തെഹ്‌റാന്‍: ഇറാന്‍ റെവല്യൂഷണറി ഗാര്‍ഡ് കോര്‍പ്‌സിന്റെ (ഐആര്‍ജിസി) ഇന്റലിജന്‍സ് വിഭാഗം തലവന്‍ മേജര്‍ ജനറല്‍ സയ്യിദ് മജീദ് ഖാദിമി കൊല്ലപ്പെട്ടു. തിങ്കളാഴ്ച പുലര്‍ച്ചെയുണ്ടായ ആക്രമണത്തിലാണ് അദ്ദേഹം കൊല്ലപ്പെട്ടതെന്ന് ഇറാന്‍ ഔദ്യോഗിക വാര്‍ത്താ ഏജന്‍സിയായ ഫാര്‍സ് റിപോര്‍ട്ട് ചെയ്തു. അമേരിക്കയും ഇസ്‌റാഈലും സംയുക്തമായി നടത്തിയ ഭീകരാക്രമണത്തിലാണ് ഖാദിമി കൊല്ലപ്പെട്ടതെന്ന് ഐആര്‍ജിസി പ്രസ്താവനയിലൂടെ ആരോപിച്ചു.

കഴിഞ്ഞ ഏതാനും വര്‍ഷങ്ങളായി ഇറാന്റെ രഹസ്യാന്വേഷണ വിഭാഗത്തില്‍ നിര്‍ണായക ചുമതലകള്‍ വഹിച്ചിരുന്ന ഉദ്യോഗസ്ഥനായിരുന്നു ഖാദിമി. വിദേശ കടന്നുകയറ്റങ്ങള്‍ തടയുന്നതിലും സുരക്ഷാ ഏകോപനത്തിലും അദ്ദേഹം വലിയ പങ്കുവഹിച്ചിരുന്നു. മേഖലയില്‍ ഇറാനും അമേരിക്ക -ഇസ്‌റാഈയേല്‍ സഖ്യവും തമ്മിലുള്ള സംഘര്‍ഷം അതിരൂക്ഷമായി തുടരുന്നതിനിടയിലാണ് ഈ ഉന്നതതല കൊലപാതകം നടന്നിരിക്കുന്നത്.

കഴിഞ്ഞ ഫെബ്രുവരിയില്‍ ഇറാന്‍ പരമോന്നത നേതാവ് ആയത്തുല്ല അലി ഖാംനഈ കൊല്ലപ്പെട്ടതിന് പിന്നാലെ ഇറാനിലെ ഉന്നത സൈനിക ഉദ്യോഗസ്ഥരെ ലക്ഷ്യമിട്ടുള്ള ആക്രമണങ്ങള്‍ തുടരുകയാണ്. ഖാദിമിയുടെ മരണത്തില്‍ ഇറാന്‍ സര്‍ക്കാര്‍ ഔദ്യോഗികമായി ദുഃഖാചരണം പ്രഖ്യാപിച്ചു. ഈ ആക്രമണത്തിന് ശക്തമായ തിരിച്ചടി നല്‍കുമെന്ന് ഇറാന്‍ സൈനിക വൃത്തങ്ങള്‍ മുന്നറിയിപ്പ് നല്‍കിയിട്ടുണ്ട്.

Major General Sayyed Majid Khademi, the head of IRGC's intelligence unit, was killed in an attack early Monday, prompting Iran to blame US-Israeli forces and declare a period of national mourning.