തിരുവനന്തപുരം: പനവൂര്‍ കരിക്കുഴിയില്‍ ഒന്നര വയസ്സുകാരന്‍ മരിച്ച സംഭവം അതിക്രൂരമായ കൊലപാതകമെന്ന് പൊലിസ്. അര്‍ഷിത് എന്ന കുഞ്ഞിന്റെ മരണം കടുത്ത ശാരീരിക പീഡനങ്ങളെത്തുടര്‍ന്നാണെന്ന് പോസ്റ്റ്‌മോര്‍ട്ടം റിപോര്‍ട്ടില്‍ വ്യക്തമായി. കുട്ടിയുടെ ശരീരത്തില്‍ ജനനേന്ദ്രിയം ഉള്‍പ്പെടെ 51 ഇടങ്ങളില്‍ പുതിയതും പഴകിയതുമായ മുറിവുകളും ചതവുകളുമാണ് കണ്ടെത്തിയിട്ടുള്ളത്. സംഭവവുമായി ബന്ധപ്പെട്ട് കുട്ടിയുടെ അമ്മ അഖില, ഇവരുടെ കൂടെ താമസിക്കുന്ന സുഹൃത്ത് അഷ്‌കര്‍ എന്നിവരെ നെടുമങ്ങാട് പൊലിസ് അറസ്റ്റ് ചെയ്തു.

പ്രതിയായ അഷ്‌കര്‍ കുഞ്ഞിനെ നിരന്തരമായി ഉപദ്രവിക്കാറുണ്ടായിരുന്നുവെന്ന് പൊലിസ് അന്വേഷണത്തില്‍ വ്യക്തമായി. ക്രൂരമായ മര്‍ദനമേറ്റതിനെത്തുടര്‍ന്നാണ് കുഞ്ഞ് ആഹാരം ഛര്‍ദിച്ചത്. കുട്ടിയുടെ കാല്‍പ്പാദങ്ങളിലും വിരലുകളിലും പൊള്ളലേറ്റതിന് സമാനമായ മുറിവുകളുണ്ട്. കുറച്ചുദിവസങ്ങള്‍ക്ക് മുന്‍പ് കുഞ്ഞിന്റെ കൈ ഒടിഞ്ഞിരുന്നതായും കണ്ടെത്തിയിട്ടുണ്ട്. എന്നാല്‍ സൈക്കിളില്‍ നിന്ന് വീണ് പരിക്ക് പറ്റിയതാണെന്നാണ് അഷ്‌കര്‍ നാട്ടുകാരെ ധരിപ്പിച്ചിരുന്നത്.

ആശുപത്രിയിലെത്തിക്കുമ്പോഴേക്കും മരണം സംഭവിച്ചു
കരിക്കുഴിയില്‍ വാടകയ്ക്ക് താമസിക്കുന്ന അഖിലയുടെ മകനാണ് മരിച്ച അര്‍ഷിത്. കഴിഞ്ഞ വെള്ളിയാഴ്ച വൈകീട്ടാണ് അബോധാവസ്ഥയിലായ കുഞ്ഞിനെ അഷ്‌കര്‍ ആദ്യം പനവൂരിലെ സ്വകാര്യ ആശുപത്രിയിലും പിന്നീട് തിരുവനന്തപുരം എസ്.എ.ടി ആശുപത്രിയിലും എത്തിച്ചത്. എന്നാല്‍ ആശുപത്രിയില്‍ എത്തിക്കുന്നതിന് മുന്‍പ് തന്നെ കുഞ്ഞ് മരണപ്പെട്ടിരുന്നു. ഭക്ഷണം കഴിച്ചതിന് പിന്നാലെ ചുമയ്ക്കുകയും ഛര്‍ദിക്കുകയും ചെയ്ത് കുഞ്ഞ് അവശനായെന്നാണ് അഷ്‌കര്‍ പൊലിസിന് നല്‍കിയ മൊഴി. ഈ സമയത്ത് അഖില ഒരു നൃത്ത പരിപാടിക്കായി തമിഴ്‌നാട്ടിലായിരുന്നു.

രണ്ട് വര്‍ഷം മുമ്പ് അഖില ഗര്‍ഭിണിയായിരിക്കെ ഭര്‍ത്താവ് ആത്മഹത്യ ചെയ്തിരുന്നു. ഇതിന് ശേഷമാണ് ഇവര്‍ ഡ്രൈവറായ അഷ്‌കറിനൊപ്പം താമസം തുടങ്ങിയത്. എട്ട് മാസം മുമ്പാണ് ഇവര്‍ പനവൂരിലേക്ക് താമസം മാറിയത്.

അതേസമയം, കുഞ്ഞിന്റെ മരണത്തില്‍ വന്‍ ദുരൂഹതയുണ്ടെന്ന് അഖിലയുടെ ആദ്യ ഭര്‍ത്താവിന്റെ കുടുംബം ആരോപിച്ചു. കേസില്‍ കൂടുതല്‍ പേര്‍ക്ക് പങ്കുണ്ടോയെന്ന് അന്വേഷിച്ചുവരികയാണെന്ന് നെടുമങ്ങാട് ഡിവൈ.എസ്.പി കെ. ബൈജുകുമാര്‍ അറിയിച്ചു. പോസ്റ്റ്‌മോര്‍ട്ടത്തിന് ശേഷം കുട്ടിയുടെ മൃതദേഹം അഖിലയുടെ ആദ്യ ഭര്‍ത്താവിന്റെ തറവാട്ട് വീട്ടിലേക്ക് കൊണ്ടുപോയി.

A one-and-a-half-year-old boy in Panavoor died of severe physical abuse, with the post-mortem report confirming 51 injuries, leading to the arrest of his mother and her live-in partner.