ജറൂസലേം: ഇസ്‌റാഈല്‍ രാജ്യരക്ഷാ മന്ത്രിയും തീവ്ര ജൂത വലതുപക്ഷ വാദിയുമായ ഇതാമര്‍ ബെന്‍ഗ്വിര്‍ മസ്ജിദുല്‍ അഖ്‌സ വളപ്പില്‍ കയറി പ്രകോപനം സൃഷ്ടിച്ചു. ഈ വര്‍ഷം മൂന്നാം തവണയാണ് ബെന്‍ ഗ്വിറിന്റെ പ്രകോപനം. പ്രതിഷേധത്തെ തുടര്‍ന്ന് വെസ്റ്റ്ബാങ്കില്‍ ഇന്നലെ 18 പേരെ ഇസ്‌റാഈല്‍ പൊലിസ് അറസ്റ്റ് ചെയ്തു. പള്ളി വളപ്പില്‍ കയറി ബെന്‍ഗ്വിര്‍ ജൂത പ്രാര്‍ഥന നിര്‍വഹിച്ചതിനെതിരേ ഫലസ്തീന്‍ നേതാക്കളും പ്രതിഷേധവുമായി രംഗത്തുവന്നു. 1967നു ശേഷം മസ്ജിദുല്‍ അഖ്‌സയില്‍ മുസ്‍ലിംകള്‍ അല്ലാത്തവര്‍ക്ക് പ്രാര്‍ഥനയ്ക്ക് അനുമതിയില്ല. ജൂതര്‍ക്ക് പള്ളി സന്ദര്‍ശിക്കാമെങ്കിലും പ്രാര്‍ഥന നടത്താന്‍ പാടില്ല. ഇതു ലംഘിച്ച് ഇസ്‌റാഈല്‍ മന്ത്രി പ്രകോപനം സൃഷ്ടിക്കുന്നത് കൂടുതല്‍ സംഘര്‍ഷത്തിന് കാരണമാകുകയാണ്.

ബെന്‍ഗ്വിറിന്റെ സന്ദര്‍ശനം സ്റ്റാറ്റസ്‌ക്വോയുടെ ലംഘനമാണെന്ന് പള്ളിയുടെ ചുമതലയുള്ള ജോര്‍ദാന്‍ വിദേശകാര്യ മന്ത്രാലയം പറഞ്ഞു. പള്ളി വളപ്പില്‍ ഈയിടെയായി ഇസ്‌റാഈല്‍ മന്ത്രിയുടെ നേതൃത്വത്തില്‍ പ്രകോപനം തുടരുന്നത് പ്രതിഷേധാര്‍ഹമാണെന്ന് ഫലസ്തീന്‍ പ്രസിഡന്റിന്റെ ഓഫിസ് അറിയിച്ചതായി വഫ വാര്‍ത്താ ഏജന്‍സി റിപ്പോര്‍ട്ട് ചെയ്തു. 2022 ല്‍ മന്ത്രിയായ ശേഷം ബെന്‍ഗ്വിര്‍ ഇതുവരെ 16 തവണ അഖ്‌സ പള്ളിയിലെത്തിയിട്ടുണ്ട്.