തൊടുപുഴ: വേനൽമഴയിൽ അനിശ്ചിതത്വം തുടരുന്നതിനിടെ  സംസ്ഥാനത്തെ അണക്കെട്ടുകളിൽ നീരൊഴുക്ക് നിലയ്ക്കുന്നു. ആറ് അണക്കെട്ടുകളിലേക്കുള്ള നീരൊഴുക്ക് പൂർണമായും നിലച്ചപ്പോൾ ഏതാനും ഇടത്ത് നാമമാത്ര നീരൊഴുക്കുണ്ട്. 3.054 ദശലക്ഷം യൂനിറ്റ് വൈദ്യുതി ഉൽപാദിപ്പിക്കാനുള്ള വെള്ളം മാത്രമാണ് ഇന്നലെ എല്ലാ അണക്കെട്ടുകളിലുമായി ഒഴുകിയെത്തിയത്. 
ഇടമലയാർ, മാട്ടുപ്പെട്ടി, കുറ്റ്യാടി, തരിയോട്, പൊന്മുടി, പെരിങ്ങൽകുത്ത് അണക്കെട്ടുകളിലേക്കുള്ള നീരൊഴുക്ക് പൂർണമായും നിലച്ചു. ഇടുക്കി (1.595), പമ്പ (0.866), ഷോളയാർ (0.18), കുണ്ടള (0.219), ആനയിറങ്കൽ (0.167), കല്ലാർകുട്ടി (0.027 ദശലക്ഷം യൂനിറ്റ്) എന്നിങ്ങനെയാണ് വിവിധ പദ്ധതികളിലേക്ക് വെള്ളം ഒഴുകിയെത്തിയത്. 
ഊർജമേഖലയെ കനത്ത ആശങ്കയിലാക്കിയാണ് ജലനിരപ്പ് കുത്തനെ താഴുന്നത്. കടുത്ത ചൂടും ഒളിച്ചുകളി തുടരുന്ന മഴമേഘങ്ങളും വൈദ്യുതി ബോർഡിന്റെ പ്രതീക്ഷ വറ്റിക്കുന്നതാണ്.  ദിവസങ്ങൾക്കകം പല അണക്കെട്ടുകളും കാലിയാകുമെന്ന യാഥാർത്ഥ്യം വൈദ്യുതി പ്രതിസന്ധി രൂക്ഷമാക്കുന്നതിനോടൊപ്പം ജനങ്ങളുടെ ദൈനംദിന ജീവിതത്തേയും പ്രതികൂലമായി ബാധിക്കും. ശുദ്ധജലത്തിനായി അണക്കെട്ടുകളെ മാത്രം ആശ്രയിക്കുന്ന പതിനായിരങ്ങളാണ് താഴ്‌വാരങ്ങളിൽ അധിവസിക്കുന്നത്. 
ഇടുക്കി, ഇടമലയാർ, കുറ്റ്യാടി, ശബരിഗിരി പദ്ധതികളെയാണ് ആഭ്യന്തര ഉൽപാദനത്തിന് പ്രധാനമായും കെ.എസ്.ഇ.ബി ആശ്രയിക്കുന്നത്. ഇടുക്കി അണക്കെട്ടിലെ ജലനിരപ്പ് സംഭരണശേഷിയുടെ 32 ശതമാനത്തിലെത്തി. ശരാശരി മൂക്കാൽ അടി വീതമാണ് ഇപ്പോൾ പ്രതിദിനം ജലനിരപ്പ് താഴുന്നത്. 
കഴിഞ്ഞ വർഷം ഇതേ സമയത്തേക്കാൾ 10 അടി വെള്ളം കുറവാണ് ഇപ്പോൾ. അതേസമയം മൂലമറ്റം പവർ ഹൗസിൽ വൈദ്യുതോൽപാദനം 10 ദശലക്ഷം യൂനിറ്റെന്ന ശരാശരിയിൽ തുടരുന്നു. പവർ ഹൗസിലെ ആറ് ജനറേറ്ററുകളും പൂർണമായും പ്രവർത്തിക്കുന്നുണ്ട്. 12.862 ദശലക്ഷം യൂനിറ്റ് വൈദ്യുതിയാണ് ഇന്നലെ ഉൽപാദിപ്പിച്ചത്. 
ശബരിഗിരി 5.3235, കുറ്റ്യാടി 1.8922, ഇടമലയാർ 0.8918, ലോവർപെരിയാർ 0.599, നേര്യമംഗലം 0.6456, ഷോളയാർ 1.0889, പള്ളിവാസൽ എക്‌സ്റ്റെൻഷൻ 0.859, പന്നിയാർ 0.4172, പെരിങ്ങൽകുത്ത് 0.2227, കക്കാട് 0.777, കല്ലട 0.1341, മലങ്കര 0.1126 ദശലക്ഷം യൂനിറ്റ് എന്നിങ്ങനെയായിരുന്നു മറ്റ് പദ്ധതികളിലെ ഇന്നലത്തെ ഉൽപാദനം. വരും ദിവസങ്ങളിൽ വേനൽമഴ ലഭിച്ചില്ലെങ്കിൽ സ്ഥിതി കൂടുതൽ വഷളാകും. 115.075 ദശലക്ഷം യൂനിറ്റായിരുന്നു സംസ്ഥാനത്തെ ഇന്നലത്തെ വൈദ്യുതി ഉപയോഗം. പീക്ക് ടൈം ഡിമാന്റ് 5770 മെഗാവാട്ടും.