മനാമ: ബഹ്‌റൈനിലെ മആമീര്‍ വ്യവസായ മേഖലയില്‍ ഇറാന്‍ നടത്തിയ മിസൈല്‍ ആക്രമണത്തില്‍ എണ്ണശുദ്ധീകരണ ശാലയ്ക്ക് തീപിടിച്ചു. രാജ്യത്തെ പ്രധാന ഊര്‍ജ്ജ കേന്ദ്രങ്ങളിലൊന്നായ ബാപ്‌കോ എനര്‍ജീസ് (Bapco Energies) റിഫൈനറിക്ക് നേരെയാണ് ആക്രമണമുണ്ടായതെന്ന് ബഹ്‌റൈന്‍ ആഭ്യന്തര മന്ത്രാലയം സ്ഥിരീകരിച്ചു.
കഴിഞ്ഞ രാത്രിയുണ്ടായ ആക്രമണത്തെത്തുടര്‍ന്ന് പ്ലാന്റില്‍ വന്‍ തീപിടുത്തമുണ്ടായെങ്കിലും സിവില്‍ ഡിഫന്‍സ് ഉദ്യോഗസ്ഥര്‍ നടത്തിയ കൃത്യസമയത്തെ ഇടപെടലിലൂടെ തീ നിയന്ത്രണവിധേയമാക്കി. സംഭവത്തില്‍ ആര്‍ക്കും പരിക്കേറ്റിട്ടില്ലെന്നും നാശനഷ്ടങ്ങള്‍ വിലയിരുത്തി വരികയാണെന്നും അധികൃതര്‍ അറിയിച്ചു. ആക്രമണമുണ്ടായെങ്കിലും റിഫൈനറിയുടെ പ്രവര്‍ത്തനങ്ങള്‍ തടസ്സമില്ലാതെ തുടരുന്നുണ്ട്.
ബഹ്‌റൈന്‍ സ്റ്റേറ്റ് ടെലിവിഷനാണ് മആമീറിലെ ആക്രമണ വാര്‍ത്ത പുറത്തുവിട്ടത്. മേഖലയില്‍ സംഘര്‍ഷം രൂക്ഷമായതോടെ മനാമ ഉള്‍പ്പെടെയുള്ള പ്രധാന നഗരങ്ങളില്‍ സുരക്ഷാ സജ്ജീകരണങ്ങള്‍ വര്‍ദ്ധിപ്പിച്ചിട്ടുണ്ട്. സഊദി അറേബ്യ ഉള്‍പ്പെടെയുള്ള അയല്‍ രാജ്യങ്ങളിലെ വ്യോമപ്രതിരോധ സംവിധാനങ്ങളും അതീവ ജാഗ്രതയിലാണ്. ജനങ്ങള്‍ ഔദ്യോഗിക അറിയിപ്പുകള്‍ മാത്രം പിന്തുടരണമെന്നും പരിഭ്രാന്തരാകേണ്ടതില്ലെന്നും ആഭ്യന്തര മന്ത്രാലയം നിര്‍ദ്ദേശിച്ചു.

ALSO READ: മനാമയിലെ ഇസ്‌റാഈല്‍ എംബസിക്ക് നേരെ ഇറാന്റെ ആക്രമണം

Summary; A facility in the Ma'ameer area has been targeted, the Interior Ministry said. Authorities are taking the appropriate procedures at the scene.