യുനൈറ്റഡ് നാഷന്‍സ്:  ഫലസ്തീനില്‍ ഇസ്‌റാഈല്‍ തുടരുന്ന മനുഷ്യക്കുരുതിയില്‍ രൂക്ഷപ്രതികരണവുമായി യു.എന്‍ പ്രത്യേക റിപ്പോര്‍ട്ടര്‍. ഫലസ്തീനികളെ പീഡിപ്പിക്കാനുള്ള ലൈസന്‍സ് നല്‍കിയിരിക്കുകയാണ് ലോകമെന്ന് യു.എന്‍ പ്രത്യേക റിപ്പോര്‍ട്ടര്‍ ഫ്രാന്‍സിക അല്‍ബനീസ് തുറന്നടിച്ചു. 
 'പീഡനം ഇസ്‌റാഈലില്‍ ഫലത്തില്‍ ഒരു സംസ്ഥാന നയമായി മാറിയിരിക്കുന്നു'1967 മുതല്‍ അധിനിവേശ ഫലസ്തീന്‍ പ്രദേശത്തെ അവകാശങ്ങളെക്കുറിച്ചുള്ള യുഎന്നിന്റെ പ്രത്യേക റിപ്പോര്‍ട്ടര്‍ ഫ്രാന്‍സെസ്‌ക അല്‍ബനീസ് തിങ്കളാഴ്ച ചൂണ്ടിക്കാട്ടി.

'ഫലസ്തീനികളെ പീഡിപ്പിക്കാന്‍ ഇസ്‌റാഈലിന് ലൈസന്‍സ് നല്‍കിയിരിക്കുകയാണ്. കാരണം നിങ്ങളുടെ മിക്ക സര്‍ക്കാരുകളും മന്ത്രിമാരും അത് അനുവദിച്ചിട്ടുണ്ട്,'' യുഎന്‍ മനുഷ്യാവകാശ കൗണ്‍സിലില്‍ തന്റെ പുതിയ റിപ്പോര്‍ട്ട് അവതരിപ്പിച്ചുകൊണ്ടായിരുന്നു അവരുടെ പ്രതികരണം.  

''ഒരുകാലത്ത് നിഴലില്‍ പ്രവര്‍ത്തിച്ചിരുന്നത് ഇപ്പോള്‍ പരസ്യമായി നടപ്പിലാക്കപ്പെടുന്നു. ''പീഡനത്തിന്റെയും വംശഹത്യയുടെയും'' എന്ന തലക്കെട്ടിലുള്ള റിപ്പോര്‍ട്ടില്‍ അല്‍ബനീസ് പറഞ്ഞു.

''പീഡനം സെല്ലുകളിലും ചോദ്യം ചെയ്യല്‍ മുറികളിലും ഒതുങ്ങുന്നില്ല,'' റിപ്പോര്‍ട്ട് വിശദീകരിക്കുന്നു.

''കൂട്ട കുടിയിറക്കം, ഉപരോധം, സഹായവും ഭക്ഷണവും നിഷേധിക്കല്‍, അനിയന്ത്രിതമായ സൈനിക, കുടിയേറ്റ അക്രമം, വ്യാപകമായ നിരീക്ഷണം, ഭീകരത തുടങ്ങി അധിനിവേശ ഫലസ്തീന്‍ പ്രദേശം കൂട്ട ശിക്ഷയുടെ ഒരു ഇടമായി മാറിയിരിക്കുന്നു. റിപ്പോര്‍ട്ട് കൂട്ടിച്ചേര്‍ത്തു.

അധിനിവേശ വെസ്റ്റ് ബാങ്കിലെ ഇസ്‌റാഈലിന്റെ നടപടിയുടേയും ഗസ്സ വംശഹത്യയുടേയും തുറന്ന വിമര്‍ശകയായ അല്‍ബനീസ്, ഇസ്‌റാഈലില്‍ നിന്നും അമേരിക്കയില്‍ നിന്നും എതിര്‍പ്പ് നേരിട്ടുണ്ട്. പ്രത്യേക റിപ്പോര്‍ട്ടര്‍ സ്ഥാനത്ത് നിന്ന് അവരെ നീക്കം ചെയ്യണമെന്ന ആവശ്യം വര്‍ദ്ധിച്ചുവരികയാണ്.

ഗസ്സയിലെ ആരോഗ്യ മന്ത്രാലയം പറയുന്നതനുസരിച്ച്, 2023 ഒക്ടോബര്‍ 7 മുതല്‍, ഇസ്‌റആഈ ആക്രമണങ്ങളില്‍ കുറഞ്ഞത് 72,263 പേര്‍ കൊല്ലപ്പെടുകയും 171,944 പേര്‍ക്ക് പരിക്കേല്‍ക്കുകയും ചെയ്തിട്ടുണ്ട്.

2023 ഒക്ടോബര്‍ മുതല്‍ അധിനിവേശ വെസ്റ്റ് ബാങ്കില്‍, ഫെബ്രുവരി വരെ കുറഞ്ഞത് 1,500 കുട്ടികള്‍ ഉള്‍പ്പെടെ 18,500-ലധികം ഫലസ്തീനികളെ ഇസ്‌റാഈല്‍ അധികൃതര്‍ അറസ്റ്റ് ചെയ്തതായി റിപ്പോര്‍ട്ട് കണ്ടെത്തി.

പീഡനങ്ങളും വംശഹത്യകളും 'തടയാനും ശിക്ഷിക്കാനും' ഐക്യരാഷ്ട്രസഭയിലെ അംഗരാജ്യങ്ങളോട് അല്‍ബനീസ് ആഹ്വാനം ചെയ്തു. അന്താരാഷ്ട്ര നിയമം ഉയര്‍ത്തിപ്പിടിക്കാനും അവര്‍ ആവശ്യപ്പെട്ടു.

ഗസ്സയില്‍ മൂന്ന് പൊലിസുകാര്‍ ഉള്‍പ്പെടെ നാല് മരണം
ഗസ്സ: ഇറാനില്‍നിന്ന് കനത്ത തിരിച്ചടി നേരിടുന്ന ഇസ്റാഈല്‍ വീണ്ടും ഗസ്സയില്‍ ആക്രമണം ശക്തിപ്പെടുത്തുന്നു. ഗസ്സയില്‍ കഴിഞ്ഞ ദിവസം നടന്ന വ്യോമാക്രമണത്തില്‍ മൂന്ന് പൊലിസുകാര്‍ ഉള്‍പ്പെടെ നാലു പേര്‍ കൊല്ലപ്പെട്ടു.  മധ്യ ഗസ്സയിലെ നുസൈറത്ത് അഭയാര്‍ഥി ക്യാംപിനു സമീപത്തെ പൊലിസ് വാഹനത്തിനു മേല്‍ ബോംബ് വീഴുകയായിരുന്നു. 10 പേര്‍ക്ക് ആക്രമണത്തില്‍ പരുക്കേറ്റിട്ടുണ്ട്.

വടക്കന്‍ ഗസ്സയിലെ ഷെയ്ഖ് റദ്വാനിലും വ്യോമാക്രമണമുണ്ടായി. ഇവിടെ ഫതഹ് ഗ്രൂപ്പിന്റെ മുതിര്‍ന്ന അംഗമാണ് കൊല്ലപ്പെട്ടത്. ആക്രമണത്തെ കുറിച്ച് ഇസ്റാഈല്‍ പ്രതികരിച്ചിട്ടില്ല. 2025 ഒക്ടോബര്‍ 10 ന് വെടിനിര്‍ത്തല്‍ പ്രഖ്യാപിച്ച ശേഷം ഇസ്റാഈല്‍ നടത്തിയ വ്യോമാക്രമണത്തില്‍ ഇതുവരെ 680 പേര്‍ കൊല്ലപ്പെട്ടിട്ടുണ്ട്. ഈ കാലയളവില്‍ നാലു ഇസ്റാഈല്‍ സൈനികരും കൊല്ലപ്പെട്ടിട്ടുണ്ട്. 

a united nations special rapporteur has strongly criticized global inaction, alleging it has effectively allowed israel to carry out attacks against palestine