ന്യൂഡല്‍ഹി: ഡല്‍ഹിയില്‍ നടന്ന ആഗോള എ.ഐ ഉച്ചകോടിക്കിടെ യൂത്ത് കോണ്‍ഗ്രസ് പ്രവര്‍ത്തകര്‍ നടത്തിയ ഷര്‍ട്ടൂരിയുള്ള പ്രതിഷേധത്തില്‍ യൂത്ത് കോണ്‍ഗ്രസ് ദേശീയ അധ്യക്ഷനും അറസ്റ്റില്‍. ഇന്ന് പുലര്‍ച്ചെയാണ് യൂത്ത് കോണ്‍ഗ്രസ് ദേശീയ അധ്യക്ഷന്‍ ഉദയ് ബാനു ചിബിനെ ഡല്‍ഹി പൊലിസ് അറസ്റ്റ് ചെയ്തത്. ഇതോടെ പ്രതിഷേധത്തിലുള്ള ആറാമത്തെ അറസ്റ്റാണിത്. 

20 മണിക്കൂറോളം നീണ്ട ചോദ്യം ചെയ്യലിന് ശേഷമാണ് യൂത്ത് കോണ്‍ഗ്രസ് നേതാവിനെ അറസ്റ്റ് ചെയ്തതെന്ന് വൃത്തങ്ങള്‍ അറിയിച്ചു. ക്രിമിനല്‍ ഗൂഢാലോചന, ഒരു പൊതുപ്രവര്‍ത്തകനെ സ്വമേധയാ ഉപദ്രവിക്കല്‍, ഒരു പൊതുപ്രവര്‍ത്തകനെ ജോലിയില്‍ തടസ്സപ്പെടുത്തല്‍, മനഃപൂര്‍വ്വം അനുസരണക്കേട് എന്നീ കുറ്റങ്ങള്‍ ചുമത്തിയാണ് കേസെടുത്തിരിക്കുന്നത്. രാവിലെ പത്തു മണിയോടെ ഇദ്ദേഹത്തെ കോടതിയില്‍ ഹാജരാക്കും. അറസ്റ്റ് സ്ഥിരീകരിച്ചിട്ടുണ്ടെങ്കിലും ഡല്‍ഹി പൊലിസ് ഇക്കാര്യത്തില്‍ പ്രതികരിച്ചിട്ടില്ല.   

ALSO READ: എ.ഐ ഉച്ചകോടിയിലെ യൂത്ത് കോണ്‍ഗ്രസ് പ്രതിഷേധം; അറസ്റ്റിലായവരുടെ എണ്ണം 5 ആയി
 
ഭാരത് മണ്ഡപത്തില്‍ നടന്ന എഐ ഇംപാക്ട് ഉച്ചകോടിയിലെ ഒരു പ്രദര്‍ശന ഹാളില്‍ വെള്ളിയാഴ്ചയായിരുന്നു യൂത്ത് കോണ്‍ഗ്രസ് പ്രവര്‍ത്തകരുടെ നാടകീയ പ്രതിഷേധം. സര്‍ക്കാര്‍ വിരുദ്ധവും ഇന്ത്യ-യുഎസ് വ്യാപാര കരാറിനെതിരെയുമുള്ള മുദ്രാവാക്യങ്ങള്‍ എഴുതിയ ടീ-ഷര്‍ട്ടുകള്‍ കയ്യിലേന്തിയായിരുന്നു യൂത്ത് കോണ്‍ഗ്രസ് പ്രവര്‍ത്തകര്‍ പ്രതിഷേധിച്ചത്. സംഭവം ദിവസം തന്നെ നാലുപേരെ അറസ്റ്റ് ചെയ്തിരുന്നു.മധ്യപ്രദേശിലെ ഗ്വാളിയോറില്‍ നിന്ന് ജിതേന്ദ്ര യാദവ് എന്നയാളെ കഴിഞ്ഞ ദിവസം അറസ്റ്റ് ചെയ്തു. 

ALSO READ: ആദ്യ വേനല്‍മഴയില്‍ തന്നെ മുങ്ങി ദേശീയപാത; മേല്‍പ്പാലത്തിലെ വിള്ളല്‍ കരാര്‍ കമ്പനി രാത്രിയില്‍ തന്നെ ടാറിട്ട് മൂടി
 
വിഷയത്തില്‍ കൂടുതല്‍ ഗൂഢാലോചന നടന്നിട്ടുണ്ടെന്നാണ് ഉദ്യോഗസ്ഥര്‍ പറയുന്നത്. പ്രതിഷേധക്കാര്‍ ഓണ്‍ലൈന്‍ രജിസ്‌ട്രേഷന്‍ നടത്തിയാണ് ഉച്ചകോടിയുടെ ഉള്ളില്‍ പ്രവേശിക്കാനുള്ള അനുമതി നേടിയത്. ആദ്യം കറുത്ത കുടകളില്‍ പ്രിന്റ് ചെയ്ത സ്റ്റിക്കറുകള്‍ ഒട്ടിച്ച് ഭാരത് മണ്ഡപത്തിലേക്ക് കടക്കാനാണ് പദ്ധതിയിട്ടിരുന്നതെന്ന് പൊലിസ് പറയുന്നു. എന്നാല്‍, കറുത്ത കുടകള്‍ ഗേറ്റുകള്‍ക്ക് സമീപമുള്ള സുരക്ഷാ ഉദ്യോഗസ്ഥരുടെ ശ്രദ്ധയില്‍പ്പടുമെന്ന് മനസ്സിലാക്കി പദ്ധതി മാറ്റുകയാണുണ്ടായത്. പിന്നീട് പ്രിന്റ് ചെയ്ത സ്റ്റിക്കറുകള്‍ ടീ-ഷര്‍ട്ടുകളില്‍ പതിപ്പിച്ച് ഷര്‍ട്ടുകള്‍ക്ക് താഴെ ധരിക്കുകയുമായിരുന്നുവെന്നുമാണ് പൊലിസ് പറയുന്നത്.  

youth congress national president udai bhanu chib was arrested by delhi police after a dramatic protest at the global ai summit held at bharat mandapam in new delhi. he was booked on charges including criminal conspiracy and obstructing a public servant.