കോഴിക്കോട്: സാമൂഹിക മാധ്യമങ്ങൾ വഴി യുവതികളെ വലയിലാക്കി പീഡിപ്പിക്കുകയും പണവും സ്വർണ്ണവും തട്ടിയെടുക്കുകയും ചെയ്യുന്ന മലപ്പുറം സ്വദേശി പിടിയിൽ. കോട്ടക്കൽ നെല്ലിക്കാപറമ്പ് സ്വദേശി കുഞ്ഞിത്തൊടി വീട്ടിൽ മുഹമ്മദ് ജസീൽ (34) ആണ് കോഴിക്കോട് ടൗൺ പൊലിസിന്റെ പിടിയിലായത്.

സംഭവത്തെക്കുറിച്ച് പൊലിസ് പറയുന്നത്:

നാദാപുരം സ്വദേശിനിയായ യുവതിയെയാണ് പ്രതി ഇത്തരത്തിൽ ചതിയിൽപ്പെടുത്തിയത്. 2025 ഏപ്രിലിൽ യുവതിയെ കോഴിക്കോട്ടെ ഒരു ഹോട്ടലിൽ എത്തിച്ച് ബലാത്സംഗം ചെയ്യുകയായിരുന്നു. തുടർന്ന് യുവതിയുടെ ആറ് പവനോളം വരുന്ന സ്വർണ്ണാഭരണങ്ങളുമായി ഇയാൾ മുങ്ങി. യുവതി നൽകിയ പരാതിയുടെ അടിസ്ഥാനത്തിൽ നടത്തിയ അന്വേഷണത്തിലാണ് പ്രതി കുടുങ്ങിയത്.

വലയിലായത് ഒട്ടേറെ സ്ത്രീകൾ:

മുഹമ്മദ് ജസീലിനെതിരെ സമാനമായ മറ്റൊരു പരാതി കൂടി പൊലിസിന് ലഭിച്ചിട്ടുണ്ട്. സോഷ്യൽ മീഡിയ പ്ലാറ്റ്‌ഫോമുകൾ വഴി ഇയാൾ ഒട്ടേറെ സ്ത്രീകളുമായി സൗഹൃദം സ്ഥാപിച്ചിരുന്നതായും പൊലിസിന് വിവരം ലഭിച്ചു. സമാനമായ രീതിയിൽ മറ്റ് തട്ടിപ്പുകൾ നടത്തിയിട്ടുണ്ടോ എന്ന് പൊലിസ് പരിശോധിച്ചു വരികയാണ്.

ടൗൺ പൊലിസ് സ്റ്റേഷൻ ഇൻസ്പെക്ടർ പ്രിയൻ, സബ് ഇൻസ്പെക്ടർ മീജോ ജോസ്, എസ്.സി.പി.ഒ.മാരായ വിജീഷ്, ജിനേഷ്, അരുൺ എന്നിവരടങ്ങിയ സംഘമാണ് പ്രതിയെ കസ്റ്റഡിയിലെടുത്തത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.