കല്‍പ്പറ്റ: കനത്ത മഴയെ തുടര്‍ന്ന് റെഡ് അലര്‍ട്ട് പ്രഖ്യാപിച്ച സാഹചര്യത്തില്‍ വയനാട് ജില്ലയിലെ വിനോദ സഞ്ചാര കേന്ദ്രങ്ങള്‍ക്ക് വിലക്കേര്‍പ്പെടുത്തി ജില്ലാ ഭരണകൂടം. ക്വാറികളുടെ പ്രവര്‍ത്തനവും, യന്ത്ര സഹായത്തോടെയുള്ള മണ്ണ് നീക്കവും നിര്‍ത്തിവെക്കാന്‍ ജില്ലാ കളക്ടര്‍ ഉത്തരവിട്ടു. ദുരന്ത സാധ്യത നേരിടുന്ന ദുര്‍ബല പ്രദേശങ്ങളിലെ ഹോം സ്‌റ്റേ ഉള്‍പ്പെടെയുള്ള ടൂറിസ്റ്റ് കേന്ദ്രങ്ങളുടെ പ്രവര്‍ത്തനവും എല്ലാ അഡ്വഞ്ചര്‍ ടൂറിസവും ട്രക്കിങ്ങുകളും നിര്‍ത്തിവെക്കാനാണ് ഉത്തരവ്.

ശനി, ഞായര്‍ ദിവസങ്ങളില്‍ മേപ്പാടി ഗ്രാമപഞ്ചായത്ത് പരിധിയില്‍ പ്രവര്‍ത്തിക്കുന്ന എല്ലാ റിസോര്‍ട്ടുകളും ഹോം സ്‌റ്റേകളും സര്‍വീസ് വില്ലകളും മറ്റ് വിനോദ സഞ്ചാര കേന്ദ്രങ്ങളും തുറന്ന് പ്രവര്‍ത്തിക്കുന്നതിനും വിലക്കുണ്ട്. രണ്ട് ദിവസം എന്‍ ഊര് ഗോത്ര പൈതൃക ഗ്രാമവും പ്രവര്‍ത്തിക്കില്ലെന്ന് മേപ്പാടി ഗ്രാമ പഞ്ചായത്ത് സെക്രട്ടറി അറിയിച്ചു.