ന്യൂഡല്‍ഹി: ആം ആദ്മി വിട്ട് ബിജെപിയില്‍ ചേര്‍ന്ന രാഘവ് ഛദ്ദയുള്‍പ്പെടെയുള്ള എംപിമാര്‍ രാഷ്ട്രപതിയെ കാണാന്‍ ഒരുങ്ങുന്നതായി റിപ്പോര്‍ട്ട്. ബിജെപിയില്‍ ചേര്‍ന്നതിന് പിന്നാലെ പഞ്ചാബില്‍ തങ്ങള്‍ക്കെതിരെ രാഷ്ട്രീയ പകപോക്കല്‍ നടക്കുന്നുവെന്നാണ് എംപിമാരുടെ പരാതി. ഇതിനെതിരെ നടപടിയെടുക്കണമെന്ന് ആവശ്യപ്പെട്ട് മേയ് 5ന് രാഷ്ട്രപതിയെ കാണുമെന്നാണ് റിപ്പോര്‍ട്ട്. 

എംപിമാരുടെ കൂറുമാറ്റം പഞ്ചാബില്‍ വലിയ രാഷ്ട്രീയ പ്രതിസന്ധി സൃഷ്ടിച്ചിട്ടുണ്ട്. കൂറുമാറ്റ നിരോധന നിയമ പ്രകാരം ഏഴുപേരെയും അയോഗ്യരാക്കണമെന്നാണ് എഎപിയുടെ ആവശ്യം. എന്നാല്‍ മൂന്നില്‍ രണ്ടുഭാഗം എംപിമാര്‍ ബിജെപിയില്‍ എത്തിയതിനാല്‍ അയോഗ്യത ഭീഷണി നിലനില്‍ക്കില്ലെന്നതാണ് വസ്തുത. അതുകൊണ്ട് തന്നെ എംപിമാരുടെ സീറ്റുകള്‍ സുരക്ഷിതമാണ്.

ഇതിന് പ്രതികാരമായി തങ്ങളെ പഞ്ചാബിലെ ആംആദ്മി സര്‍ക്കാര്‍ വേട്ടയാടുകയാണെന്നാണ് എംപിമാരുടെ പരാതി. തങ്ങള്‍ക്കെതിരെ കേസുകള്‍ രജിസ്റ്റര്‍ ചെയ്യുകയാണെന്നും, എഎപി പ്രവര്‍ത്തകരെ ഉപയോഗിച്ച് വീടുകളും, ഓഫീസുകളും ആക്രമിക്കുകയാണെന്നും എംപിമാര്‍ ആരോപിക്കുന്നു. 

ALSO READ: ഐഐടി മദ്രാസില്‍ ജോലിയവസരം; തുടക്ക ശമ്പളം 45500; അപേക്ഷ മെയ് 11 വരെ 

എന്നാല്‍ ലയന പ്രക്രിയയില്‍ ഒപ്പുകളുടെ ആധികാരികതയിലും നടപടിക്രമങ്ങളിലും ക്രമക്കേടുണ്ടെന്ന് ആരോപിക്കുന്ന എഎപി നേതൃത്വം എംപിമാരെ തിരിച്ചുവിളിക്കണമെന്ന് രാഷ്ട്രപതിയോട് ആവശ്യപ്പെട്ടേക്കും. വന്‍തോതിലുള്ള ഇത്തരം കൂറുമാറ്റങ്ങള്‍ ജനാധിപത്യപരമായ ഉത്തരവാദിത്തങ്ങളെ തകര്‍ക്കുന്നുവെന്നാണ് പാര്‍ട്ടിയുടെ വാദം.

കഴിഞ്ഞ ദിവസം ആം ആദ്മി വിട്ട് ബിജെപിയില്‍ ചേര്‍ന്ന രാജ്യസഭാ എംപി സന്ദീപ് പഥക്കിനെതിരെ പഞ്ചാബ് പൊലിസ് കേസെടുത്തിരുന്നു. ജാമ്യമില്ലാ വകുപ്പ് ചുമത്തിയാണ് കേസ് രജിസ്റ്റര്‍ ചെയ്തത്. രണ്ട് ജില്ലകളിലായാണ് എഫ്.ഐ.ആര്‍ രജിസ്റ്റര്‍ ചെയ്തത്. ഏത് സംഭവത്തിലാണ് കേസ് രജിസ്റ്റര്‍ ചെയ്തതെന്ന് വ്യക്തമായിട്ടില്ല. 

പൊലിസ് നടപടിയില്‍ പ്രതിഷേധിച്ച് ബിജെപിയും, അകാലിദളും രംഗത്തെത്തി. പൊലിസിനെ ഉപയോഗിച്ച് പ്രതിപക്ഷത്തെ നിശബ്ദരാക്കാനാണ് പഞ്ചാബിലെ എഎപി സര്‍ക്കാര്‍ ശ്രമിക്കുന്നതെന്ന് ബിജെപി ആരോപിച്ചു. സംസ്ഥാനത്ത് രാഷ്ട്രീയ വേട്ടയാടലാണ് നടക്കുന്നതെന്നും, ഭഗവന്ത് മന്നിന്റെയും, അരവിന്ദ് കെജ് രിവാളിന്റെയും ഭയം പുറത്തുവന്നെന്നും ബിജെപി നേതാവ് അശ്വിനി ശര്‍മ പറഞ്ഞു. കെജ് രിവാള്‍ പൊലിസിനെ രാഷ്ട്രീയ ആയുധമാക്കുകയാണെന്നും ബിജെപി വിമര്‍ശിച്ചു. 

Reports suggest that MPs, including Raghav Chadha, who left the Aam Aadmi Party and joined the BJP, are preparing to meet the President.