക് 140 രൂപയാണ് ഈടാക്കുന്നത്. അഞ്ചുപേര്‍ക്കുള്ള സദ്യ മുതല്‍ 200 പേര്‍ക്കുവരെയുള്ള സദ്യയാണ് ശാന്തിമാമി തയാറാക്കിക്കൊടുക്കുന്നത്. ചെറിയ സ്ഥാപനങ്ങളും റസിഡന്റ്‌സ് അസോസിയേഷനുമെല്ലാം ഓണസദ്യയ്ക്ക് കാറ്ററിങ് യൂനിറ്റുകളെയാണ് ആശ്രയിക്കുന്നത്. അന്‍പതു രൂപ മുതല്‍ നൂറു വരെയുള്ള ഓണസദ്യയ്ക്കാണ് ആവശ്യക്കാര്‍ കൂടുതലെന്ന് കാറ്ററിങ് യൂനിറ്റുകള്‍ പറയുന്നു.
തിരുവോണ ദിവസം നഗരത്തിലെ മിക്ക ഹോട്ടലുകളും ഓണസദ്യയൊരുക്കുന്നുണ്ട്. ആവശ്യക്കാരുടെ എണ്ണം വര്‍ഷംതോറും വര്‍ധിക്കുന്നതിനാല്‍ കാറ്ററിങ് യൂനിറ്റുകളുടെ എണ്ണവും വര്‍ധിക്കുമെന്ന് കാറ്ററിങ് യൂനിറ്റിലെ ജീവനക്കാര്‍ പറയുന്നു.