വാഷിംഗ്ടൺ: ലോകമെമ്പാടും നിയമപരമായും അല്ലാതെയും നടക്കുന്ന വന്യജീവി വ്യാപാരം ഭാവിയിൽവലിയ രീതിയിലുള്ള പകർച്ചവ്യാധികൾക്ക് കാരണമാകുമെന്ന് ശാസ്ത്രലോകത്തിന്റെ മുന്നറിയിപ്പ്. വന്യജീവികൾ മനുഷ്യരുമായി സമ്പർക്കത്തിൽ വരുന്നത് വഴി രോഗാണുക്കൾ മൃഗങ്ങളിൽ നിന്ന് മനുഷ്യരിലേക്ക് പടരാനുള്ള (Zoonotic spillover) സാധ്യത വന്യജീവി വ്യാപാരം ഇല്ലാത്ത സാഹചര്യങ്ങളെ അപേക്ഷിച്ച് 1.5 മടങ്ങ് അധികമാണെന്ന് പഠനം നിരീക്ഷിക്കുന്നു.

സസ്തനികൾ ഉയർത്തുന്ന ഭീഷണി

ഗവേഷകർ പഠനവിധേയമാക്കിയ 2,079 സസ്തനി ഇനങ്ങളിൽ 41 ശതമാനവും മനുഷ്യരുമായി കുറഞ്ഞത് ഒരു രോഗകാരിയെങ്കിലും (വൈറസ്, ബാക്ടീരിയ, ഫംഗസ് അല്ലെങ്കിൽ പരാദം) പങ്കിടുന്നുണ്ടെന്നാണ് കണ്ടെത്തിയിരിക്കുന്നത്. അതേസമയം, വ്യാപാര ശൃംഖലയുടെ ഭാഗമല്ലാത്ത ജീവികളിൽ ഈ സാധ്യത വെറും 6.4 ശതമാനം മാത്രമാണ്. അതായത്, വന്യജീവികളെ അവയുടെ സ്വാഭാവിക ആവാസവ്യവസ്ഥയിൽ നിന്ന് അടർത്തിമാറ്റി വിപണികളിൽ എത്തിക്കുന്നത് രോഗവ്യാപനത്തിനുള്ള സാധ്യത എട്ട് മടങ്ങ് വർദ്ധിപ്പിക്കുന്നു.

വിദേശ വളർത്തുമൃഗങ്ങളോടുള്ള ഭ്രമം

പൂച്ചകൾ, നായ്ക്കൾ തുടങ്ങിയ വളർത്തുമൃഗങ്ങളിൽ നിന്ന് വ്യത്യസ്തമായി, സോഷ്യൽ മീഡിയയിലെ ജനപ്രീതി മുൻനിർത്തി വന്യജീവികളെ വീട്ടിൽ വളർത്തുന്ന പ്രവണത വർദ്ധിക്കുന്നത് അപകടസാധ്യത ഇരട്ടിയാക്കുന്നുണ്ടെന്നാണ് പഠനത്തിൽ കണ്ടെത്തിയിരിക്കുന്നത്.

ഇവയിൽ പ്രധാനപ്പെട്ട ജീവികളാണ് ഫെനെക് കുറുക്കന്മാർ, ഒട്ടറുകൾ (നീർനായ), ആഫ്രിക്കൻ പിഗ്മി മുള്ളൻപന്നികൾ, പുള്ളിപ്പുലി പൂച്ചകൾ, ഷുഗർ ഗ്ലൈഡറുകൾ.ഈ ജീവികളാണ് പകർച്ചവ്യാധികൾ വർധിക്കാൻ കാരണമാകുന്ന പട്ടികയിൽ മുന്നിലുള്ളത്.ഇവ പലപ്പോഴും കാട്ടിൽ നിന്ന് നേരിട്ട് പിടികൂടുന്നവയോ മതിയായ സുരക്ഷാ പരിശോധനകളില്ലാതെ വളർത്തപ്പെടുന്നവയോ ആണ്. ഇവ മനുഷ്യരുമായി ദീർഘനേരം ഇടപഴകുന്നത് പുതിയ വൈറസുകൾ മനുഷ്യരിലേക്ക് പടരാൻ കാരണമാകുന്നു.

ഒരു ജീവിവർഗ്ഗം വന്യജീവി വ്യാപാര വിപണിയിൽ എത്രത്തോളം കാലം നിലനിൽക്കുന്നുവോ, അത്രത്തോളം കൂടുതൽ രോഗകാരികൾ ആ ജീവിയിൽ നിന്ന് മനുഷ്യരിലേക്ക് എത്താൻ സാധ്യതയുണ്ട്. 1980 മുതൽ 2019 വരെയുള്ള കാലയളവിലെ വിവരങ്ങൾ പരിശോധിച്ചപ്പോൾ, ആഗോള വ്യാപാരത്തിലുള്ള ഓരോ കാട്ടു സസ്തനി ഇനവും ഓരോ 10 വർഷത്തിലും ശരാശരി ഒരു പുതിയ രോഗകാരി വീതം മനുഷ്യരിലേക്ക് പകർത്തുന്നുണ്ടെന്നാണ് കണ്ടെത്തൽ.

ചരിത്രം നൽകുന്ന മുന്നറിയിപ്പ്

മുൻകാലങ്ങളിൽ ലോകത്തെ വിറപ്പിച്ച പല പകർച്ചവ്യാധികൾക്കും വന്യജീവി വ്യാപാരവുമായി നേരിട്ട് ബന്ധമുണ്ടെന്ന് ഗവേഷകർ ചൂണ്ടിക്കാട്ടുന്നു.

അനധികൃത വിപണികളും ലൈവ് മാർക്കറ്റുകളും

മാംസത്തിനോ രോമത്തിനോ വേണ്ടി കൊല്ലപ്പെട്ട മൃഗങ്ങളെ വിൽക്കുന്നതിനേക്കാൾ 1.34 മടങ്ങ് അധികം അപകടസാധ്യതയാണ് ജീവനുള്ള മൃഗങ്ങളെ വിൽക്കുന്ന ചന്തകളിലുള്ളത്. നിയമവിരുദ്ധ വ്യാപാരത്തിൽ ഏർപ്പെട്ടിരിക്കുന്ന ജീവിവർഗ്ഗങ്ങൾ നിയമപരമായ മാർഗങ്ങളിലൂടെ വരുന്നവയേക്കാൾ 1.4 മടങ്ങ് കൂടുതൽ രോഗകാരികളെ മനുഷ്യരിലേക്ക് എത്തിക്കുന്നു. ഈനാംപേച്ചികൾ (Pangolins), ആനകൾ, കരടികൾ തുടങ്ങിയവയെ വേട്ടയാടുന്നത് വഴി മനുഷ്യർ നേരിട്ട് വന്യജീവി രോഗാണുക്കളുടെ പരിധിയിൽ വരുന്നു.

ഭാവിയിലേക്കുള്ള മുൻകരുതൽ

ആഗോള വന്യജീവി വ്യാപാരത്തിലേക്ക് ഓരോ വർഷവും പുതിയ ജീവിവർഗ്ഗങ്ങൾ പ്രവേശിച്ചുകൊണ്ടിരിക്കുകയാണ്. ഇത് ഭാവിയിൽ കോവിഡിന് സമാനമായോ അതിനേക്കാൾ ഭീകരമായോ ഉള്ള മഹാമാരികൾക്ക് കാരണമായേക്കാം. ജൈവ നിരീക്ഷണം (Biomonitoring) ശക്തമാക്കേണ്ടതും, വന്യജീവി വ്യാപാര നിയമങ്ങളിൽ മൃഗസംരക്ഷണത്തോടൊപ്പം 'മനുഷ്യ ആരോഗ്യ സുരക്ഷ' (One Health approach) കൂടി നിർബന്ധമാക്കേണ്ടതും അനിവാര്യമാണെന്ന് ശാസ്ത്രജ്ഞർ മുന്നറിയിപ്പ് നൽകുന്നു.