റിയാദ്: ഇത്തവണത്തെ ഹജ്ജ് (Hajj 2026) തീര്‍ഥാടകര്‍ക്കുള്ള പെര്‍മിറ്റുകള്‍ തവക്കല്‍നാ (Tawakkalna) ആപ്പ് വഴി ലഭ്യമാക്കിത്തുടങ്ങി. തീര്‍ഥാടകര്‍ക്ക് പെര്‍മിറ്റുകള്‍ എളുപ്പത്തില്‍ പരിശോധിക്കാനും ഡിജിറ്റല്‍ സേവനങ്ങളുടെ കാര്യക്ഷമത വര്‍ധിപ്പിക്കാനും ലക്ഷ്യമിട്ടാണ് സൗദി ഭരണകൂടത്തിന്റെ ഈ നടപടി.

തീര്‍ഥാടകര്‍ക്ക് പുറമെ 2026ലെ ഹജ്ജ് സീസണില്‍ സേവനമനുഷ്ഠിക്കുന്ന ജീവനക്കാര്‍, മക്കയിലെ താമസക്കാര്‍, സ്വകാര്യ മേഖലയിലെ ജീവനക്കാര്‍, ഗാര്‍ഹിക തൊഴിലാളികള്‍ എന്നിവര്‍ക്കും ഈ സേവനം പ്രയോജനപ്പെടുത്താം. മക്കയിലേക്കും മറ്റ് പുണ്യസ്ഥലങ്ങളിലേക്കുമുള്ള പ്രവേശനം ക്രമീകരിക്കുന്നതിനും സുഗമമാക്കുന്നതിനുമാണ് ആപ്പ് വഴി പെര്‍മിറ്റുകള്‍ ലഭ്യമാക്കുന്നത്.

തീര്‍ഥാടകരുടെ പെര്‍മിറ്റുകള്‍, മക്കയിലെ ജീവനക്കാര്‍ക്കുള്ള എന്‍ട്രി പെര്‍മിറ്റ്, പുണ്യസ്ഥലങ്ങളില്‍ ജോലി ചെയ്യുന്നവര്‍ക്കുള്ള പ്രത്യേക അനുമതിപത്രം, ഗാര്‍ഹിക-സ്വകാര്യ മേഖലയിലെ തൊഴിലാളികള്‍ക്കുള്ള പെര്‍മിറ്റുകള്‍, വോളന്റിയര്‍മാര്‍ക്കുള്ള അനുമതി, വാഹന പെര്‍മിറ്റുകള്‍ തുടങ്ങിയവയെല്ലാം തവക്കല്‍നാ ആപ്പിലൂടെ പരിശോധിക്കാന്‍ സാധിക്കും.

വിവിധ രാജ്യക്കാരായ തീര്‍ഥാടകര്‍ക്കും താമസക്കാര്‍ക്കുമായി മലയാളം ഉള്‍പ്പെടെ 19 ഭാഷകളില്‍ തവക്കല്‍നാ ആപ്പ് ലഭ്യമാണ്. മുന്നൂറ്റമ്പതിലധികം സര്‍ക്കാര്‍ സ്ഥാപനങ്ങളുമായി സഹകരിച്ച് പേഴ്സണല്‍, ഹെല്‍ത്ത്, എജ്യുക്കേഷന്‍, ടൂറിസം തുടങ്ങി വിവിധ മേഖലകളിലെ 1300-ലധികം സേവനങ്ങളാണ് ഈ ആപ്പിലൂടെ നിലവില്‍ നല്‍കുന്നത്.

3.6 കോടിയിലധികം ഉപയോക്താക്കളുള്ള തവക്കല്‍നാ ആപ്പ് ആപ്പ് സ്റ്റോര്‍, ഗൂഗിള്‍ പ്ലേ, ആപ്പ് ഗാലറി, ഗാലക്സി സ്റ്റോര്‍ എന്നിവയിലൂടെ ഡൗണ്‍ലോഡ് ചെയ്യാവുന്നതാണ്.

English summary : The Saudi Arabia national integrated Tawakkalna application has enabled pilgrims to view Hajj permits through the app, allowing beneficiaries to access permits easily during the Hajj season and facilitating the spiritual journey of pilgrims while enhancing the efficiency of the digital services provided to them.