ദുബൈ: ഒപെക് പ്ലസ് സഖ്യത്തില്‍ നിന്ന് പിന്മാറുന്നതോടെ എണ്ണ ഉല്‍പ്പാദന ശേഷി വര്‍ദ്ധിപ്പിക്കാനുള്ള വിപുലമായ പദ്ധതികളുമായി യു.എ.ഇ മുന്നോട്ട്. 2027ഓടെ പ്രതിദിന എണ്ണ ഉല്‍പ്പാദനം 50 ലക്ഷം ബാരലായി ഉയര്‍ത്താനാണ് രാജ്യം ലക്ഷ്യമിടുന്നത്. യുഎഇ ഊര്‍ജ്ജ - അടിസ്ഥാന സൗകര്യ വികസന മന്ത്രി സുഹൈല്‍ മുഹമ്മദ് അല്‍ മസ്‌റൂയിയാണ് ഇക്കാര്യം വ്യക്തമാക്കിയത്. ഒപെക് പ്ലസ് സഖ്യങ്ങളില്‍ നിന്നുള്ള പിന്മാറ്റം നയപരമായ അവലോകനത്തിന് ശേഷമാണ്. ആഗോള വിപണിയിലെ മാറ്റങ്ങള്‍ക്കനുസരിച്ച് വേഗത്തിലുള്ള തീരുമാനങ്ങള്‍ എടുക്കാനുള്ള സ്വാതന്ത്ര്യം ഉറപ്പാക്കുകയാണ് ലക്ഷ്യം. ഹോര്‍മുസ് കടലിടുക്ക് അടഞ്ഞത് മൂലമുണ്ടായ വിതരണ തടസ്സങ്ങള്‍ പരിഹരിക്കാന്‍ ആഗോള വിപണിയെ സഹായിക്കുകയാണ് ലക്ഷ്യമെന്നും മന്ത്രി അറിയിച്ചു.

ആഗോള എണ്ണ വിപണി അതിവേഗം മാറിക്കൊണ്ടിരിക്കുകയാണെന്നും ഇത്തരം സാഹചര്യങ്ങളില്‍ കൂടുതല്‍ വഴക്കവും പെട്ടെന്നുള്ള തീരുമാനങ്ങളും ആവശ്യമാണെന്നും മന്ത്രി പറഞ്ഞു. ഏകദേശം അഞ്ച് പതിറ്റാണ്ടിലേറെയായി ഒപെകുമായി സഹകരിക്കുന്നത് തുടരുന്നുണ്ടെങ്കിലും, പുതിയ ആഗോള സാഹചര്യങ്ങള്‍ മറ്റൊരു സമീപനം ആവശ്യപ്പെടുന്നു. ആഗോള വിപണിയിലെ വിതരണ വിടവ് നികത്താന്‍ പ്രാപ്തിയുള്ള ഉത്തരവാദിത്തമുള്ള ഉല്‍പ്പാദക രാജ്യമായി യു.എ.ഇ തുടരും. വിപണിയിലെ സുസ്ഥിരത ഉറപ്പാക്കാനാണ് ഞങ്ങളുടെ മുന്‍ഗണനയെന്നും സുഹൈല്‍ മുഹമ്മദ് അല്‍ മസ്‌റൂയി കൂട്ടിച്ചേര്‍ത്തു.

ഹോര്‍മുസ് കടലിടുക്കിലെ പ്രതിസന്ധികള്‍ കാരണം പല രാജ്യങ്ങളുടെയും തന്ത്രപ്രധാനമായ എണ്ണ ശേഖരത്തില്‍ കുറവുണ്ടായിട്ടുണ്ട്. ഇത് പരിഹരിക്കാന്‍ നിക്ഷേപം വര്‍ദ്ധിപ്പിക്കേണ്ടതും ഉല്‍പ്പാദനം കൂട്ടേണ്ടതും അനിവാര്യമാണ്. അന്താരാഷ്ട്ര തലത്തില്‍ എണ്ണവാതക മേഖലകളില്‍ യു.എ.ഇ കമ്പനികള്‍ നടത്തുന്ന നിക്ഷേപങ്ങള്‍ കണക്കിലെടുക്കുമ്പോള്‍, ഉല്‍പ്പാദന ശേഷി വര്‍ദ്ധിപ്പിക്കുന്നത് ആഗോള ഊര്‍ജ്ജ സുരക്ഷയ്ക്ക് കരുത്തേകുമെന്ന് രാജ്യം വിശ്വസിക്കുന്നു.

English Summary: The UAE has set out a clear and publicly stated plan to raise its oil production capacity to 5 million barrels per day by 2027, positioning itself to play a larger role in meeting global demand at a time of heightened market pressure.

Suhail Mohamed Al Mazrouei, Minister of Energy and Infrastructure, said the country is moving ahead with implementing the plan, adding that the UAE aims to remain a responsible producer capable of contributing alongside other nations to address supply gaps in global markets.