തിരുവനന്തപുരം: വരാനിരിക്കുന്ന നിയമസഭാ തിരഞ്ഞെടുപ്പില്‍ കോണ്‍ഗ്രസിനുള്ളില്‍ മുഖ്യമന്ത്രി സ്ഥാനത്തിനായി യാതൊരുവിധ തര്‍ക്കങ്ങളോ കലഹങ്ങളോ ഉണ്ടാവില്ലെന്ന് പ്രതിപക്ഷ നേതാവ് വി.ഡി സതീശന്‍. എഐസിസിയുടെ നിശ്ചിത മാനദണ്ഡങ്ങള്‍ അനുസരിച്ചായിരിക്കും മുഖ്യമന്ത്രിയെ തീരുമാനിക്കുകയെന്നും ഒരു വ്യക്തിയെ ഉയര്‍ത്തിക്കാട്ടിയല്ല കോണ്‍ഗ്രസ് തിരഞ്ഞെടുപ്പിനെ നേരിടുന്നതെന്നും അദ്ദേഹം വ്യക്തമാക്കി.

നാമനിര്‍ദേശ പത്രിക സമര്‍പ്പിച്ച ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം. കൂട്ടായ നേതൃത്വം- സിപിഎമ്മില്‍ പിണറായി വിജയനെ ചോദ്യം ചെയ്യാന്‍ ആരുമില്ലാത്ത അവസ്ഥയാണ്. എന്നാല്‍ കോണ്‍ഗ്രസില്‍ കെ.സി. വേണുഗോപാലും രമേശ് ചെന്നിത്തലയുമായി പൂര്‍ണ ധാരണയിലാണെന്നും കൂട്ടായ തീരുമാനങ്ങളിലൂടെയാണ് മുന്നോട്ട് പോകുന്നതെന്നും സതീശന്‍ പറഞ്ഞു.

ഉമ്മന്‍ചാണ്ടി മന്ത്രിസഭയില്‍ അംഗമാകാന്‍ ആഗ്രഹിച്ചിരുന്നെങ്കിലും അത് നടക്കാത്തതില്‍ അന്ന് വിഷമമുണ്ടായിരുന്നു. എന്നാല്‍ ഇന്ന് ലഭിച്ച പദവികളില്‍ താന്‍ പൂര്‍ണ്ണ സംതൃപ്തനാണ്. അവസരങ്ങള്‍ ലഭിക്കാത്ത ഒരുപാട് പേര്‍ പാര്‍ട്ടിയിലുണ്ടെന്നും അദ്ദേഹം ഓര്‍മ്മിപ്പിച്ചു.

മുഖ്യമന്ത്രി പിണറായി വിജയന്‍ പരിണിതപ്രജ്ഞനായ നേതാവാണ്. അദ്ദേഹത്തിന്റെ ശൈലിയോടും നയത്തോടും മാത്രമാണ് തനിക്ക് എതിര്‍പ്പുള്ളതെന്നും വ്യക്തിപരമായ വിരോധമില്ലെന്നും അദ്ദേഹം കൂട്ടിച്ചേര്‍ത്തു.

രണ്ട് സെറ്റ് നാമനിര്‍ദേശ പത്രികകളാണ് വി.ഡി സതീശന്‍ സമര്‍പ്പിച്ചത്. പ്ലാച്ചിമട സമര സമിതി നല്‍കിയ തുകയാണ് അദ്ദേഹം കെട്ടിവച്ചത്. യുഡിഎഫ് അധികാരത്തിലെത്തിയാല്‍ പ്ലാച്ചിമടയിലെ പ്രശ്‌നങ്ങള്‍ക്ക് ശാശ്വത പരിഹാരം കാണുമെന്ന് അദ്ദേഹം ഉറപ്പ് നല്‍കി. അവിടുത്തെ സാധാരണക്കാര്‍ നല്‍കിയ സ്‌നേഹവും പിന്തുണയും ഹൃദയപൂര്‍വ്വം സ്വീകരിക്കുന്നുവെന്നും അദ്ദേഹം പറഞ്ഞു.

Opposition Leader V.D. Satheesan clarified that the Congress party is fighting the elections under a collective leadership without any internal disputes over the CM post, while promising a permanent solution for Plachimada after filing his nomination with funds provided by local activists.