അബൂദബി: സായിദ് ചാരിറ്റി റണ്‍ ഏപ്രില്‍ 18ന് കൂട്ടയോട്ടം സംഘടിപ്പിക്കുന്നു. അബൂദബി സ്‌പോര്‍ട്‌സ് കൗണ്‍സിലിന്റെയും നാഷനല്‍ പ്രോജക്ട്‌സ് ഓഫിസിന്റെയും സഹകരണത്തോടെയാണ് പരിപാടി. ശാരീരിക ക്ഷമതയുടെ പ്രാധാന്യത്തെക്കുറിച്ചുള്ള സമൂഹ അവബോധം വര്‍ധിപ്പിക്കുന്നതിനും രാജ്യത്തോടുള്ള കൂറ് പ്രഖ്യാപിക്കുന്നതിനുമായി നടത്തുന്ന കായിക പരിപാടിക്ക് ''ഹസ്സന്തക് യാ വത്വന്‍''എന്നാണ് നാമകരണം.
സ്വദേശികളും വിദേശികളും ഉള്‍പ്പെടെ സമൂഹത്തിലെ വിവിധ വിഭാഗങ്ങളില്‍ നിന്നുള്ളവരുടെ വിപുലമായ പങ്കാളിത്തത്തോടെയാണ് ഓട്ടം സംഘടിപ്പിക്കുന്നത്. 'എന്റെ മാതൃരാജ്യമേ, ഞാന്‍ നിന്നെ ശക്തിപ്പെടുത്തി' എന്നാണ് കൂട്ടയോട്ടത്തിന്റെ സന്ദേശം.
യു.എ.ഇയുടെ പ്രധാന ദേശീയ സ്മാരകങ്ങളിലൊന്നായ വഹാത് അല്‍ കരാമയില്‍ രാവിലെ എട്ട് മണിക്ക് മല്‍സരം ആരംഭിക്കും. യു.എ.ഇയെ തങ്ങളുടെ വീടായി കരുതുന്ന ആര്‍ക്കും പ്രായ ഭേദമന്യേ അഞ്ച് കിലോമീറ്റര്‍ ദൈര്‍ഘ്യമുള്ള മത്സരത്തില്‍ പങ്കെടുക്കാമെന്ന് സായിദ് ചാരിറ്റി റണ്ണിന്റെ സുപ്രീം സംഘാടക സമിതി ചെയര്‍മാന്‍ ലെഫ്റ്റനന്റ് ജനറല്‍ (റിട്ട.) മുഹമ്മദ് ഹിലാല്‍ അല്‍ കാബി പറഞ്ഞു.
ഏപ്രില്‍ മാസത്തില്‍ അബൂദബി എമിറേറ്റിലുടനീളം നടക്കുന്ന നിരവധി കായിക, കമ്മ്യൂണിറ്റി പ്രവര്‍ത്തനങ്ങളുടെ ഭാഗമാണ് ഈ പരിപാടി. in.njuko.com/runforthenation എന്നതാണ് രജിസ്‌ട്രേഷന്‍ ലിങ്ക്.

ALSO READ: യു.എ.ഇ ദേശീയ ഗാനം ആലപിച്ച് വൈറലായ ഇന്ത്യന്‍ വിദ്യാര്‍ഥികള്‍ക്ക് നന്ദി പറഞ്ഞ് ശൈഖ് ഹംദാന്‍; വൈറല്‍ വിഡിയോ പങ്കിട്ടു

English Summary: The Zayed Charity Run, in collaboration with the Abu Dhabi Sports Council and the National Projects Office, is organizing a 5 km community run titled 'Hassantuk Ya Watan' (My homeland, I have strengthened you) on April 18. The run will begin at 8:00 AM at Wahat Al Karama, a prominent national monument in Abu Dhabi.