അബുദാബി: ലോകത്തെ മുന്‍നിര ആര്‍ട്ടിഫിഷ്യല്‍ ഇന്റലിജന്‍സ് (എ.ഐ) ഹബ്ബുകളിലൊന്നായി യു.എ.ഇ തെരഞ്ഞെടുക്കപ്പെട്ടു. എ.ഐ തന്ത്രങ്ങള്‍, അവബോധം, ഭരണനിര്‍വഹണം എന്നിവയ്ക്കുള്ള സ്ഥാപനപരമായ പിന്തുണയില്‍ മുന്‍നിര രാജ്യങ്ങളുടെ പട്ടികയിലാണ് യു.എ.ഇ ഉള്ളതെന്ന്, സ്റ്റാന്‍ഫോര്‍ഡ് സര്‍വകലാശാലയുടെ ഇന്‍സ്റ്റിറ്റ്യൂട്ട് ഫോര്‍ ഹ്യൂമന്‍ സെന്റേര്‍ഡ് ആര്‍ട്ടിഫിഷ്യല്‍ ഇന്റലിജന്‍സ് (ഒഅക) പുറത്തുവിട്ട 2026ലെ എ.ഐ ഇന്‍ഡക്‌സ് റിപ്പോര്‍ട്ട് വ്യക്തമാക്കുന്നു.
വൈദഗ്ധ്യം, തൊഴില്‍, എ.ഐയുടെ സ്വാംശീകരണം തുടങ്ങിയ ആഗോള മാനദണ്ഡങ്ങളില്‍ രാജ്യം മികച്ച പ്രകടനമാണ് കാഴ്ചവെക്കുന്നത്. പ്രതിശീര്‍ഷ ജി.ഡി.പിയുടെ അടിസ്ഥാനത്തില്‍ എ.ഐ സാങ്കേതികവിദ്യ പ്രയോജനപ്പെടുത്തുന്നതില്‍ സിംഗപ്പൂരിനൊപ്പം യു.എ.ഇയും മുന്‍പന്തിയിലുണ്ടെന്ന് റിപ്പോര്‍ട്ടില്‍ പറയുന്നു.

യു.എ.ഇയിലെ 80 ശതമാനത്തിലധികം ജീവനക്കാരും തങ്ങളുടെ തൊഴിലിടങ്ങളില്‍ എ.ഐ സംവിധാനങ്ങള്‍ പതിവായി ഉപയോഗിക്കുന്നവരാണ്. ഉയര്‍ന്ന വിശ്വാസ്യതയോടെയാണ് ഇവര്‍ ഈ സാങ്കേതികവിദ്യ കൈകാര്യം ചെയ്യുന്നത്. എ.ഐ എഞ്ചിനീയറിംഗ് വൈദഗ്ധ്യത്തില്‍ ആഗോളതലത്തില്‍ അതിവേഗം വളരുന്ന രാജ്യങ്ങളിലൊന്ന് കൂടിയാണ് യു.എ.ഇ. 2019നും 2025നും ഇടയില്‍ യു.എ.ഇയിലെ എ.ഐ പ്രതിഭകളുടെ എണ്ണത്തില്‍ 100 ശതമാനത്തിലധികം വര്‍ധനവുണ്ടായിട്ടുണ്ട്. 2025ല്‍ ആകെ തൊഴിലവസരങ്ങളില്‍ 2.87 ശതമാനവും എ.ഐയുമായി ബന്ധപ്പെട്ടവയായിരുന്നു. എ.ഐ പ്രൊഫഷണലുകളുടെ ആവശ്യകതയില്‍ യു.എ.ഇ ആഗോളതലത്തില്‍ മുന്നിലാണെന്ന് ഇത് തെളിയിക്കുന്നു.

ദേശീയ എ.ഐ സ്ട്രാറ്റജി 2031ലൂടെ വിദ്യാഭ്യാസ മേഖലയില്‍ എ.ഐ ഉള്‍പ്പെടുത്താനുള്ള യു.എ.ഇയുടെ മികച്ച ഇടപെടലുകളും റിപ്പോര്‍ട്ടില്‍ എടുത്തുകാണിക്കുന്നുണ്ട്. 2025 - 2026 അധ്യയന വര്‍ഷം മുതല്‍ രാജ്യത്തെ എല്ലാ സ്‌കൂളുകളിലും എ.ഐ പഠനം നിര്‍ബന്ധമാക്കിയിട്ടുണ്ട്. ഡാറ്റ, അല്‍ഗൊരിതം, നൂതന ആശയങ്ങള്‍, ധാര്‍മ്മികത തുടങ്ങിയ അടിസ്ഥാന വിഷയങ്ങള്‍ ഉള്‍പ്പെടുത്തിയാണ് ഈ പാഠ്യപദ്ധതി തയ്യാറാക്കിയിരിക്കുന്നത്.

നൂതന സാങ്കേതിക ഗവേഷണങ്ങള്‍ക്കുള്ള ആഗോള കേന്ദ്രമെന്ന നിലയില്‍ അബൂദബിയിലെ ടെക്‌നോളജി ഇന്നൊവേഷന്‍ ഇന്‍സ്റ്റിറ്റ്യൂട്ടിന്റെ (TII) പ്രവര്‍ത്തനങ്ങളെയും റിപ്പോര്‍ട്ട് അഭിനന്ദിച്ചു. പ്രത്യേകിച്ച് ഫാല്‍ക്കണ്‍ മോഡലുകളിലൂടെ എ.ഐ രംഗത്ത് ഈ സ്ഥാപനം നല്‍കുന്ന സംഭാവനകള്‍ മികച്ചതാണ്. ആര്‍ട്ടിഫിഷ്യല്‍ ഇന്റലിജന്‍സ് മേഖലയില്‍ പ്രതീക്ഷകള്‍ക്കപ്പുറമുള്ള മുന്നേറ്റം നടത്തുന്ന യു.എ.ഇ, എ.ഐയുടെ ആഗോള ഹബ് എന്ന നിലയിലുള്ള രാജ്യത്തിന്റെ സ്ഥാനം കൂടുതല്‍ കരുത്തുറ്റതാക്കുകയാണെന്നും റിപ്പോര്‍ട്ട് വിലയിരുത്തി.

Summary: UAE has been recognized as a leading global Artificial Intelligence hub in the 2026 AI Index Report by Stanford University, scoring high in institutional support, AI strategy, and governance. Over 80% of employees in the UAE regularly use AI at their workplaces, demonstrating high levels of trust and adoption that exceed expectations relative to the country's GDP. The concentration of AI talent in the UAE surged by more than 100% between 2019 and 2025. Furthermore, AI-related roles accounted for 2.87% of all job listings in 2025, showing a massive demand for technical expertise.