ബംഗളൂരു: യു.എസ് ആസ്ഥാനമായി പ്രവര്‍ത്തിക്കുന്ന ക്രിസ്ത്യന്‍ മിഷനറി സംഘടനയായ 'ദി തിമോത്തി ഇനിഷ്യേറ്റീവ്' (ടി.ടി.ഐ) ഉള്‍പ്പെടെയുള്ളവര്‍ക്കെതിരേ എന്‍ഫോഴ്‌സ്‌മെന്റ് ഡയറക്ടറേറ്റിന്റെ (ഇ.ഡി) പരാതിയില്‍ ബംഗളൂരു പൊലിസ് കേസെടുത്തു. വിദേശ നാണ്യ വിനിമയ ചട്ടങ്ങള്‍ (എഫ്.സി.ആര്‍.എ) ലംഘിച്ച് 92.55 കോടി രൂപയുടെ ഫണ്ട് ഇന്ത്യയിലേക്ക് അനധികൃതമായി എത്തിച്ചുവെന്നാണ് പ്രധാന ആരോപണം. ഛത്തിസ്ഗഡ്, അസം തുടങ്ങിയ മാവോയിസ്റ്റ് സ്വാധീന മേഖലകളിലേക്ക് ഈ തുകയുടെ ഒരു ഭാഗം എത്തിയതായി അന്വേഷണത്തില്‍ കണ്ടെത്തിയെന്നാണ് പരാതിയില്‍ ഇ.ഡി ചൂണ്ടിക്കാട്ടിയത്.

കഴിഞ്ഞ നവംബര്‍ മുതല്‍ 2026 ഏപ്രില്‍ വരെയുള്ള കാലയളവില്‍ 92.55 കോടി രൂപ (ഏകദേശം 9.9 ദശലക്ഷം യു.എസ് ഡോളര്‍) ഇന്ത്യയിലേക്ക് എത്തിയതായി ഇ.ഡി കണ്ടെത്തി. യു.എസ് ബാങ്ക് ഡെബിറ്റ് കാര്‍ഡുകള്‍ ഉപയോഗിച്ചാണ് രാജ്യത്തുടനീളം ഈ തുക എ.ടി.എം വഴി പിന്‍വലിച്ചത്. എഫ്.സി.ആര്‍.എ രജിസ്‌ട്രേഷനോ സര്‍ക്കാര്‍ അനുമതിയോ ഇല്ലാതെയാണ് പണം കൈപ്പറ്റിയതും ഉപയോഗിച്ചതും. കൃത്രിമ പേരുകളില്‍ കാര്‍ഡുകള്‍ വിതരണം ചെയ്തതായും ഇ.ഡി പറയുന്നു. 

ഛത്തിസ്ഗഡിലെ ധംതാരി ഉള്‍പ്പെടെയുള്ള മാവോയിസ്റ്റ് സ്വാധീന മേഖലകളില്‍ ആണ് വിദേശ ഡെബിറ്റ് കാര്‍ഡുകള്‍ ഉപയോഗിച്ച് പണം പിന്‍വലിച്ചത്. ഏകദേശം 6.34 കോടി രൂപ ഇത്തരം മേഖലകളില്‍ എത്തിയിട്ടുണ്ട്. മാവോയിസ്റ്റ് പ്രവര്‍ത്തനങ്ങള്‍ക്കായി ഈ ഫണ്ട് വിനിയോഗിച്ചേക്കാമെന്ന സൂചനകളെ തുടര്‍ന്നാണ് കേന്ദ്ര ഏജന്‍സി പരാതിപ്പെടാന്‍ കാരണം.  ടി.ടി.ഐ ഇന്ത്യ ഓപറേഷന്‍സ് ഹെഡ് ജൊനാഥന്‍ എസ്. രാജന്‍, മൈക്ക മാര്‍ക്ക്, അജിത് വര്‍ഗീസ് മാത്തായി, വര്‍ഗീസ് ചാക്കോ, ബബ്ലു കുര്‍മി എന്നിവരുള്‍പ്പെടെയുള്ളവര്‍ക്കെതിരേയാണ് കേസ്.

സാധാരണ നിയമലംഘനങ്ങള്‍ക്ക് പുറമെ, രാജ്യസുരക്ഷയെ ബാധിക്കുന്ന പ്രവര്‍ത്തനങ്ങളില്‍ ഫണ്ട് ഉപയോഗിച്ചുവെന്ന നിഗമനത്തില്‍ ബംഗളൂരു കോത്തന്നൂര്‍ പൊലിസ് യു.എ.പി.എ പ്രകാരവും കേസെടുത്തിട്ടുണ്ട്. തെളിവ് നശിപ്പിക്കാനായി അമേരിക്കയില്‍ നിന്ന് ഡിജിറ്റല്‍ ബാങ്കിങ് രേഖകള്‍ മായ്ച്ചു കളഞ്ഞതായും പരാതിയില്‍ ഇ.ഡി ആരോപിച്ചു. നിലവില്‍ ആരെയും അറസ്റ്റ് ചെയ്തിട്ടില്ലെങ്കിലും എന്‍ഫോഴ്‌സ്‌മെന്റ് ഡയറക്ടറേറ്റിന്റെ കണ്ടെത്തലുകള്‍ അടിസ്ഥാനമാക്കിയാണ് പരാതി പൊലിസ് അന്വേഷിക്കുന്നത്.