ധാക്ക: ബംഗ്ലാദേശിലെ ദൗലത്ത്ദിയ ഫെറി ടെർമിനലിന് സമീപം നിയന്ത്രണം വിട്ട ബസ് പത്മ നദിയിലേക്ക് മറിഞ്ഞ് 23 പേർ മരിച്ചു. ബുധനാഴ്ച വൈകുന്നേരമായിരുന്നു സംഭവം. ഫെറിയിലേക്ക് കയറാൻ ശ്രമിക്കുന്നതിനിടെ ബസിന്റെ നിയന്ത്രണം നഷ്ടപ്പെട്ടതാകാം അപകടത്തിന് കാരണമെന്നാണ് പ്രാഥമിക നി​ഗമനം.

50ഓളം യാത്രക്കാരാണ് അപകടസമയത്ത് ബസിലുണ്ടായിരുന്നത്. ഇതിൽ 23 പേരുടെ മൃതദേഹങ്ങൾ കണ്ടെടുത്തിട്ടുണ്ട്. പ്രതികൂല സാഹചര്യങ്ങൾ മൂലം രാത്രി നിർത്തിവെച്ച രക്ഷാപ്രവർത്തനം വ്യാഴാഴ്ച രാവിലെ പുനരാരംഭിച്ചിട്ടുണ്ട്. ഫയർ സർവീസ്, നേവി, പൊലിസ് എന്നിവരുടെ സംയുക്ത നേതൃത്വത്തിൽ കാണാതായവർക്കായി തിരച്ചിൽ നടക്കുകയാണ്.

ALSO READ: പവര്‍കട്ടും ലോഡ് ഷെഡിങ്ങും ഇല്ലാത്ത പത്ത് വര്‍ഷങ്ങള്‍, പി.ആർ വർക്കിന് വൈദ്യുതി ബില്ലും; സർക്കാരിനെതിരേ പരാതിയുമായി സേവ് യൂണിവേഴ്സിറ്റി കാംപയിന്‍ കമ്മിറ്റി

ആറ് മണിക്കൂർ നീണ്ട കഠിന പരിശ്രമത്തിനൊടുവിലാണ് നദിയിൽ മുങ്ങിയ ബസ് 'ഹംസ' എന്ന രക്ഷാകപ്പലിന്റെ സഹായത്തോടെ കരയ്ക്കടുപ്പിച്ചത്. ക്രെയിൻ ഉപയോഗിച്ച് രാത്രി 11.30ഓടെ ബസ് പൂർണ്ണമായും പുറത്തെടുത്തു. 

സംഭവത്തിൽ ബം​ഗ്ലാദേശ് പ്രധാനമന്ത്രി താരിഖ് റഹ്മാൻ അന്വേഷണത്തിന് ഉത്തരവിട്ടിട്ടുണ്ട്. ഫെറി സർവിസുകളിലെയും പൊതുഗതാഗത സംവിധാനങ്ങളിലെയും സുരക്ഷാ വീഴ്ചകളെക്കുറിച്ച് ആശങ്കകളുയർത്തുന്നതാണ് ഈ അപകടം. അതേസമയം, വരും ദിവസങ്ങളിൽ സുരക്ഷാ മാനദണ്ഡങ്ങൾ കർശനമാക്കാൻ പ്രാദേശിക ഭരണകൂടത്തിന് നിർദ്ദേശം നൽകിയിട്ടുണ്ട്.