ടെല്‍അവീവ്: ഇസ്‌റാഈലിന് നേരെ ഇറാന്‍ നടത്തുന്ന മിസൈല്‍ ആക്രമണങ്ങള്‍ ശക്തമാകുന്നു. കഴിഞ്ഞ 24 മണിക്കൂറിനുള്ളില്‍ ഏകദേശം 20 ബാലിസ്റ്റിക് മിസൈലുകള്‍ ഇറാന്‍ തൊടുത്തു വിട്ടതായാണ് റിപോര്‍ട്ടുകള്‍. ഇറാന് പുറമെ യെമനിലെ ഹൂതികളും ലബനനിലെ ഹിസ്ബുല്ലയും ഇസ്‌റാഈലിനെ ലക്ഷ്യമിട്ട് ഡ്രോണ്‍-മിസൈല്‍ ആക്രമണങ്ങള്‍ തുടരുന്നത് മേഖലയിലെ സംഘര്‍ഷം അതിരൂക്ഷമാക്കിയിരിക്കുകയാണ്.

യുഎസ് പ്രസിഡന്റ് ഡൊണാള്‍ഡ് ട്രംപിന്റെ പ്രസ്താവനയ്ക്ക് പിന്നാലെ ആക്രമണത്തിന്റെ തീവ്രത വര്‍ധിച്ചതായി ഇസ്‌റാഈല്‍ പ്രതിരോധ സേന അറിയിച്ചു. അപ്പര്‍ ഗലീലി, കിര്യത്ത് ഷിമോണ, മെതുല തുടങ്ങിയ വടക്കന്‍ മേഖലകളില്‍ മിസൈല്‍ ഭീഷണിയെത്തുടര്‍ന്ന് ഹോം ഫ്രണ്ട് കമാന്‍ഡ് ജാഗ്രതാ നിര്‍ദേശം നല്‍കിയിട്ടുണ്ട്.

പലയിടങ്ങളിലും ജനവാസ മേഖലകളില്‍ മിസൈലുകള്‍ പതിച്ചതിനെ തുടര്‍ന്ന് കനത്ത നാശനഷ്ടങ്ങള്‍ റിപോര്‍ട്ട് ചെയ്തു. വെസ്റ്റേണ്‍ ഗലീലി ഉള്‍പ്പെടെയുള്ള അതിര്‍ത്തി പ്രദേശങ്ങളില്‍ അപായ സൈറണുകള്‍ മുഴങ്ങുന്നതിനാല്‍ ജനങ്ങളോട് സുരക്ഷിത സ്ഥാനങ്ങളിലേക്ക് മാറാന്‍ അധികൃതര്‍ നിര്‍ദേശിച്ചിട്ടുണ്ട്.

Tensions escalate in the Middle East as Iran and its allies intensify missile and drone attacks on Israel, leading to widespread panic and emergency alerts across major cities.