മാനന്തവാടി: എടവക തോണിച്ചാല് അത്തേരിക്കുന്ന് പ്രദേശത്തെ ശില ബ്രിക്‌സ് ആന്‍ഡ് ഗ്രാനൈറ്റ് അടച്ചു പൂട്ടണമെന്നാവശ്യപ്പെട്ട് പ്രദേശവാസികള്‍ തിരുവോണ ദിനത്തില്‍ നിരാഹാരം അനുഷ്ഠിക്കും. ശബ്ദമലിനീകരണവും പൊടിപടലവും നിമിത്തം തങ്ങള്‍ ദുരിതം പേറുകയാണെന്ന് പ്രദേശവാസികള്‍ പറഞ്ഞു. ആദിവാസി കുടുംബമുള്‍പ്പെടെ 70 ലധികം കുടുംബങ്ങളാണ് സ്ഥാപനം കൊണ്ട് ദുരിതമനുഭവിക്കുന്നത്. തുടക്കത്തില്‍ ചെറിയ യന്ത്ര സാമഗ്രികളുമായി പ്രവര്‍ത്തനം തുടങ്ങിയ സ്ഥാപനം പിന്നീട് ശക്തി കൂടിയ യന്ത്ര സാമഗ്രികള്‍ ഉപയോഗിച്ച് പ്രവര്‍ത്തിപ്പിക്കുകയാണുണ്ടായതെന്ന് പ്രദേശവാസികള്‍ പറഞ്ഞു. സ്ഥാപനം പ്രവര്‍ത്തിക്കാന്‍ മുന്‍പ് പഞ്ചായത്ത് അധികൃതര്‍ അനുമതി നല്‍കിയിരുന്നെങ്കിലും കര്‍മസമിതിയുടെ പ്രക്ഷോഭത്തെ തുടര്‍ന്ന് ഇത് റദ്ദു ചെയ്യുകയാണുണ്ടായത്. പഞ്ചായത്ത് അധികൃതരുടെ ട്രേഡ് സര്‍ട്ടിഫിക്കറ്റ് ലഭ്യമാവാത്ത സ്ഥാപനം കോടതിയില്‍ നിന്നും അനുകൂലമായ വിധി സമ്പാദിച്ചാണ് പ്രവര്‍ത്തിക്കുന്നത്.
ശില ബ്രിക്‌സ് ആന്‍ഡ് ഗ്രാനൈറ്റ് എന്ന സ്ഥാപനം അടച്ചു പൂട്ടാനുള്ള നടപടി അധികൃതര്‍ സ്വീകരിക്കാത്ത പക്ഷം വരും ദിവസങ്ങളില്‍ ശക്തമായ സമരങ്ങള്‍ക്ക് നേതൃത്വം നല്‍കുമെന്ന് കര്‍മസമിതി ഭാരവാഹികള്‍ പറഞ്ഞു.