ബൊഗോട്ട: തെക്കന്‍ കൊളംബിയയില്‍ സൈനിക വിമാനം തകര്‍ന്നു വീണു.  125 യാത്രക്കാരുമായി പറന്നുയര്‍ന്ന സി-130 ഹെര്‍ക്കുലീസ് വിമാനമാണ് തകര്‍ന്നു വീണത്. അപകടത്തില്‍ 66 പേര്‍ മരിച്ചതായി ഔദ്യോഗിക വൃത്തങ്ങള്‍ അറിയിച്ചു. നിരവധിയാളുകള്‍ക്ക് പരുക്കേറ്റിട്ടുണ്ട്. 

ഇക്വഡോര്‍, പെറു അതിര്‍ത്തിക്കടുത്തുള്ള പുര്‍ട്ടോ ലെഗുയിസാമോയില്‍ നിന്ന് പറന്നുയര്‍ന്ന ഉടനെയാണ് വിമാനം തകര്‍ന്നു വീണത്. കൊല്ലപ്പെട്ടവരില്‍ 58 സൈനികരും ആറ് വ്യോമസേനാ ഉദ്യോഗസ്ഥരും രണ്ട് പൊലിസ് ഉദ്യോഗസ്ഥരുമാണുള്ളത്. ബാക്കിയുള്ളവര്‍ക്കായി തെരച്ചില്‍ തുടരുകയാണ്.

ALSO READ: ഇറാന്‍ വൈദ്യുത നിലയങ്ങള്‍ക്ക് നേരെ ഇസ്‌റാഈല്‍-യു.എസ് ആക്രമണം; നീക്കം ട്രംപിന്റെ 'സമാധാന പ്രഖ്യാപന'ത്തിന് പിന്നാലെ?  

ആകാശത്ത് വെച്ച് വലിയ സ്‌ഫോടന ശബ്ദം കേട്ടതായും പിന്നാലെ വിമാനം തകര്‍ന്നു വീണതായും പ്രദേശവാസികള്‍ പറഞ്ഞു. കത്തുന്ന അവശിഷ്ടങ്ങള്‍ക്കിടയിലൂടെ നാട്ടുകാര്‍ രക്ഷാപ്രവര്‍ത്തനത്തിന് ശ്രമിക്കുന്ന ദൃശ്യങ്ങള്‍ പുറത്തുവന്നിട്ടുണ്ട്.

വിമാനം പറന്നുയര്‍ന്ന സ്ഥലത്ത് നിന്ന് വെറും 1.5 കിലോമീറ്റര്‍ (0.9 മൈല്‍) അകലെ നിലത്ത് ഇടിക്കുകയും പൊട്ടിത്തെറിക്കുകയും വിമാനം കത്തികയും ചെയ്യുകയായിരുന്നുവെന്ന് പ്രതിരോധ മന്ത്രി പെഡ്രോ സാഞ്ചസ് പറഞ്ഞു.  അതേസമയം, നിയമവിരുദ്ധ സായുധ ആക്രമണമാവാന്‍ സാധ്യതയില്ലെന്നും അപകടമാണെന്നും സാഞ്ചസ് കൂട്ടിച്ചേര്‍ത്തു.
 
സംഭവത്തില്‍ കൊളംബിയന്‍ പ്രസിഡന്റ് ഗുസ്താവോ പെട്രോ ദുഖം രേഖപ്പെടുത്തി. വിമാനം ഉയരാന്‍ ശ്രമിക്കുന്നതിനിടെ പെട്ടെന്ന് താഴേക്ക് പതിക്കുന്നതിന്റെ ദൃശ്യങ്ങള്‍ പ്രസിഡന്റ് പങ്കുവെച്ചു. രാജ്യത്തെ സൈനിക സന്നാഹങ്ങള്‍ ആധുനികവല്‍ക്കരിക്കേണ്ടതിന്റെ ആവശ്യകതയിലേക്കാണ് ഈ അപകടം വിരല്‍ ചൂണ്ടുന്നതെന്നും അദ്ദേഹം കൂട്ടിച്ചേര്‍ത്തു.

രക്ഷാപ്രവര്‍ത്തനം പുരോഗമിക്കുകയാണ്. വിമാനം തകര്‍ന്നു വീണത് വനമേഖലായതിനാല്‍ രക്ഷാപ്രവര്‍ത്തനത്തിന് അതീവ വെല്ലുവിളിയാണ് നേരിടുന്നത്. വിമാനത്തിന്റെ അവശിഷ്ടങ്ങള്‍ വനത്തിലുടനീളം ചിതറിക്കിടക്കുകയാണ്. ഡ്രഗ് കാര്‍ട്ടലുകളുടെയും സായുധ സംഘങ്ങളുടെയും സ്വാധീനമേഖലയായതിനാല്‍ കനത്ത സുരക്ഷാ ഭീഷണിക്കിടയിലാണ് രക്ഷാപ്രവര്‍ത്തകര്‍ മുന്നോട്ട് പോകുന്നത്.

കഴിഞ്ഞ ഒരു മാസത്തിനിടെ തെക്കേ അമേരിക്കയില്‍ സംഭവിക്കുന്ന രണ്ടാമത്തെ സി-130 ഹെര്‍ക്കുലീസ് അപകടമാണിത്. ഫെബ്രുവരി 27ന് ബൊളീവിയയില്‍ സമാനമായ അപകടത്തില്‍ 24 പേര്‍ മരണപ്പെട്ടിരുന്നു. 

a military aircraft crash in colombia has left at least 66 people dead and several others injured, with rescue operations ongoing