തിരുവനന്തപുരം: നിര്‍മാണപ്രവൃത്തി നടക്കുന്നതിനാല്‍ നാളത്തെ മൂന്നു ട്രെയിനുകള്‍ റദ്ദാക്കി. തിരുവനന്തപുരം ഡിവിഷന് കീഴില്‍ ഇന്നും നാളെയുമാണ് ട്രെയിന്‍ ഗതാഗത നിയന്ത്രണം. നിരവധി ട്രെയിനുകള്‍ ഭാഗികമായി റദ്ദാക്കിയപ്പോള്‍ മറ്റ് ചിലത് വഴിതിരിച്ചുവിടുകയും ചെയ്തു. നാളെ സര്‍വീസ് നടത്തേണ്ട 06345 എറണാകുളം - കോട്ടയം പാസഞ്ചര്‍, 0634 കോട്ടയം-എറണാകുളം പാസഞ്ചര്‍, 06017 ഷൊര്‍ണൂര്‍ - എറണാകുളം ജങ്ഷന്‍ മെമു എന്നിവയാണ് റദ്ദാക്കിയത്.

ഇന്ന് വൈകീട്ട് 5:40ന് എറണാകുളത്തുനിന്ന് ഷൊര്‍ണൂരിലേക്ക് സര്‍വീസ് നടത്തേണ്ട മെമുവും റദ്ദാക്കിയവയില്‍ ഉള്‍പ്പെടുന്നുണ്ട്. ട്രെയിന്‍ നമ്പര്‍ 16128 ഗുരുവായൂര്‍ - ചെന്നൈ എഗ്മോര്‍ എക്‌സ്പ്രസ് ഏപ്രില്‍ 08, 09, 10, 12, 14, 15, 16, 17, 19, 21, 23, 24, 28, 29, 30, മാര്‍ച്ച് 01 തിയതികളില്‍ കോട്ടയം വഴിയാകും സര്‍വിസ് നടത്തുക. എറണാകുളം, ജങ്ഷന്‍, ചേര്‍ത്തല, ആലപ്പുഴ സ്റ്റോപ്പുകള്‍ ഒഴിവാക്കിയാകും ഈ ദിവസങ്ങളിലെ സര്‍വീസ്. ഇതിന് പകരമായി കോട്ടയം, ചങ്ങനാശേരി, തിരുവല്ല, ചെങ്ങന്നൂര്‍ എന്നിവിടങ്ങില്‍ ട്രെയിനിന് സ്റ്റോപ്പുണ്ടാകും.

16127 ചെന്നൈ എഗ്മോര്‍-ഗുരുവായൂര്‍ എക്‌സ്പ്രസ് ഇന്ന് എറണാകുളത്ത് സര്‍വീസ് അവസാനിപ്പിക്കും. 16128 ഗുരുവായൂര്‍ - ചെന്നൈ എഗ്മോര്‍ എക്‌സ്പ്രസ് വെള്ളിയാഴ്ച എറണാകുളത്തുനിന്നാണ് സര്‍വീസ് ആരംഭിക്കുക. 16341 ഗുരുവായൂര്‍ - തിരുവനന്തപുരം സെന്‍ട്രല്‍ ഇന്റര്‍സിറ്റി എക്‌സ്പ്രസും വെള്ളിയാഴ്ച എറണാകുളത്തു നിന്നാണ് പുറപ്പെടുക.

16342 തിരുവനന്തപുരം സെന്‍ട്രല്‍ - ഗുരുവായൂര്‍ ഇന്റര്‍സിറ്റി എക്‌സ്പ്രസ് വ്യാഴാഴ്ച എറണാകുളത്ത് യാത്ര അവസാനിപ്പിക്കും. 16187 കാരയ്ക്കല്‍ - എറണാകുളം എക്‌സ്പ്രസ് ഇന്ന് പാലക്കാട് യാത്ര അവസാനിപ്പിക്കും. 16188 എറണാകുളം - കാരയ്ക്കല്‍ എക്‌സ്പ്രസ് ശനിയാഴ്ച പാലക്കാട് നിന്നാകും പുറപ്പെടുക. 16328 ഗുരുവായൂര്‍ - മധുര എക്‌സ്പ്രസ് വെള്ളിയാഴ്ച എറണാകുളത്തുനിന്നാകും പുറപ്പെടുക. ഇന്നത്തെ മധുര -ഗുരുവായൂര്‍ എക്‌സ്പ്രസ് എറണാകുളം വരെ മാത്രമേ സര്‍വീസ് നടത്തുകയുള്ളൂ.