2026 ഐപിഎല്ലിൽ സൺറൈസേഴ്‌സ് ഹൈദരാബാദിനെ വീഴ്ത്തി നിലവിലെ ചാമ്പ്യന്മാരായ റോയൽ ചലഞ്ചേഴ്‌സ് ബെംഗളൂരു വരവറിയിച്ചിരിക്കുകയാണ്. ആർസിബിയുടെ ഹോം ഗ്രൗണ്ടായ ചിന്നസ്വാമി സ്റ്റേഡിയത്തിൽ കഴിഞ്ഞ ദിവസം നടന്ന മത്സരത്തിൽ ഹൈദരാബാദിനെ ആറ് വിക്കറ്റുകൾക്കാണ് ആർസിബി കീഴടക്കിയത്. മത്സരത്തിൽ ആദ്യം ബാറ്റ് ചെയ്ത ഹൈദരാബാദ് 20 ഓവറിൽ ഒമ്പത് വിക്കറ്റ് നഷ്ടത്തിൽ 201 റൺസാണ് നേടിയത്. മറുപടി ബാറ്റിങ്ങിനിറങ്ങിയ ആർസിബി നാല് വിക്കറ്റുകളും 26 പന്തുകളും ബാക്കി നിൽക്കെ ലക്ഷ്യം മറികടന്നു.  

ദേവദത്ത് പടിക്കലിന്റെയും വിരാട് കോഹ്‌ലിയുടെയും അർദ്ധ സെഞ്ച്വറിയുടെ കരുത്തിലാണ് ആർസിബി ജയിച്ചു കയറിയത്. 38 പന്തിൽ പുറത്താവാതെ 69 റൺസാണ് കോഹ്‌ലി നേടിയത്. അഞ്ചു വീതം ഫോറുകളും സിക്സുകളും അടങ്ങുന്നതാണ് കോഹ്‌ലിയുടെ ഇന്നിംഗ്സ്. പടിക്കൽ 26 പന്തിൽ ഏഴു ഫോറുകളും നാല് സിക്സുകളും അടക്കം 61 റൺസും നേടി വിജയത്തിൽ നിർണായകമായി. ക്യാപ്റ്റൻ രജത് പടിതാർ 12 പന്തിൽ 31 റൺസും നേടി വിജയത്തിലെത്തിച്ചു. 

മത്സരശേഷം ആർസിബിക്കായി ബാറ്റിങ്ങിൽ മിന്നും പ്രകടനം കാഴ്ചവെച്ച കോഹ്‌ലിയെ പ്രശംസിച്ചുകൊണ്ട് ക്യാപ്റ്റൻ പടിതാർ സംസാരിക്കുകയും ചെയ്തു. ലോകത്തിലെ ഒന്നാം നമ്പർ ബാറ്റർ എന്നാണ് കോഹ്‌ലിയെ പടിതാർ വിശേഷിപ്പിച്ചത്. 

"വിരാട് കോഹ്‌ലിയെക്കുറിച്ച് പറയാൻ വാക്കുകളില്ല. അദ്ദേഹം ലോകത്തിലെ നമ്പർ വൺ ബാറ്ററാണ്. അദ്ദേഹം കളിക്കളത്തിൽ ഇറങ്ങുമ്പോഴും ടീം ചെയ്‌സ് ചെയ്യുമ്പോഴും അദ്ദേഹം ഒന്നാം നമ്പർ താരമാണ്. റൺ ചെയ്‌സിങ്ങിൽ അദ്ദേഹം അവസാനം വരെ ഉണ്ടായിരുന്നു" രജത് പടിതാർ പറഞ്ഞു. 

ഏപ്രിൽ അഞ്ചിന് ചെന്നൈ സൂപ്പർ കിങ്സിനെതിരെയാണ് ചെന്നൈയുടെ അടുത്ത മത്സരം. അതേസമയം ഏപ്രിൽ രണ്ടിന് നടക്കുന്ന മത്സരത്തിൽ കൊൽക്കത്ത നൈറ്റ് റൈഡേഴ്‌സ് ആണ് ഇഷാൻ കിഷന്റെയും സംഘത്തിന്റെയും എതിരാളികൾ.