ചെന്നൈ: തമിഴ്‌നാട്ടില്‍ ഡി.എം.കെ മുന്നണിയുടെ പ്രകടന പത്രികയാണ് സൂപ്പര്‍ താരമെന്ന് മുഖ്യമന്ത്രി എം.കെ സ്റ്റാലിന്‍. നല്‍കിയ വാഗ്ദാനങ്ങള്‍ നടപ്പിലാക്കിയ ശേഷമാണ് ഡി.എം.കെ മുന്നണി വീണ്ടും ജനങ്ങളെ സമീപിക്കുന്നത്. ആറു വയസുമുതല്‍ അറുപത് വയസുവരെയുള്ളവരും സ്ത്രീകളും പുരുഷന്‍മാരും വയോധികരും യുവാക്കളും എല്ലാവരും ഡി.എം.കെ മുന്നണിയുടെ പ്രകടന പത്രിക ഇഷ്ടപ്പെടുന്നു. വെറുതെ പറയുന്ന വാഗ്ദാനങ്ങളല്ല. നടപ്പിലാക്കുന്നവ മാത്രം പറയുന്നവരാണ് തങ്ങളെന്ന് ജനങ്ങള്‍ക്ക് അറിയാവുന്നതിനാലാണ് പ്രകടന പത്രികയെ ഇത്രയേറെ ഇഷ്ടപ്പെടുന്നത്. 

എന്നാല്‍, തങ്ങളുടെ എതിരാളികള്‍ വഞ്ചനയുടെ പത്രികയാണ് പുറത്തിറക്കുന്നത്. തമിഴ്‌നാടിനെ ഡല്‍ഹിയിലിരുന്ന് നിയന്ത്രിക്കാനാണ് ചിലര്‍ കരുക്കള്‍ നീക്കുന്നത്. തെരഞ്ഞെടുപ്പ് ഡല്‍ഹി സംഘവും തമിഴ്‌നാട് സംഘവും തമ്മിലാണ്. 

സ്വന്തം പാര്‍ട്ടി നേതാക്കളെ വരെ ഒറ്റിക്കൊടുത്ത പളനിസ്വാമിയാണ് എന്‍.ഡി.എയെ നയിക്കുന്നത്. തമിഴ്‌നാടിന്റെ വികസനം തടയാന്‍ നിരന്തരം ശ്രമിച്ചവരാണ് ബി.ജെ.പിയും എ.ഐ.എ.ഡി.എം.കെയുമെന്നും സ്റ്റാലിന്‍ ആരോപിച്ചു. വിരുദ്‌നഗറിലെ തെരഞ്ഞെടുപ്പ് റാലിയില്‍ പ്രസംഗിക്കുകയായിരുന്നു മുഖ്യമന്ത്രി.