ചെങ്ങന്നൂര്‍: ട്രാഫിക് പൊലിസുകാരനെ ആക്രമിച്ചതിന് കോടതി ശിക്ഷിച്ച പ്രതിയെ 21 വര്‍ഷത്തിന് ശേഷം പിടികൂടി. ചെറിയനാട് ചെറുവല്ലൂര്‍ കളരിക്കല്‍ വീട്ടില്‍ മുഹമ്മദ് നൂഹ്(64)നെ ആണ് വെണ്‍മണി പൊലിസ് പിടികൂടിയത്. 

1999 ഓഗസ്റ്റ് 22ന് വൈകീട്ട് കൊല്ലകടവ് ജങ്ഷനിലായിരുന്നു കേസിനാസ്പദമായ സംഭവം നടന്നത്. ട്രാഫിക് ഡ്യൂട്ടിയിലുണ്ടായിരുന്ന പൊലിസ് ഉദ്യോഗസ്ഥന്റെ യൂണിഫോം വലിച്ചുകീറുകയും ദേഹോപദ്രവം ഏല്‍പ്പിക്കുകയും കൈവിരലുകള്‍ കടിച്ചു മുറിപ്പെടുത്തുകയും ചെയ്തുവെന്നാണ് കേസ്. 

ഈ കേസില്‍ ചെങ്ങന്നൂര്‍ മജിസ്‌ട്രേറ്റ് കോടതി പ്രതിക്ക് മൂന്നുമാസത്തെ തടവുശിക്ഷ വിധിച്ചിരുന്നതാണ്. എന്നാല്‍ ഇയാള്‍ വിധിക്കെതിരെ ഹൈക്കോടതിയില്‍ അപ്പീല്‍ സമര്‍പ്പിച്ച ശേഷം ഒളിവില്‍ പോകുകയായിരുന്നു. 

ഇയാള്‍ക്കെതിരെ കോടതി വാറണ്ട് പുറപ്പെടുവിച്ചതിനെത്തുടര്‍ന്ന് വെണ്‍മണി പൊലിസ് പ്രത്യേക സംഘം രൂപീകരിച്ച് ഇയാളെ കണ്ടെത്താനുള്ള അന്വേഷണം നടത്തിവരികയായിരുന്നു. കേരളത്തിനകത്തും പുറത്തുമായി 21 വര്‍ഷമാണ് ഇയാള്‍ ഒളിവില്‍ കഴിഞ്ഞത്. പ്രതിയെ ചിറയിന്‍കീഴ് ഭാഗത്തുനിന്നാണ് ഇന്നലെ അന്വേഷണസംഘം അറസ്റ്റ് ചെയ്തത്.

ചെങ്ങന്നൂര്‍ ഡെപ്യൂട്ടി പൊലിസ് സൂപ്രണ്ട് സന്തോഷ് കുമാര്‍ ജെ യുടെ നേതൃത്വത്തില്‍ വെണ്‍മണി പൊലിസ് സ്റ്റേഷന്‍ ഇന്‍സ്‌പെക്ടര്‍ എസ്.എച്ച്.ഒ രാജേഷ് പി യുടെ നേതൃത്വത്തിലായിരുന്നു അന്വേഷണം. വെണ്‍മണി പൊലിസ് സ്റ്റേഷന്‍ സബ് ഇന്‍സ്‌പെക്ടര്‍ രതീഷ് ബാബു ഡി, സീനിയര്‍ സിവില്‍ പൊലിസ് ഓഫിസര്‍ ജയരാജ് വി, സിവില്‍ പൊലിസ് ഓഫിസര്‍മാരായ പ്രവീണ്‍ എസ്, വൈശാഖ് തമ്പി, സുധീപ് എസ് എന്നിവര്‍ ചേര്‍ന്നാണ് പ്രതിയെ പിടികൂടിയത്.

In a significant breakthrough, the police have arrested a convict who had been absconding for 21 years after being sentenced for attacking a traffic policeman.