റിയാദ്: സഊദി അറേബ്യയില്‍ വെള്ളിയാഴ്ച വരെ ഇടിമിന്നലോടു കൂടിയ മഴ തുടരുമെന്നും വെള്ളപ്പൊക്ക സാധ്യതയുള്ള പ്രദേശങ്ങളില്‍ നിന്ന് വിട്ടുനില്‍ക്കണമെന്നും സിവില്‍ ഡിഫന്‍സ് ജനങ്ങള്‍ക്ക് മുന്നറിയിപ്പ് നല്‍കി. ദേശീയ കാലാവസ്ഥാ നിരീക്ഷണ കേന്ദ്രത്തിന്റെ (ചഇങ) റിപ്പോര്‍ട്ടുകള്‍ ഉദ്ധരിച്ചാണ് സിവില്‍ ഡിഫന്‍സ് ജാഗ്രതാ നിര്‍ദേശം പുറപ്പെടുവിച്ചത്.

മക്ക, റിയാദ്, മദീന, ഖസീം, ഹായില്‍, തബൂക്ക്, കിഴക്കന്‍ പ്രവിശ്യ, വടക്കന്‍ അതിര്‍ത്തികള്‍, അല്‍ ജൗഫ്, അല്‍ ബാഹ, അസീര്‍, ജീസാന്‍, നജ്‌റാന്‍ തുടങ്ങി സഊദിയുടെ ഒട്ടുമിക്ക പ്രദേശങ്ങളിലും മിതമായത് മുതല്‍ ശക്തമായ മഴ വരെ ലഭിക്കാന്‍ സാധ്യതയുണ്ട്. പെട്ടെന്നുള്ള വെള്ളപ്പൊക്കം, ആലിപ്പഴ വീഴ്ച, കാഴ്ചാപരിമിതി ഗണ്യമായി കുറയ്ക്കുന്ന പൊടിക്കാറ്റ് എന്നിവയ്ക്കും സാധ്യതയുണ്ടെന്ന് അധികൃതര്‍ വ്യക്തമാക്കി.

മോശം കാലാവസ്ഥയെ തുടര്‍ന്ന് തിങ്കളാഴ്ച ഹഫര്‍ അല്‍ ബാതിന്‍ സര്‍വകലാശാലയ്ക്ക് കീഴിലുള്ള കോളേജുകളിലും ഖഫ്ജി, അല്‍ നൈരിയ ഗവര്‍ണറേറ്റുകളിലും നേരിട്ടുള്ള ക്ലാസുകള്‍ ഒഴിവാക്കി ഓണ്‍ലൈന്‍ പഠനം ഏര്‍പ്പെടുത്തിയിരുന്നു. സുരക്ഷിതമായ സ്ഥലങ്ങളില്‍ തുടരാനും, വെള്ളക്കെട്ടുകളിലും മഴവെള്ളം ഒഴുകിപ്പോകുന്ന പ്രദേശങ്ങളിലും ഇറങ്ങുകയോ നീന്തുകയോ ചെയ്യരുതെന്നും സിവില്‍ ഡിഫന്‍സ് കര്‍ശന നിര്‍ദേശം നല്‍കിയിട്ടുണ്ട്. കാലാവസ്ഥ സംബന്ധിച്ച ഔദ്യോഗിക വിവരങ്ങള്‍ക്കായി മാധ്യമങ്ങളും സമൂഹ മാധ്യമ അക്കൗണ്ടുകളും ശ്രദ്ധിക്കണമെന്നും അധികൃതര്‍ അഭ്യര്‍ഥിച്ചു.

കഴിഞ്ഞ ദിവസങ്ങളില്‍ സഊദിയുടെ വിവിധ ഭാഗങ്ങളില്‍ അസ്ഥിരമായ കാലാവസ്ഥയാണ് അനുഭവപ്പെടുന്നത്. ഞായറാഴ്ച മദീനയില്‍ ശക്തമായ മഴയും കാറ്റും ആലിപ്പഴ വീഴ്ചയും മുന്നില്‍ കണ്ട് റെഡ് അലര്‍ട്ട് പ്രഖ്യാപിച്ചിരുന്നു. രാജ്യത്തുടനീളം അസ്ഥിര കാലാവസ്ഥ തുടരുന്നതിനാല്‍ പൊതുജനങ്ങള്‍ സുരക്ഷയ്ക്ക് മുന്‍ഗണന നല്‍കണമെന്ന് അധികൃതര്‍ ആവര്‍ത്തിച്ചു വ്യക്തമാക്കി.

Summary: Saudi Arabia’s General Directorate of Civil Defense has called on residents to remain vigilant and avoid flood-prone areas as thunderstorms are forecast to continue affecting much of the Kingdom through Friday. Authorities warned that moderate to heavy rainfall is expected across multiple regions, including Makkah, Riyadh, Madinah, Qassim, Hail, Tabuk, the Eastern Region, Northern Borders, Al-Jouf, Al-Baha, Asir, Jazan, and Najran.