മസ്‌കത്ത്: സമുദ്ര അതിര്‍ത്തി സംബന്ധിച്ചുണ്ടായ വിവാദത്തില്‍ കുവൈത്തിന് വ്യക്തമായ പിന്തുണ പ്രഖ്യാപിച്ച് ഒമാന്‍ രംഗത്തെത്തി. ഇറാഖ് ഐക്യരാഷ്ട്രസഭയില്‍ സമര്‍പ്പിച്ച സമുദ്ര അതിര്‍ത്തി കോ-ഓര്‍ഡിനേറ്റുകളും ഭൂപടവും കുവൈത്തിന്റെ പരമാധികാരത്തെ ബാധിക്കുന്നതാണെന്ന ആശങ്ക ഉയര്‍ന്ന പശ്ചാത്തലത്തിലാണ് ഒമാന്റെ പ്രതികരണം.   

ഒമാനിന്റെ മിനിസ്ട്രി ഓഫ് ഫോറിന്‍ അഫേഴ്‌സ് ഒമാന്‍  പുറത്തിറക്കിയ പ്രസ്താവനയില്‍, കുവൈത്തിന്റെ സമുദ്രപരിധിയുമായി ബന്ധപ്പെട്ട അവകാശങ്ങള്‍ പൂര്‍ണ്ണമായും മാനിക്കപ്പെടേണ്ടതുണ്ടെന്ന് വ്യക്തമാക്കുന്നു. രാജ്യങ്ങളുടെ പരമാധികാരവും അന്താരാഷ്ട്ര നിയമങ്ങളും ബഹുമാനിക്കപ്പെടണം എന്നതാണ് ഒമാന്റെ നിലപാട്. ഗള്‍ഫ് മേഖലയിലെ സ്ഥിരതയും സുരക്ഷയും സംരക്ഷിക്കപ്പെടേണ്ടത് എല്ലാവരുടെയും ഉത്തരവാദിത്തമാണെന്നും പ്രസ്താവനയില്‍ പറയുന്നു.

ഇറാഖ് ഐക്യരാഷ്ട്രസഭയ്ക്ക് സമര്‍പ്പിച്ച രേഖകളില്‍ ഉള്‍പ്പെട്ട അതിര്‍ത്തി നിര്‍ദേശങ്ങളാണ് പ്രശ്‌നത്തിന് വഴിവച്ചത്. കുവൈത്ത് ഈ നീക്കത്തെ ശക്തമായി എതിര്‍ത്ത് രംഗത്തെത്തിയിരുന്നു. തങ്ങളുടെ സമുദ്രപരിധിയില്‍ അനാവശ്യ ഇടപെടലാണിതെന്നായിരുന്നു കുവൈത്തിന്റെ ആരോപണം. വിഷയം നയതന്ത്രപരമായി പരിഹരിക്കണമെന്നും അവര്‍ ആവശ്യപ്പെട്ടിരുന്നു.

ഇതിനിടെ ഒമാന്‍ വിദേശകാര്യ മന്ത്രി ബദ്ര്‍ ബിന്‍ ഹമദ് അല്‍ ബുസയ്ദിയും, ഇറാഖ് വിദേശകാര്യ മന്ത്രി ഫുആദ് ഹുസൈന്‍  എന്നിവരുമായി ടെലിഫോണ്‍ സംഭാഷണം നടത്തി. തര്‍ക്കവിഷയങ്ങള്‍ സംഭാഷണത്തിലൂടെയും പരസ്പര ധാരണയിലൂടെയും പരിഹരിക്കണമെന്ന നിലപാട് ഒമാന്‍ ആവര്‍ത്തിച്ചതായാണ് അറിയുന്നത്. പ്രദേശത്തെ സമാധാനവും ഐക്യവും നിലനിര്‍ത്തേണ്ടത് അത്യാവശ്യമാണെന്നും ചര്‍ച്ചയില്‍ ഉയര്‍ന്നു.

കുവൈത്ത്,ഇറാഖ്,ഒമാന്‍ എന്നീ രാജ്യങ്ങള്‍ ഉള്‍പ്പെട്ട ഈ വിഷയത്തിന് ഗള്‍ഫ് മേഖലയിലെ രാഷ്ട്രീയ പ്രാധാന്യമുണ്ട്. സമുദ്ര അതിര്‍ത്തി നിര്‍ണയവുമായി ബന്ധപ്പെട്ട കാര്യങ്ങള്‍ അന്താരാഷ്ട്ര നിയമങ്ങളുടെ അടിസ്ഥാനത്തില്‍ മാത്രമേ പരിഹരിക്കാന്‍ കഴിയുകയുള്ളൂ എന്ന അഭിപ്രായമാണ് വിവിധ വൃത്തങ്ങളില്‍ നിന്നുമുയരുന്നത്.

പ്രദേശത്ത് അനാവശ്യ സംഘര്‍ഷാവസ്ഥ ഒഴിവാക്കാുവാനും സഹകരണ മനോഭാവം നിലനിര്‍ത്താനും നയതന്ത്ര ഇടപെടലുകള്‍ ശക്തമാകുന്ന സാഹചര്യത്തിലാണ് ഒമാന്റെ പിന്തുണാ പ്രഖ്യാപനം ശ്രദ്ധേയമാകുന്നത്. വിഷയത്തിന് സമാധാനപരമായ പരിഹാരം കണ്ടെത്തുമെന്ന പ്രതീക്ഷയിലാണ് ഗള്‍ഫ് മേഖല.

Oman has officially expressed support for Kuwait in the ongoing maritime border dispute with Iraq following Iraq’s submission of sea boundary coordinates to the United Nations, reaffirming respect for Kuwait’s sovereignty and regional stability.