രാജസ്ഥാൻ റോയൽസ് യുവതാരം വൈഭവ് സൂര്യവംശിയെ പ്രശംസിച്ച് മുൻ ഇന്ത്യൻ താരം നവ്‌ജ്യോത് സിങ് സിദ്ധു. അരങ്ങേറ്റ മത്സരത്തിൽ നേരിട്ട ആദ്യ പന്തിൽ തന്നെ വൈഭവ് സിക്സർ നേടിയെന്നാണ് നവ്‌ജ്യോത് സിങ് സിദ്ധു പറഞ്ഞത്. ഇന്ത്യൻ ഇതിഹാസം സച്ചിൻ ടെണ്ടുൽക്കർ പോലും ഈ കാര്യം ചെയ്തിട്ടില്ലെന്നും മുൻ ഇന്ത്യൻ താരം വ്യക്തമാക്കി. സ്റ്റാർ സ്പോർട്സിലൂടെ സംസാരിക്കുകയായിരുന്നു മുൻ ഇന്ത്യൻ താരം.  

''വൈഭവ് സൂര്യവംശി അരങ്ങേറ്റ മത്സരത്തിൽ തന്നെ ആദ്യ പന്തിൽ സിക്സർ നേടി. സച്ചിന് പോലും ഇങ്ങനെ ചെയ്യാൻ സാധിച്ചിട്ടില്ല. ആരും തന്നെ അത് ചെയ്യുന്നത് ഞാൻ കണ്ടിട്ടില്ല. ഞാൻ വൈഭവിന്റെ സംഭാഷണം കേട്ടിരുന്നു. വൈഭവ് തന്റെ അരങ്ങേറ്റ മത്സരത്തിൽ ആദ്യ പന്തിൽ സിക്സർ നേടിയത്  അത്ഭുതപ്പെടുത്തി. അവൻ ഭയമില്ലാത്ത താരമാണ്. സെവാഗും ഭയമില്ലാത്തവനായിരുന്നു. തന്റെ വിക്കറ്റിനെക്കുറിച്ച് അദ്ദേഹം ഒരിക്കലും ചിന്തിരിച്ചിരുന്നില്ല. ഇന്നിങ്സിലെ ആദ്യ പന്ത് മുതൽ അദ്ദേഹം മികച്ച രീതിയിൽ കളിക്കുമായിരുന്നു'' നവ്‌ജ്യോത് സിങ് സിദ്ധു പറഞ്ഞു. 

കഴിഞ്ഞ സീസണിൽ രാജസ്ഥാൻ റോയൽസിനായി നടത്തിയ മിന്നും പ്രകടനങ്ങൾക്ക് പിന്നാലെയാണ്  വൈഭവ് എന്ന പേര് ക്രിക്കറ്റ് ലോകത്തിൽ ചർച്ചയായത്. 2025 ഐപിഎല്ലിലെ സൂപ്പർ സ്ട്രൈക്കർ അവാർഡ് സ്വന്തമാക്കിയത് വൈഭവ് സൂര്യവംശിയായിരുന്നു. രാജസ്ഥനായി ഏഴ് മത്സരങ്ങളിൽ നിന്നും ഒരു സെഞ്ച്വറിയും ഒരു അർദ്ധ സെഞ്ച്വറിയും ഉൾപ്പെടെ 252 റൺസാണ് നേടിയത്. പുതിയ ഐപിഎൽ സീസൺ കൂടി ആരംഭിച്ചിരിക്കുമ്പോൾ വീണ്ടും വൈഭവിന്റെ ബാറ്റിൽ നിന്നും മിന്നും പ്രകടനങ്ങൾ പിറക്കുമോയെന്ന് കണ്ടുതന്നെ അറിയണം.