തിരുവനന്തപുരം: രാഷ്ട്രീയകേന്ദ്രങ്ങളില്‍ എക്കാലത്തും ചര്‍ച്ചയാകാറുള്ള ഔദ്യോഗിക വസതിയായ 'മന്‍മോഹന്‍ ബംഗ്ലാവ്' ഇക്കുറി വി.ഡി സതീശന്‍ മന്ത്രിസഭയിലെ ഏറ്റവും പ്രായം കുറഞ്ഞ മന്ത്രിയായ ഒ.ജെ ജനീഷിന്. ഇവിടെ താമസിക്കുന്നവര്‍ക്ക് പിന്നീട് രാഷ്ട്രീയ തിരിച്ചടികള്‍ നേരിടേണ്ടി വരുമെന്ന തരത്തിലുള്ള അന്ധവിശ്വാസങ്ങളെ അപ്പാടെ തള്ളിക്കളഞ്ഞുകൊണ്ടാണ് യുവമന്ത്രിയുടെ ഈ തീരുമാനം.

തിരുവിതാംകൂര്‍ രാജാവായിരുന്ന ശ്രീമൂലം തിരുനാള്‍ പണികഴിപ്പിച്ച മന്‍മോഹന്‍ ബംഗ്ലാവിന് ചരിത്രത്തില്‍ വലിയ സ്ഥാനമാണുള്ളത്. ജനാധിപത്യ സര്‍ക്കാരുകളുടെ കാലത്ത് ഇത് മന്ത്രി മന്ദിരമായി മാറുകയായിരുന്നു. 

വിവാദങ്ങളും ചരിത്രവും

2006ലെ വി.എസ് അച്യുതാനന്ദന്‍ സര്‍ക്കാരിന്റെ കാലത്താണ് ഈ മന്ദിരത്തെച്ചൊല്ലി വിവാദങ്ങള്‍ പുകഞ്ഞു തുടങ്ങിയത്. തുടക്കം അന്ന് ആഭ്യന്തര മന്ത്രിയായിരുന്ന കോടിയേരി ബാലകൃഷ്ണന്‍ വാസ്തുദോഷം മാറ്റാനെന്ന പേരില്‍ ലക്ഷങ്ങള്‍ മുടക്കി കെട്ടിടം മോടി പിടിപ്പിച്ചത് വലിയ ചര്‍ച്ചയായിരുന്നു. പിന്നീട് അദ്ദേഹം ഈ വസതി ഒഴിഞ്ഞു.

കോടിയേരിക്ക് ശേഷം ഇവിടെ താമസിച്ച ടി.യു കുരുവിളയ്ക്ക് ഭൂമിയിടപാട് വിവാദത്തില്‍പ്പെട്ട് രാജിവയ്‌ക്കേണ്ടി വന്നു. തുടര്‍ന്നു വന്ന മോന്‍സ് ജോസഫിന്, പി.ജെ ജോസഫ് തിരിച്ചെത്തിയതോടെ മന്ത്രിസ്ഥാനവും വസതിയും ഒഴിയേണ്ടി വന്നു.
എന്നാല്‍ ഈ 'ശാപക്കഥകള്‍' വെറും ഭാവനയാണെന്ന് തെളിയിച്ചവരുമുണ്ട്.

ഉമ്മന്‍ചാണ്ടി സര്‍ക്കാരിന്റെ കാലത്ത് ആര്യാടന്‍ മുഹമ്മദും ഒന്നാം പിണറായി സര്‍ക്കാരിന്റെ കാലത്ത് ഡോ. ടി.എം തോമസ് ഐസകും അഞ്ച് വര്‍ഷം പൂര്‍ത്തിയാക്കിയത് ഇവിടെ താമസിച്ചായിരുന്നു. ഏറ്റവും ഒടുവില്‍ ആന്റണി രാജുവാണ് ഈ ബംഗ്ലാവിലുണ്ടായിരുന്നത്. ഇവിടെ നിന്നും ഒഴിഞ്ഞ പലരും പിന്നീട് വന്‍ ഭൂരിപക്ഷത്തില്‍ നിയമസഭയിലേക്ക് തെരഞ്ഞെടുക്കപ്പെട്ടിട്ടുമുണ്ട്.

മന്ത്രിമാരും വസതികളും

വി.ഡി സതീശന്‍ (മുഖ്യമന്ത്രി)- ക്ലിഫ് ഹൗസ്

പി.കെ കുഞ്ഞാലിക്കുട്ടി -ലൈന്‍ട്രസ്റ്റ്

മേശ് ചെന്നിത്തല- പമ്പ

മോന്‍സ് ജോസഫ്- പെരിയാര്‍

ഷിബു ബേബി ജോണ്‍- എസ്സെന്‍ഡേന്‍

സി.പി ജോണ്‍- റോസ് ഹൗസ് 

സണ്ണി ജോസഫ്-അശോക

കെ. മുരളീധരന്‍ -സാനഡു

എ.പി അനില്‍ കുമാര്‍- കാവേരി

എന്‍. ഷംസുദീന്‍- നെസ്റ്റ്

കെ.എം ഷാജി- പൗര്‍ണമി

പി.സി വിഷ്ണുനാഥ്- നിള

എം. ലിജു-അജന്ത

റോജി എം. ജോണ്‍-ഗ്രേസ്

ടി. സിദ്ദീഖ് -ഗംഗ

പി.കെ ബഷീര്‍-ഉഷസ്

ഇ. അബ്ദുല്‍ ഗഫൂര്‍-കവടിയാര്‍ ഹൗസ്

കെ.എ തുളസി-പ്രശാന്ത്

ബിന്ദു കൃഷ്ണ-തൈക്കാട് ഹൗസ്

ഒ.ജെ ജനീഷ്- മന്‍മോഹന്‍ ബംഗ്ലാവ്

Minister O.J. Janeesh has chosen the historically significant yet myth-ridden 'Manmohan Bungalow' as his official residence, defying long-standing political superstitions as the new Kerala cabinet gets their official quarters allotted.