ജിദ്ദ: സഊദിയുടെ മിക്ക പ്രദേശങ്ങളിലും ഇന്നത്തോടെ മഴ ശക്തമാകുമെന്ന് ദേശീയ കാലാവസ്ഥാ കേന്ദ്രം (എൻ.സി.എം) അറിയിച്ചു. രാജ്യത്ത് ഒറ്റപ്പെട്ടയിടങ്ങളിൽ മിതമായതോ അതിശക്തമായതോ ആയ മഴയ്ക്ക് സാധ്യതയുണ്ട്. 

കിഴക്കൻ പ്രവിശ്യ, മക്ക, മദീന, അൽ-ബാഹ, അസീർ തുടങ്ങിയ പ്രദേശങ്ങളിൽ മഴ കനക്കും. ഇതിനൊപ്പം പൊടിക്കാറ്റിനും ആലിപ്പഴ വീഴ്ചയ്ക്കും സാധ്യതയുണ്ടെന്നും കാലാവസ്ഥാ കേന്ദ്രം വ്യക്തമാക്കി. അതേസമയം, വരും ദിവസങ്ങളിൽ സഊദിയിൽ ചുഴലിക്കാറ്റിന് സാധ്യതയുണ്ടെന്ന രീതിയിൽ പ്രചരിക്കുന്ന വാർത്തകൾ എൻ.സി.എം നിഷേധിച്ചു. ഔദ്യോഗിക വിവരങ്ങളെ മാത്രം ആശ്രയിക്കണമെന്നും സുരക്ഷാ നിർദേശങ്ങൾ പാലിക്കണമെന്നും അധികൃതർ പൊതുജനങ്ങളോട് അഭ്യർത്ഥിച്ചു.

ഈ മാസം 28 വരെ വിവിധ പ്രദേശങ്ങളിൽ ഇടിമിന്നലോടു കൂടിയ മഴ തുടരുമെന്നാണ് പ്രവചനം. തബൂക്ക്, അൽ-ജൗഫ്, ഹായിൽ, വടക്കൻ അതിർത്തി പ്രദേശങ്ങൾ, മദീനയുടെ ചില ഭാഗങ്ങൾ എന്നിവിടങ്ങളിൽ ബുധനാഴ്ച വൈകുന്നേരം മുതൽ വ്യാഴാഴ്ച വരെ മിതമായതോ ശക്തമായതോ ആയ മഴ ലഭിച്ചേക്കും.

ജിദ്ദ, റാബിഗ്, ത്വാഇഫ് എന്നിവയുൾപ്പെടുന്ന മക്ക പ്രവിശ്യയിൽ നിലവിലുള്ള മഴ ഇന്നത്തോടെ കനക്കും. ചിലയിടങ്ങളിൽ മഴ അതിശക്തമാകാനും സാധ്യതയുണ്ട്. അൽ-ബാഹ, അസീർ, ജീസാൻ എന്നിവിടങ്ങളിൽ വ്യാഴം, വെള്ളി ദിവസങ്ങളിൽ മഴ ശക്തമാകും. നജ്‌റാനിലും ഇതേ സമയത്ത് ഭേദപ്പെട്ട മഴയ്ക്ക് സാധ്യതയുണ്ട്.

റിയാദ് പ്രവിശ്യയിൽ നേരിയ തോതിൽ തുടങ്ങുന്ന മഴ വാരാന്ത്യത്തോടെ, പ്രത്യേകിച്ച് തെക്ക്, പടിഞ്ഞാറൻ ഭാഗങ്ങളിൽ ശക്തമാകും. അൽ-ഖസീം, കിഴക്കൻ പ്രവിശ്യ എന്നിവിടങ്ങളിലും, പ്രത്യേകിച്ച് ബുധൻ, വ്യാഴം ദിവസങ്ങളിൽ കനത്ത മഴ പ്രതീക്ഷിക്കുന്നുണ്ട്.

മണിക്കൂറിൽ 60 കിലോമീറ്ററിലധികം വേഗതയുള്ള ശക്തമായ കാറ്റ്, പെട്ടെന്നുള്ള വെള്ളപ്പൊക്കം, ആലിപ്പഴ വീഴ്ച, തീരപ്രദേശങ്ങളിൽ ഉയർന്ന തിരമാലകൾ എന്നിവയ്ക്കും ചിലയിടങ്ങളിൽ ചുഴലിക്കാറ്റ് (ടൊർണാഡോ) രൂപപ്പെടാനും സാധ്യതയുള്ളതിനാൽ കർശന ജാഗ്രത പാലിക്കണമെന്ന് റിപ്പോർട്ടിൽ മുന്നറിയിപ്പുണ്ട്.

English summary : The Saudi National Center for Meteorology (NCM) said Wednesday that rainfall will peak on Thursday, with moderate to heavy showers expected across most regions of the Kingdom.

The center said conditions will intensify in parts of the Eastern Province, Makkah, Madinah, Al-Baha and Asir, accompanied by strong surface winds that may raise dust and sand, along with a chance of hail.