തിരുവനന്തപുരം: വൈദ്യുതി മന്ത്രി സണ്ണി ജോസഫിന്റെ പേഴ്‌സണല്‍ സ്റ്റാഫില്‍ ബന്ധു നിയമനം. സണ്ണി ജോസഫിന്റെ സഹോദരി ഭര്‍ത്താവും കോണ്‍ഗ്രസ് നേതാവുമായ ബെന്നി തോമസിനെ അഡീഷണല്‍ പ്രൈവറ്റ് സെക്രട്ടറിയായാണ് നിയമിച്ചത്.

ഇന്നലെ വൈകീട്ടോടെയാണ് സ്റ്റാഫ് അംഗങ്ങളുടെ ലിസ്റ്റ് പുറത്തുവിട്ടത്. പാര്‍ട്ടി ഭാരവാഹികളായ നിരവധിപേരുടെ അപേക്ഷ തള്ളിയാണ് ബെന്നി തോമസിനെ ഈ സ്ഥാനത്ത് നിയമിച്ചത്. കണ്ണൂര്‍ ഉളുക്കല്‍ സ്വദേശിയായ ബെന്നി നിലവില്‍ കണ്ണൂര്‍ ഡി.സി.സി ജനറല്‍ സെക്രട്ടറിയാണ്. 

കഴിഞ്ഞ എല്‍.ഡി.എഫ് സര്‍ക്കാരിന്റെ കാലത്തുണ്ടായ ബന്ധുനിയമന വിവാദങ്ങളില്‍ യു.ഡി.എഫ് സംസ്ഥാനവ്യാപകമായി വലിയ പ്രക്ഷോഭങ്ങള്‍ സംഘടിപ്പിച്ചിരുന്നു.അതേ മുന്നണിയില്‍ തന്നെ ബന്ധുനിയമനം വന്നത് വിമര്‍ശനങ്ങള്‍ക്കിടയാക്കിയിട്ടുണ്ട്.