കോഴിക്കോട്: സ്നേഹവും കരുതലും ഒത്തുചേരുമ്പോൾ ഒരു കുടുംബത്തിന് പ്രകൃതിയെ എങ്ങനെ ഹരിതാഭമാക്കാം എന്നതിന്റെ ജീവിക്കുന്ന മാതൃകയാവുകയാണ് ഈ ഉപ്പയും മകളും. കോഴിക്കോട് താമരശ്ശേരി സ്വദേശിയായ ഒ. അബ്ദുൽ റഷീദും മകൾ നൂറ സൈനബും ചേർന്ന് രൂപീകരിച്ച 'പ്ലാന്റ്സ് അവർ പാഷൻ' (Plants Our Passion) എന്ന കൂട്ടായ്മ ഇന്ന് ലോകമെമ്പാടും പച്ചപ്പ് പടർത്തുകയാണ്. ലോകത്തിന്റെ വിവിധ കോണുകളിലായി ഒരു ലക്ഷം വൃക്ഷത്തൈകൾ നട്ടുപിടിപ്പിക്കുക എന്ന വലിയൊരു സ്വപ്നമാണ് ഈ ഉപ്പയും മകളും ഇതിനകം യാഥാർഥ്യമാക്കിയത്.

തന്റെ ഉമ്മയിൽ നിന്ന് ലഭിച്ച പ്രകൃതിസ്നേഹം അബ്ദുൽ റഷീദ് മകൾ നൂറയ്ക്ക് പകർന്നു നൽകിയതോടെയാണ് ഈ ഹരിതയാത്രയ്ക്ക് തുടക്കമാകുന്നത്. 2017-ൽ രൂപീകരിച്ച കൂട്ടായ്മയിൽ പിതാവ് ചീഫ് കോർഡിനേറ്ററായും മകൾ വൈസ് കോർഡിനേറ്ററായും ഒരേ മനസ്സോടെ പ്രവർത്തിക്കുന്നു. 

ഇന്ന് കേരളത്തിന് പുറമെ സൗദി അറേബ്യ, യു.എ.ഇ തുടങ്ങിയ രാജ്യങ്ങളിലെ പ്രകൃതിസ്നേഹികളെക്കൂടി ഒപ്പം നിർത്തിയാണ് ഈ അച്ഛൻ-മകൾ കൂട്ടുകെട്ട് മുന്നോട്ട് പോകുന്നത്. കേവലം തൈകൾ സൗജന്യമായി വിതരണം ചെയ്യുക മാത്രമല്ല ഇവർ ചെയ്യുന്നത്. തങ്ങൾ നൽകുന്ന തൈകൾ മക്കളെപ്പോലെ വളർത്തുന്നുണ്ടോ എന്ന് ഉറപ്പുവരുത്തുന്ന 'പ്ലാന്റ് ട്രാക്കിങ്' രീതിയും ഇവർ വികസിപ്പിച്ചെടുത്തിട്ടുണ്ട്. അത്തി, അരയാൽ തുടങ്ങിയ വലിയ മരങ്ങൾ വെച്ചുപിടിപ്പിക്കുന്ന 'ദി മില്ലേനിയം ട്രീ', സ്നേഹസമ്മാനമായി റോസാച്ചെടികൾ നൽകുന്ന 'ലിവിങ് റോസ് ടു ലവിങ് വൺസ്' തുടങ്ങിയ വ്യത്യസ്തമായ ആശയങ്ങൾ ഈ അച്ഛന്റെയും മകളുടെയും ചിന്തയിൽ വിരിഞ്ഞതാണ്.

'മിഷൻ യു.എ.ഇ', 'മിഷൻ മദീന' എന്നീ ആഗോള ദൗത്യങ്ങളിലൂടെ വിദേശമണ്ണിലും ഇവർ പച്ചപ്പ് പടർത്തിക്കഴിഞ്ഞു. ആവശ്യക്കാർക്ക് തൈകൾ എത്തിച്ചു നൽകാനും, ഏതെങ്കിലും കാരണത്താൽ നശിച്ചുപോയാൽ പകരം തൈകൾ നൽകാനും ഇവർ ശ്രദ്ധിക്കാറുണ്ട്.

ആഗോള പരിസ്ഥിതി പ്രവർത്തക ഗ്രേറ്റ തൻബെർഗിന്റെ പ്രവർത്തനങ്ങളിൽ നിന്ന് പ്രചോദനം ഉൾക്കൊണ്ടാണ് നൂറ അച്ഛന് കൂട്ടായി ഹരിതവഴിയിലേക്ക് ഇറങ്ങിയത്. മുൻപ് തിരുവനന്തപുരത്ത് നടന്ന കേരള സ്കൂൾ പാർലമെന്റിൽ പരിസ്ഥിതി മന്ത്രിയായി തിരഞ്ഞെടുക്കപ്പെട്ട നൂറ, വികസനത്തിന്റെ പേരിലുള്ള പ്രകൃതി ചൂഷണങ്ങൾക്കെതിരേ നിയമസഭാ ഹാളിൽ ശക്തമായി സംസാരിച്ച് കയ്യടി നേടിയിരുന്നു. 'നിങ്ങളുടെ അവസാനത്തെ കർമമാണെങ്കിൽ പോലും ഭൂമിയിൽ ഒരു വിത്ത് പാകുക' എന്ന പ്രവാചക വചനം നെഞ്ചിലേറ്റിയാണ് ഈ അച്ഛനും മകളും യാത്ര തുടരുന്നത്.

പ്രകൃതിയെ സ്നേഹിക്കാൻ സ്വന്തം കുടുംബത്തിൽ നിന്ന് തന്നെ പഠിക്കണം എന്ന വലിയൊരു സന്ദേശമാണ് ഇവർ സമൂഹത്തിന് നൽകുന്നത്. താമരശ്ശേരിയിലെ 'ബാബുസ്സലാം' വീട്ടിൽ നൂറോളം ഔഷധസസ്യങ്ങളും റംബൂട്ടാൻ, ആത്തച്ചക്ക, ഞാവൽ, മുരിങ്ങ തുടങ്ങിയ വിവിധയിനം തൈകളും ഇവർ കൃഷി ചെയ്യുന്നുണ്ട്. ലോക പരിസ്ഥിതി ദിനമായ ഇന്ന് രാവിലെ 11 മണിയോടെ കോഴിക്കോട് കലക്ടറേറ്റ് പരിസരത്ത് കാട്ടുചെമ്പകം നട്ടുകൊണ്ട് ഇവരുടെ പുതിയ ദൗത്യത്തിന് തുടക്കം കുറിച്ചു. ജില്ലയുടെ വിവിധ ഭാഗങ്ങളിലായി 1,000 കാട്ടുചെമ്പകങ്ങൾ നട്ടുപിടിപ്പിക്കണമെന്നാണ് അബ്ദുൽ റഷീദിന്റെ ഇപ്പോഴത്തെ ആഗ്രഹം.