ന്യൂഡൽഹി: പാർലമെന്ററി സമിതിയെയും പാർലമെന്റ് അംഗങ്ങളെയും അപകീർത്തിപ്പെടുത്തുന്ന രീതിയിൽ പരാമർശം നടത്തിയ കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാനെതിരെ കോൺഗ്രസ് ചീഫ് വിപ്പ് ജയറാം ര മേശ് അവകാശലംഘന നോട്ടീസ് നൽകി.

രാജ്യസഭ അധ്യക്ഷൻ സി.പി. രാധാകൃഷ്ണന് നൽകിയ നോട്ടീസിൽ, നീറ്റ്‌ യു.ജി പരീക്ഷാ ക്രമക്കേടുകളുമായി ബന്ധപ്പെട്ട് മേയ് 15ന് നടത്തിയ വാർത്താസമ്മേളനത്തിലെ മന്ത്രിയുടെ പരാമർശങ്ങൾ പാർലമെന്റിന്റെ അന്തസ്സിന് നിരക്കാത്തതാണെന്ന് ചൂണ്ടിക്കാട്ടിയാണ് നടപടി. രാജ്യസഭാ ചട്ടങ്ങളിലെ 187ാം റൂൾ പ്രകാരമാണ് സഭാ അധ്യക്ഷൻ സി.പി. രാധാകൃഷ്ണന് നോട്ടീസ് നൽകിയത്. 

നാഷണൽ ടെസ്റ്റിങ് ഏജൻസിയുടെ (എൻ.ടി.എ) വീഴ്ചകളെക്കുറിച്ച് പാർലമെന്ററി സമിതി നൽകിയ മുന്നറിയിപ്പുകൾ നടപ്പാക്കാത്തതിനെക്കുറിച്ചുള്ള ചോദ്യത്തിന് മറുപടിയായാണ് കേന്ദ്ര മന്ത്രിയുടെ വിവാദ മറുപടി. പ്രതിപക്ഷ അംഗങ്ങൾ ഉൾപ്പെട്ട സമിതികൾ ചില താൽപര്യങ്ങളോടെയാണ് കാര്യങ്ങൾ റിപ്പോർട്ട് ചെയ്യുന്നതെന്നും അതിനാൽ സമിതിയുടെ റിപ്പോർട്ടിനെക്കുറിച്ച് പ്രതികരിക്കില്ലെന്നുമായിരുന്നു മന്ത്രിയുടെ പരാമർശം.

ALSO READ: മമതയുടെ കാലത്തെ അഴിമതി-സ്ത്രീപീഡന കേസുകളിൽ പുനരന്വേഷണം പ്രഖ്യാപിച്ച് ബം​ഗാൾ സർക്കാർ; വിരമിച്ച ജഡ്ജിമാരുടെ നേതൃത്വത്തിൽ സമിതി രൂപീകരിച്ചതായി സുവേന്ദു അധികാരി 

ഇതിനെതിരെ ശക്തമായ പ്രതിഷേധവുമായി പ്രതിപക്ഷം രംഗത്തെത്തി. എല്ലാ രാഷ്ട്രീയ പാർട്ടികളിലെയും അംഗങ്ങൾ ഉൾപ്പെടുന്ന പാർലമെന്ററി സമിതികളെ 'മിനി പാർലമെന്റ്' എന്നാണ് വിശേഷിപ്പിക്കാറുള്ളതെന്ന് ജയറാം രമേശ് നോട്ടീസിൽ ചൂണ്ടിക്കാട്ടി.

സമിതി അംഗങ്ങൾക്ക് ദുരുദ്ദേശ്യം ആരോപിച്ചതിലൂടെ മന്ത്രി പാർലമെന്ററി ജനാധിപത്യത്തെയും ഭരണഘടനയെയും അവഹേളിച്ചുവെന്നും അദ്ദേഹം പറഞ്ഞു. വിദ്യാഭ്യാസ മന്ത്രാലയത്തിലെ വീഴ്ചകൾ മറച്ചുവെക്കാനാണ് മന്ത്രി പാർലമെന്റിനെ നിസ്സാരവത്കരിക്കുന്നതെന്നും ജയറാം രമേശ് ആരോപിച്ചു.

പാർലമെന്ററി സമിതികളെ അധിക്ഷേപിക്കുന്നത് സഭയെ മുഴുവൻ അപമാനിക്കുന്നതിന് തുല്യമാണെന്നും അതിനാൽ കേന്ദ്ര മന്ത്രിക്കെതിരെ അടിയന്തരമായി അവകാശലംഘന നടപടി സ്വീകരിക്കണമെന്നും അദ്ദേഹം ആവശ്യപ്പെട്ടു.