ന്യൂഡൽഹി: ഇന്ത്യയിൽ ഒരേ രോഗത്തിന് സർക്കാർ സംവിധാനങ്ങളേക്കാൾ പത്തിരട്ടി വരെ തുക സ്വകാര്യ ആശുപത്രികൾ ഈടാക്കുന്നുണ്ടെന്ന് നാഷണൽ സ്റ്റാറ്റിസ്റ്റിക്കൽ ഓഫീസ് (NSO) കണ്ടെത്തി. 2025 ജനുവരി മുതൽ ഡിസംബർ വരെ നടത്തിയ വിപുലമായ സർവേയിലാണ് രാജ്യത്തെ ആരോഗ്യരംഗത്തെ ഈ വലിയ വിടവ് വെളിപ്പെട്ടത്. പ്രസവചികിത്സ, കാൻസർ, ഹൃദ്രോഗം തുടങ്ങിയ ഗുരുതരമായ അസുഖങ്ങളുടെ കാര്യത്തിലാണ് ഈ ചൂഷണം ഏറ്റവും പ്രകടമാകുന്നത്.

ചികിത്സാ ചിലവ്: സർക്കാരും സ്വകാര്യവും തമ്മിലുള്ള വമ്പൻ വ്യത്യാസം

റിപ്പോർട്ട് പ്രകാരം ഇന്ത്യയിൽ കിടത്തിച്ചികിത്സയ്ക്കുള്ള (In-patient) ശരാശരി ചിലവ് പരിശോധിച്ചാൽ ഞെട്ടിക്കുന്ന വിവരങ്ങളാണ് ലഭിക്കുന്നത്:

• സർക്കാർ ആശുപത്രികൾ: ശരാശരി ചിലവ് 6,631 രൂപ.
• സ്വകാര്യ ആശുപത്രികൾ: ശരാശരി ചിലവ് 50,508 രൂപ.

ചുരുക്കത്തിൽ, സർക്കാർ ആശുപത്രികളേക്കാൾ ഏകദേശം എട്ട് മടങ്ങിലധികം ചിലവാണ് സ്വകാര്യ മേഖലയിലുള്ളത്. കാൻസർ, ഹൃദ്രോഗം, വൃക്ക സംബന്ധമായ അസുഖങ്ങൾ എന്നിവയ്ക്ക് പലപ്പോഴും ചിലവ് ലക്ഷങ്ങൾ കവിയുന്നതായും റിപ്പോർട്ട് ചൂണ്ടിക്കാട്ടുന്നു.

• പ്രസവച്ചെലവ്: പത്തിരട്ടി മുതൽ പതിനഞ്ചിരട്ടി വരെ

സാധാരണ കുടുംബങ്ങളെ ഏറ്റവും കൂടുതൽ ബാധിക്കുന്നത് പ്രസവച്ചെലവുകളിലെ വർദ്ധനവാണ്.

• സർക്കാർ ആശുപത്രികളിൽ പ്രസവത്തിന് ശരാശരി ചിലവ് 2,299 രൂപ മാത്രമാണ്. 
• എന്നാൽ സ്വകാര്യ ആശുപത്രികളിൽ ഇത് 30,000 രൂപ മുതൽ 40,000 രൂപ വരെയായി ഉയരുന്നു.

നഗരപ്രദേശങ്ങളിൽ ജീവിക്കുന്നവർക്ക് ഈ സാമ്പത്തിക ഭാരം ഗ്രാമപ്രദേശങ്ങളെ അപേക്ഷിച്ച് ഇരട്ടിയാണ്. നഗരങ്ങളിൽ ശരാശരി ചികിത്സാ ചിലവ് 23,670 രൂപ ആയിരിക്കുമ്പോൾ ഗ്രാമങ്ങളിൽ ഇത് 11,609 രൂപ ആണ്.

ഔട്ട്പേഷ്യന്റ് ചികിത്സയും കീശ ചോർത്തുന്നു

ചെറിയ അസുഖങ്ങൾക്ക് പോലും സ്വകാര്യ മേഖല വലിയ തുക ഈടാക്കുന്നതായി സർവേ വ്യക്തമാക്കുന്നു.

• സർക്കാർ ആശുപത്രികൾ: ഒപി ചികിത്സയ്ക്ക് ശരാശരി ചിലവ് 289 രൂപ.
• സ്വകാര്യ ആശുപത്രികൾ: ശരാശരി ചിലവ് 1,447 രൂപ (ഏകദേശം അഞ്ചിരട്ടി).

രോഗനിരക്ക് വർദ്ധിക്കുന്നു; ചെറുപ്പക്കാരിലും ഹൃദ്രോഗം

കഴിഞ്ഞ 30 വർഷത്തിനിടെ ഇന്ത്യയിൽ രോഗനിരക്ക് ഇരട്ടിയായി വർദ്ധിച്ചുവെന്ന് റിപ്പോർട്ട് പറയുന്നു. സർവേ കാലയളവിൽ രാജ്യത്തെ എട്ട് പേരിൽ ഒരാൾക്ക് രോഗമുണ്ടായിരുന്നു. പ്രത്യേകിച്ച് 15-നും 29-നും ഇടയിലുള്ള ചെറുപ്പക്കാർക്കിടയിൽ ഹൃദ്രോഗം കുത്തനെ കൂടുന്നത് വലിയ ആശങ്കയുണ്ടാക്കുന്നു.

കേരളമുൾപ്പെടെയുള്ള ദക്ഷിണേന്ത്യൻ സംസ്ഥാനങ്ങളിൽ ചിലവ് കൂടുതൽ

സംസ്ഥാനങ്ങൾ തിരിച്ചുള്ള കണക്കെടുത്താൽ ദക്ഷിണേന്ത്യയിലാണ് ചികിത്സാ ചിലവ് ഏറ്റവും കൂടുതൽ.

• തെലങ്കാന: 55,000 രൂപ
• തമിഴ്‌നാട്: 52,000 രൂപ
• കേരളം, കർണാടക: 40,000 രൂപ മുതൽ 45,000 രൂപ വരെ.

ദക്ഷിണേന്ത്യൻ സംസ്ഥാനങ്ങളിൽ സ്വകാര്യ ആശുപത്രികളെ ആശ്രയിക്കുന്നവരുടെ എണ്ണം കൂടുതലായതാണ് ഇതിന് പ്രധാന കാരണം. നേരേമറിച്ച്, സർക്കാർ സംവിധാനങ്ങൾ ശക്തമായ വടക്കുകിഴക്കൻ സംസ്ഥാനങ്ങളിൽ ചിലവ് താരതമ്യേന കുറവാണ്.

ഇന്ത്യയിലെ ആരോഗ്യമേഖല ഇപ്പോഴും സാധാരണക്കാരന്റെ പോക്കറ്റിന് താങ്ങാവുന്നതിലും അപ്പുറമാണെന്നും, സർക്കാർ ആരോഗ്യ സേവനങ്ങളുടെ ഗുണനിലവാരവും ലഭ്യതയും വർദ്ധിപ്പിക്കേണ്ടത് അനിവാര്യമാണെന്നും എൻഎസ്ഒ റിപ്പോർട്ട് ഓർമ്മിപ്പിക്കുന്നു.