ന്യൂഡല്‍ഹി: കേരളത്തിലെ സിറ്റിങ് എം.എല്‍.എമാരില്‍ 70 ശതമാനത്തോളം പേര്‍ക്കെതിരേയും ക്രിമിനല്‍ കേസുകളുണ്ടെന്നും പകുതിയിലേറെ എം.എല്‍.എമാരും കോടീശ്വരന്മാരാണെന്നും കണക്കുകള്‍. 132 സിറ്റിങ് എം.എല്‍.എമാര്‍ നല്‍കിയ സത്യവാങ്മൂലങ്ങള്‍ പരിശോധിച്ച് അസോസിയേഷന്‍ ഫോര്‍ ഡെമോക്രാറ്റിക് റിഫോംസും (എ.ഡി.ആര്‍) കേരള ഇലക്ഷന്‍ വാച്ചും തയാറാക്കിയ പുതിയ റിപ്പോര്‍ട്ടില്‍ ആണ് ഇക്കാര്യങ്ങളുള്ളത്. 

132 പേരില്‍ 92 നിയമസഭാംഗങ്ങള്‍ക്കെതിരെയും ക്രിമിനല്‍ കേസുകള്‍ നിലവിലുണ്ട്. ഇതില്‍ 33 പേര്‍ക്കെതിരേ (25 ശതമാനം) കൊലപാതകം, വധശ്രമം തുടങ്ങിയ ഗുരുതരമായ ക്രിമിനല്‍ കുറ്റങ്ങളാണുള്ളത്. ഇന്ത്യന്‍ ശിക്ഷാനിയമം സെക്ഷന്‍ 302 പ്രകാരം രണ്ട് എം.എല്‍.എമാര്‍ക്കെതിരേ കൊലപാതക കേസും സെക്ഷന്‍ 307 പ്രകാരം മൂന്ന് പേര്‍ക്കെതിരേ വധശ്രമ കേസും നിലവിലുണ്ട്. സ്ത്രീകള്‍ക്കെതിരായ അതിക്രമങ്ങളുമായി ബന്ധപ്പെട്ട് മൂന്ന് എം.എല്‍.എമാര്‍ക്കെതിരേ കേസുള്ളതില്‍ ഒരെണ്ണം ബലാത്സംഗക്കുറ്റമാണ്. 

ALSO READ: യുഡിഎഫ് 85 മുതൽ 100 സീറ്റുകൾ വരെ നേടും; 14 ജില്ലകളിലും പ്രചാരണത്തിനിറങ്ങും; ശശി തരൂർ

രാഷ്ട്രീയ പാര്‍ട്ടികള്‍ തിരിച്ചുള്ള കണക്കുകള്‍ പരിശോധിക്കുമ്പോള്‍ കോണ്‍ഗ്രസിന്റെ 21 എം.എല്‍.എമാരില്‍ 19 പേരും (90 ശതമാനം) ക്രിമിനല്‍ കേസ് നേരിടുന്നവരാണ്. സി.പി.എമ്മിന്റെ 58 എം.എല്‍.എമാരില്‍ 43 പേര്‍ക്കെതിരെയും (74 ശതമാനം) ക്രിമിനല്‍ കേസുകളുണ്ട്. മുസ്‌ലിം ലീഗിലെ 86 ശതമാനം പേര്‍ക്കും സി.പി.ഐയിലെ 44 ശതമാനം പേര്‍ക്കും ക്രിമിനല്‍ പശ്ചാത്തലമുണ്ടെന്ന് സത്യവാങ്മൂലത്തില്‍ വ്യക്തമാക്കുന്നു.

സാമ്പത്തിക സ്ഥിതി പരിശോധിച്ചാല്‍ 72 എം.എല്‍.എമാര്‍ (55 ശതമാനം) ഒരു കോടി രൂപയിലധികം ആസ്തിയുള്ളവരാണ്. 132 എം.എല്‍.എമാരുടെ ആകെ ആസ്തി 363.78 കോടി രൂപയാണ്. കേരള കോണ്‍ഗ്രസ് (എം), ജെ.ഡി.എസ്, എന്‍.സി.പി, കേരള കോണ്‍ഗ്രസ് എന്നീ പാര്‍ട്ടികളിലെ മുഴുവന്‍ എം.എല്‍.എമാരും കോടീശ്വരന്മാരാണ്. ലീഗ് എം.എല്‍.എമാരില്‍ 86 ശതമാനവും കോണ്‍ഗ്രസില്‍ 62 ശതമാനവും സി.പി.എമ്മില്‍ 40 ശതമാനവും കോടീശ്വരന്മാരുടെ പട്ടികയിലുണ്ട്.

ALSO READ: കേരളത്തിൽ അങ്കം മുറുക്കാൻ ബിജെപി; മോദിയും അമിത് ഷായും എത്തും, പത്രികാ സമർപ്പണത്തിന് ബിജെപി മുഖ്യമന്ത്രിമാരുടെ നിര

34 കോടിയിലധികം രൂപ ആസ്തിയുള്ള കോണ്‍ഗ്രസിലെ മാത്യു കുഴല്‍നാടനാണ് ഏറ്റവും സമ്പന്നനായ എം.എല്‍.എ. സ്വതന്ത്ര എം.എല്‍.എ മാണി സി. കാപ്പന്‍ (27 കോടിയിലധികം), കേരള കോണ്‍ഗ്രസിലെ (ബി) കെ.ബി. ഗണേഷ് കുമാര്‍ (19 കോടിയിലധികം) എന്നിവരാണ് തൊട്ടുപിന്നില്‍. മറുവശത്ത് 9.9 ലക്ഷം രൂപ മാത്രം ആസ്തിയുള്ള സി.പി.എമ്മിലെ പി.പി. സുമോദ് ആണ് ഏറ്റവും കുറവ് ആസ്തിയുള്ള എം.എല്‍.എ.വിദ്യാഭ്യാസ യോഗ്യതയുടെ കാര്യത്തില്‍ 61 ശതമാനം പേര്‍ ബിരുദമോ അതിനുമുകളിലോ യോഗ്യതയുള്ളവരാണ്. 36 ശതമാനം പേര്‍ അഞ്ച് മുതല്‍ 12ാം ക്ലാസ് വരെ മാത്രം പഠിച്ചവരാണ്. 

നിയമസഭയിലുള്ള 132 പേരില്‍ 11 പേര്‍ (8 ശതമാനം) മാത്രമാണ് വനിതകള്‍. 70 ശതമാനം പേരും 51നും 80നും ഇടയില്‍ പ്രായമുള്ളവരാണ്. ബാക്കിയുള്ള 30 ശതമാനം പേര്‍ 25നും 50നും ഇടയില്‍ പ്രായപരിധിയിലുള്ളവരുമാണ്.

Around 70% of sitting MLAs in Kerala reportedly have criminal cases against them, while more than half are crorepatis. The data highlights concerns over the criminalisation of politics and the growing wealth among elected representatives. The findings have reignited debates on electoral reforms, transparency, and the need for stricter candidate screening in the political system.