ചെന്നൈ: തമിഴ്‌നാട് മുഖ്യമന്ത്രി വിജയ്ക്ക് രാജ്യത്തിന്റെ പ്രധാനമന്ത്രിയാകുമെന്ന് പ്രവചിച്ച് ജ്യോതിഷി റിക്കി രാധന്‍ പണ്ഡിറ്റ് വെട്രിവേല്‍. നരേന്ദ്ര മോദിയുടെ ജാതകത്തിന്റെ ഫോട്ടോസ്റ്റാറ്റ് കോപ്പി ആണ് വിജയ്‌യുടേത്. അതുകൊണ്ട് തന്നെ വിജയ്‌യ്ക്ക് പ്രധാനമന്ത്രി സ്ഥാനത്തേക്ക് എത്താന്‍ സാധ്യതയുണ്ടെന്നും വെട്രിവേല്‍ പറഞ്ഞു. 

തന്നെ ഓഫീസര്‍ ഓണ്‍ സ്‌പെഷ്യല്‍ ഡ്യൂട്ടി പദവിയില്‍ നിയമിച്ചതിന് പിന്നില്‍ അന്ധവിശ്വാസമല്ലെന്ന് വെട്രിവേല്‍ കൂട്ടിച്ചേര്‍ത്തു. വിജയ്ക്ക് ജ്യോതിഷത്തില്‍ വിശ്വാസമില്ല. സ്‌നേഹം കാരണമാണ് തനിക്ക് പദവി നല്‍കിയതെന്നും അദ്ദേഹം കൂട്ടിച്ചേര്‍ത്തു. 

തമിഴനാട് മുഖ്യമന്ത്രിയായി പദവിയേറ്റെടുത്തതിന് പിന്നാലെയാണ് വിവാദ ജ്യോതിഷി രാധന്‍ പണ്ഡിറ്റിനെ വിജയ് സര്‍ക്കാര്‍ പദവിയില്‍ നിയമിച്ചത്. നിയമനത്തിന് പിന്നാലെ തമിഴ്‌നാട്ടിലുടനീളം വലിയ പ്രതിഷേധം ഉയര്‍ന്നു. നിയമനം നിയമവിരുദ്ധമാണെന്ന് ചൂണ്ടിക്കാട്ടി ഹൈക്കോടതിയില്‍ ഹരജി നല്‍കിയിരുന്നു. 

ഹരജി പരിഗണിക്കാനിരിക്കെ  നിയമനം റദ്ദാക്കിയതായി തമിഴ്‌നാട് സര്‍ക്കാര്‍ അറിയിച്ചു. വിജയ് അന്ധവിശ്വാസം പ്രോത്സാഹിപ്പിക്കുന്നു എന്നതായിരുന്നു പ്രധാന വിമര്‍ശനം. വെട്രിവേലിന്റെ നിയമനത്തിനെതിരെ ഘടകക്ഷികളായ, സിപിഎം, വിസികെ എന്നിവരും രംഗത്തെത്തിയിരുന്നു.