മസ്‌കത്ത്: രാജ്യത്തിന്റെ സമഗ്ര ഡിജിറ്റല്‍ പരിവര്‍ത്തനത്തിന്റെ ഭാഗമായി പ്രവാസികള്‍ക്കായുള്ള സേവനങ്ങള്‍ കൂടുതല്‍ ലളിതമാക്കി ഒമാന്‍. റോയല്‍ ഒമാന്‍ പൊലീസും സിവില്‍ സ്റ്റേറ്റസ് മന്ത്രാലയവും സംയുക്തമായി നടപ്പിലാക്കുന്ന പുതിയ സംവിധാനങ്ങളിലൂടെ വിസ, ഐഡി കാര്‍ഡ് നടപടികള്‍ പൂര്‍ണ്ണമായും ഓണ്‍ലൈന്‍ പ്ലാറ്റ്‌ഫോമുകളിലേക്ക് മാറുന്നു.
റോയല്‍ ഒമാന്‍ പോലീസിന്റെ പരിഷ്‌കരിച്ച മൊബൈല്‍ ആപ്ലിക്കേഷന്‍ വഴി പ്രവാസികള്‍ക്ക് ഇപ്പോള്‍ റെസിഡന്‍സി വിസ പുതുക്കല്‍ നടപടികള്‍ വേഗത്തില്‍ പൂര്‍ത്തിയാക്കാം. സ്‌പോണ്‍സര്‍മാര്‍ക്കും കമ്പനികള്‍ക്കും ഓഫീസുകള്‍ നേരിട്ട് സന്ദര്‍ശിക്കാതെ തന്നെ വിസ ഫീസ് അടയ്ക്കാനും ആവശ്യമായ രേഖകള്‍ അപ്‌ലോഡ് ചെയ്യാനും ഈ സംവിധാനം സൗകര്യമൊരുക്കുന്നു. മെഡിക്കല്‍ റിപ്പോര്‍ട്ടുകള്‍ ഡിജിറ്റല്‍ വഴി ആര്‍.ഒ.പി സിസ്റ്റവുമായി ബന്ധിപ്പിച്ചതിനാല്‍, ആരോഗ്യ പരിശോധനാ ഫലങ്ങള്‍ ലഭിച്ചാലുടന്‍ വിസ നടപടികള്‍ ആരംഭിക്കാന്‍ സാധിക്കും.
യാത്രാ നടപടികള്‍ സുഗമമാക്കുന്നതിന്റെ ഭാഗമായി മസ്‌കത്ത് രാജ്യാന്തര വിമാനത്താവളത്തിലും സലാല വിമാനത്താവളത്തിലും സ്മാര്‍ട്ട് ഗേറ്റുകളുടെ എണ്ണം വര്‍ദ്ധിപ്പിച്ചു. പ്രവാസികള്‍ക്ക് അവരുടെ റെസിഡന്റ് കാര്‍ഡ് അല്ലെങ്കില്‍ പാസ്‌പോര്‍ട്ട് ഉപയോഗിച്ച് എമിഗ്രേഷന്‍ കൗണ്ടറുകളില്‍ നില്‍ക്കാതെ തന്നെ നിമിഷങ്ങള്‍ക്കുള്ളില്‍ യാത്ര നടപടികള്‍ പൂര്‍ത്തിയാക്കാം. തിരക്കേറിയ സമയങ്ങളില്‍ വിമാനത്താവളങ്ങളിലെ ക്യൂ ഒഴിവാക്കാന്‍ ഇത് വളരെയധികം സഹായിക്കുന്നുണ്ട്.
സിവില്‍ സ്റ്റേറ്റസ് വിഭാഗത്തിന്റെ പുതിയ ഓണ്‍ലൈന്‍ പോര്‍ട്ടല്‍ വഴി ഐഡി കാര്‍ഡ് പുതുക്കുന്നതിനും വ്യക്തിഗത വിവരങ്ങളില്‍ മാറ്റം വരുത്തുന്നതിനും സൗകര്യമുണ്ട്. പ്രവാസികള്‍ക്ക് അവരുടെ ബയോമെട്രിക് വിവരങ്ങള്‍ അപ്‌ഡേറ്റ് ചെയ്യാനും ഡിജിറ്റല്‍ പകര്‍പ്പുകള്‍ ഡൗണ്‍ലോഡ് ചെയ്യാനും സാധിക്കും. പുതിയതായി ജോലിക്ക് എത്തുന്ന പ്രവാസികള്‍ക്ക് തൊഴില്‍ വിസ നടപടികള്‍ വേഗത്തിലാക്കാന്‍ ലേബര്‍ മന്ത്രാലയവുമായി സഹകരിച്ച് ഏകീകൃത ഡിജിറ്റല്‍ വിന്‍ഡോയും ഒമാന്‍ നടപ്പിലാക്കി വരുന്നു.
സമയലാഭത്തോടൊപ്പം സേവനങ്ങളിലെ സുതാര്യതയും ഉറപ്പുവരുത്താന്‍ ഈ ഡിജിറ്റല്‍ മുന്നേറ്റത്തിലൂടെ സാധിക്കുമെന്ന് അധികൃതര്‍ വ്യക്തമാക്കി. വരും മാസങ്ങളില്‍ കൂടുതല്‍ സേവനങ്ങള്‍ സ്മാര്‍ട്ട് ഫോണുകളിലൂടെ ലഭ്യമാക്കാനാണ് ഒമാന്‍ ലക്ഷ്യമിടുന്നത്.

Oman has accelerated its comprehensive digital transformation, making essential administrative processes like visa and ID card renewals completely online for expatriates. This joint initiative by the Royal Oman Police (ROP) and the Civil Status authorities aims to eliminate the need for physical office visits.