ന്യൂഡല്‍ഹി: മതപരിവര്‍ത്തനത്തിന് ശേഷം പട്ടികജാതി പദവി നല്‍കില്ലെന്ന് സുപ്രിം കോടതി ഉത്തരവ്. ക്രിസ്തുമതത്തിലേക്ക് പരിവര്‍ത്തനം ചെയ്യുകയും ആ മതം സജീവമായി ആചരിക്കുന്ന ഒരാള്‍ക്ക് പട്ടികജാതി സമൂഹത്തില്‍ അംഗമായി തുടരാന്‍ കഴിയില്ലെന്ന് ആന്ധ്രാപ്രദേശ് ഹൈക്കോടതി പുറപ്പെടുവിച്ച ഉത്തരവ് സുപ്രിം കോടതി ശരിവച്ചു. മതപരിവര്‍ത്തനം നടത്തിയാല്‍ പട്ടികജാതി ആനുകൂല്യങ്ങള്‍ ലഭിക്കില്ലെന്നും കോടതി ചൂണ്ടിക്കാട്ടി. 

ഹിന്ദു, സിഖ്, ബുദ്ധ മതസ്ഥര്‍ക്ക് മാത്രമാണ് പട്ടിക ജാതി പദവി ലഭിക്കുകയെന്നും കോടതി ചൂണ്ടിക്കാട്ടി. മറ്റു മതങ്ങളിലേക്ക് മാറിയാല്‍ സംവരണവും ആനുകൂല്യവും പട്ടിക ജാതി അതിക്രമം തടയല്‍ നിയമത്തിന്റെ പരിരക്ഷയും നഷ്ടപ്പെടും- സുപ്രിം കോടതി വ്യക്തമാക്കി. പരിവര്‍ത്തനം ചെയ്താല്‍ ജനനം പരിഗണിക്കാതെ പട്ടികജാതി പദവി നഷ്ടപ്പെടും. 1950-ലെ ഭരണഘടന (പട്ടികജാതി) ഉത്തരവില്‍ ഇക്കാര്യം വ്യക്തമാക്കുന്നതായും ജസ്റ്റിസുമാരായ പി.കെ.മിശ്ര, എന്‍.വി. അഞ്ജരിയ എന്നിവരടങ്ങിയ ബെഞ്ച് കൂട്ടിച്ചേര്‍ത്തു.

ALSO READ: വീണ്ടും സംഘ്പരിവാർ അജണ്ടയുമായി ജമ്മു സർവകലാശാല; ജിന്ന, സർ സയ്യിദ്, അല്ലാമാ ഇഖ്ബാൽ എന്നിവരെ സിലബസിൽനിന്ന് നീക്കുന്നു

''ഭരണഘടന പ്രകാരമോ പാര്‍ലമെന്റ് നിയമനിര്‍മ്മാണത്തിലൂടെയോ സംസ്ഥാന നിയമസഭയുടെയോ നിയമനിര്‍മ്മാണത്തിലൂടെയോ ഉള്ള നിയമപരമായ ആനുകൂല്യങ്ങളോ സംരക്ഷണമോ സംവരണമോ അവകാശമോ അവകാശപ്പെടാനോ വ്യാപിപ്പിക്കാനോ പിന്നിട് കഴിയില്ല. ക്ലോസ് 3 ല്‍ വ്യക്തമാക്കിയിട്ടുള്ള മതം ഒഴികെയുള്ള ഒരു മതം ഒരേസമയം ആചരിക്കാനും പട്ടികജാതി അംഗത്വം അവകാശപ്പെടാനും ഒരു വ്യക്തിക്ക് കഴിയില്ല'' കോടതി ഉത്തരവില്‍ പറയുന്നു.

ക്രിസ്തുമതത്തിലേക്ക് പരിവര്‍ത്തനം ചെയ്ത് ആന്ധ്ര സ്വദേശി ചിന്താട ആനന്ദ് എന്ന പാസ്റ്റര്‍ നല്‍കിയ അപ്പീല്‍ കോടതി തീര്‍പ്പാക്കി. പാസ്റ്ററായ തന്നെ ആക്രമിച്ചവര്‍ക്കെതിരെ പട്ടികജാതി, പട്ടികവര്‍ഗ (അതിക്രമങ്ങള്‍ തടയല്‍) നിയമപ്രകാരം ആനന്ദ് കേസ് നല്‍കിയിരുന്നു. മതം മാറിയതിനാല്‍ ഈ വകുപ്പ് നിലനില്‍ക്കില്ലെന്നായിരുന്നു ആന്ധ്ര ഹൈക്കോടതി ഉത്തരവ്. ഇതിനെതിരെ പാസ്റ്റര്‍ ഒരു പ്രത്യേക ഹരജി ഫയല്‍ ചെയ്തിരുന്നു.ഇതിലാണ് സുപ്രിം കോടതിയുടെ നിരീക്ഷണം വന്നിരിക്കുന്നത്. 

the supreme court of india has ruled that individuals who convert to christianity cannot continue to claim scheduled caste status and related benefits