ആയഞ്ചേരി: ലോണ്‍ ആപ്പില്‍ നിന്നുള്ള ഭീഷണിക്ക് പിന്നാലെ കാണാതായ ആയഞ്ചേരി സ്വദേശി വിഷ്ണുവിനെ പൊലിസ് കണ്ടെത്തി. പയ്യന്നൂര്‍ റെയില്‍വേ സ്റ്റേഷനില്‍ നിന്നാണ് വിഷ്ണുവിനെ കണ്ടെത്തിയത്. 

ഏപ്രില്‍ 13 നാണ് വിഷ്ണുവിനെ കാണാതായത്. ബാങ്കിലേക്ക് പോകുന്നുവെന്ന് പറഞ്ഞ് വീട്ടില്‍ നിന്ന് ഇറങ്ങിയ വിഷ്ണുവിനെ കാണാതാവുകയായിരുന്നു. പിന്നാലെ ലോണ്‍ ആപ്പ് ഭീഷണിയുമായി ബന്ധപ്പെട്ട തെളിവുകള്‍ സഹിതം കുടുംബം സൈബര്‍ പൊലിസില്‍ പരാതി നല്‍കിയിരുന്നു.

വിഷ്ണുവിന്റെ സാമ്പത്തിക ഇടപാടുകള്‍ കേന്ദ്രീകരിച്ചാണ് അന്വേഷണം പുരോഗമിച്ചുകൊണ്ടിരുന്നത്.  10,000 രൂപയാണ് ലോണ്‍ ആപ്പിലൂടെ വായ്പയായി എടുത്തത്. തിരിച്ചടവ് മുടങ്ങിയതിനെ തുടര്‍ന്ന് മോര്‍ഫ് ചെയ്ത ചിത്രങ്ങള്‍ ഉപയോഗിച്ച് ഭീഷണിപ്പെടുത്തിയതായും കുടുംബം ആരോപിക്കുന്നു.കാണാതാകുന്നതിന് മുന്‍പ് വന്ന ഫോണ്‍ കോള്‍ വിഷ്ണുവിനെ ഏറെ അസ്വസ്ഥനാക്കിയതായും പറയുന്നു. 

വീട്ടില്‍ നിന്ന് പുറപ്പെടുന്നതിനുമുമ്പ് സഹോദരങ്ങള്‍ക്ക് അയച്ച സന്ദേശത്തില്‍ തന്റെ അവസ്ഥയെക്കുറിച്ച് വിഷ്ണു വിശദീകരിച്ചിരുന്നു. ലോണ്‍ ആപ്പുമായി ബന്ധപ്പെട്ടവര്‍ തന്റെ ഫോട്ടോകള്‍ പലര്‍ക്കും അയച്ചുകൊണ്ടിരിക്കുകയാണെന്നും അതിനാല്‍ ഏറെ ഭയപ്പെട്ടിരിക്കുകയാണെന്നും സന്ദേശത്തില്‍ പറയുന്നു.

ഇതിന്റെ ആഘാതം കാരണമാണ് ജോലിക്ക് പോകാന്‍ കഴിയാത്തതെന്നും, മടി കാരണമെന്നല്ലെന്നും വിഷ്ണു വ്യക്തമാക്കുന്നു. അമ്മ ആശങ്കപ്പെടേണ്ടതില്ലന്നും താന്‍ ഇപ്പോള്‍ സുഖത്തിലല്ലെന്നും, കാര്യങ്ങള്‍ ശരിയായി വന്നാല്‍ വീട്ടിലേക്ക് മടങ്ങിവരുമെന്നും സന്ദേശത്തില്‍ പറയുന്നുണ്ട്.

A person reported missing amid alleged threats from loan apps has been found at Payyannur Railway Station. The individual, identified as Vishnu, was traced safely by authorities after a search effort. The case has brought attention to the growing issue of harassment linked to digital loan applications, with police expected to investigate the matter further and take necessary action.