പാലക്കാട്: കുണ്ടൂര്‍ക്കുന്ന് ആവണക്കുന്ന് ഭാഗത്ത് മഴയോടൊപ്പം കരി കലര്‍ന്ന വെള്ളം പെയ്തിറങ്ങിയത് നാട്ടുകാരെ ദുരിതത്തിലാക്കി. കഴിഞ്ഞ ദിവസം പെയ്ത മഴയിലാണ് വീടുകളുടെ മുറ്റത്തും മേല്‍ക്കൂരകളിലും ചെടികളുടെ ഇലകളിലും കരി ഒട്ടിപ്പിടിച്ച നിലയില്‍ കണ്ടെത്തിയത്. അപ്രതീക്ഷിതമായുണ്ടായ ഈ പ്രതിഭാസം പ്രദേശവാസികളില്‍ വലിയ ആശങ്കയുണ്ടാക്കിയിട്ടുണ്ട്.

പ്രദേശത്ത് നിരവധി പ്ലൈവുഡ് നിര്‍മ്മാണ യൂണിറ്റുകളും മറ്റ് വ്യാവസായ സ്ഥാപനങ്ങളും പ്രവര്‍ത്തിക്കുന്നുണ്ട്. ഈ സ്ഥാപനങ്ങളിലെ പുകക്കുഴലുകളില്‍ നിന്നുള്ള കരി മഴവെള്ളത്തില്‍ കലര്‍ന്ന് താഴേക്ക് പതിച്ചതാകാമെന്നാണ് പ്രാഥമിക നിഗമനം. മലിനീകരണ നിയന്ത്രണ മാനദണ്ഡങ്ങള്‍ പാലിക്കാതെയാണോ ഇത്തരം സ്ഥാപനങ്ങള്‍ പ്രവര്‍ത്തിക്കുന്നതെന്ന ചോദ്യവും നാട്ടുകാര്‍ ഉയര്‍ത്തുന്നു.

 ALSO READ: സർക്കാർ, എയ്ഡഡ് സ്‌കൂളുകളിൽ 1857 പുതിയ അധ്യാപക തസ്തികകൾ കൂടി; 2022 മാർച്ച് 31 വരെ നിയമനം ലഭിച്ചവർക്ക് ജോലി സംരക്ഷണം ഉറപ്പാക്കും

സംഭവത്തെത്തുടര്‍ന്ന് നാട്ടുകാര്‍ രൂപീകരിച്ച ആക്ഷന്‍ കൗണ്‍സില്‍ ഭാരവാഹികളും പഞ്ചായത്ത് അധികൃതരും സ്ഥലത്തെത്തി പരിശോധന നടത്തി. വീടുകളിലും പരിസരത്തും അടിഞ്ഞുകൂടിയ കരിയുടെ സാമ്പിളുകള്‍ പരിശോധനയ്ക്കായി ശേഖരിച്ചിട്ടുണ്ട്. ജനങ്ങളുടെ ആരോഗ്യത്തിനും കൃഷിക്കും ഭീഷണിയാകുന്ന ഇത്തരം പ്രവര്‍ത്തനങ്ങള്‍ക്കെതിരെ ശക്തമായ നടപടി വേണമെന്നാണ് നാട്ടുകാരുടെ ആവശ്യം.

In Thachanattukara, Palakkad, residents were left in distress after rain mixed with black soot covered houses and surroundings, raising serious concerns over industrial pollution from nearby factories.