കോഴിക്കോട്: കാന്‍സര്‍ ചികിത്സയിലിരിക്കെ ശസ്ത്രക്രിയയെക്കുറിച്ചുള്ള ആശങ്കയില്‍ യുവാവിനെ കാണാനില്ലെന്ന് പരാതി. താമരശ്ശേരി കൊട്ടാരക്കോത്ത് കാവുംപുറം സ്വദേശി നിഷാല്‍ സല്‍മാനെ (22) ആണ് ഇന്നലെ രാവിലെ മുതല്‍ കാണാതായത്. കെ.ടി സുലൈമാന്റെ മകനായ നിഷാല്‍ കഴിഞ്ഞ ആറുമാസമായി കാന്‍സര്‍ രോഗത്തിന് ചികിത്സയിലായിരുന്നു.

യുവാവിന്റെ കാലിനെ ബാധിച്ച അര്‍ബുദം ശ്വാസകോശത്തിലേക്ക് പടരാന്‍ സാധ്യതയുണ്ടെന്ന് കണ്ടതിനെത്തുടര്‍ന്ന്, കാല്‍ മുറിച്ചുമാറ്റണമെന്ന് ഡോക്ടര്‍മാര്‍ നിര്‍ദേശിച്ചിരുന്നു. ഇതില്‍ വലിയ മനോവിഷമത്തിലായിരുന്ന നിഷാല്‍ ഇന്നലെ രാവിലെ പത്തരയോടെയാണ് വീട്ടില്‍ നിന്നും ഇറങ്ങിയത്. ഫോണ്‍ കൈവശം കരുതാത്തത് അന്വേഷണത്തിന് വെല്ലുവിളിയാകുന്നുണ്ട്.

ബന്ധുക്കളുടെ പരാതിയെത്തുടര്‍ന്ന് താമരശ്ശേരി പൊലിസ് കേസെടുത്ത് അന്വേഷണം ആരംഭിച്ചു. ബസ് സ്റ്റാന്‍ഡുകള്‍, റെയില്‍വേ സ്റ്റേഷനുകള്‍ എന്നിവ കേന്ദ്രീകരിച്ചും പ്രദേശത്തെ സിസിടിവി ദൃശ്യങ്ങള്‍ പരിശോധിച്ചുമാണ് തിരച്ചില്‍ പുരോഗമിക്കുന്നത്.

A 22-year-old cancer patient from Kozhikode has gone missing from his home, allegedly distressed over the doctors' recommendation to amputate his leg to prevent the disease from spreading.