വാഷിങ്ടണ്‍: ഫിഫ ലോകകപ്പില്‍ പങ്കെടുക്കുന്ന ഇറാന്‍ ഫുട്ബാള്‍ ടീമിന് കര്‍ശന യാത്രാ നിയന്ത്രണങ്ങള്‍ ഏര്‍പ്പെടുത്തി അമേരിക്ക. മത്സരമുള്ള ദിവസങ്ങളില്‍ മാത്രമേ താരങ്ങള്‍ക്കും പരിശീലകര്‍ക്കും യു.എസില്‍ പ്രവേശനം അനുവദിക്കൂവെന്നും മത്സരം കഴിഞ്ഞാല്‍ ഉടന്‍ തന്നെ മടങ്ങേണ്ടിവരുമെന്നും മെക്‌സിക്കോയിലെ ഇറാന്‍ അംബാസഡര്‍ അബുല്‍ഫസല്‍ പസന്ദിദേ അറിയിച്ചു.

അമേരിക്ക, കാനഡ, മെക്‌സിക്കോ എന്നീ രാജ്യങ്ങളാണ് ഇത്തവണത്തെ ഫിഫ ലോകകപ്പിന് സംയുക്ത ആതിഥേയത്വം വഹിക്കുന്നത്. ഇറാന്‍ ടീമിന്റെ മത്സരങ്ങള്‍ അമേരിക്കയില്‍ നടക്കുന്നുണ്ടെങ്കിലും ടീം ക്യാമ്പ് ചെയ്യുക മെക്‌സിക്കോയിലായിരിക്കും. സുരക്ഷാ കാരണങ്ങള്‍ ചൂണ്ടിക്കാട്ടി മത്സരങ്ങള്‍ അമേരിക്കയില്‍നിന്ന് മാറ്റണമെന്ന ഇറാന്റെ ആവശ്യം ഫിഫ അംഗീകരിച്ചിരുന്നില്ല.

ALSO READ: മഴ തുടരും: ഏഴ് ജില്ലകളിൽ ഇന്ന് ഓറഞ്ച് അലർട്ട്; ജാ​ഗ്രത നിർദേശം  

ആദ്യഘട്ടത്തില്‍ യു.എസിലെ അരിസോണയില്‍ പരിശീലന ക്യാമ്പ് ഒരുക്കാനായിരുന്നു പദ്ധതി. എന്നാല്‍ വിസ, സുരക്ഷാ നിയന്ത്രണങ്ങള്‍ എന്നിവയെ തുടര്‍ന്ന് പദ്ധതി മാറ്റേണ്ടിവന്നു. അമേരിക്കയും ഇറാനും തമ്മിലുള്ള രാഷ്ട്രീയ സംഘര്‍ഷമാണ് നിലവിലെ പ്രതിസന്ധിക്ക് പിന്നിലെ പ്രധാന കാരണം.

മത്സരദിവസം മാത്രം അമേരിക്കയിലേക്ക് യാത്ര ചെയ്ത് അതേദിവസം തന്നെ മടങ്ങണമെന്ന നിബന്ധന താരങ്ങളുടെ പ്രകടനത്തെ ബാധിക്കുമെന്നാണ് വിലയിരുത്തല്‍. സാധാരണയായി ലോകകപ്പില്‍ പങ്കെടുക്കുന്ന ടീമുകള്‍ മത്സരങ്ങള്‍ക്ക് ദിവസങ്ങള്‍ക്ക് മുമ്പ് തന്നെ ആതിഥേയ രാജ്യങ്ങളിലെത്തി പരിശീലനവും ഒരുക്കങ്ങളും നടത്താറുണ്ട്. എന്നാല്‍ ഇറാന്‍ ടീമിന് അത്തരമൊരു സൗകര്യം ലഭിക്കില്ല.

ഇതിനിടെ, ഇറാന്‍ ഫുട്ബാള്‍ ഫെഡറേഷനിലെ നിരവധി ഉന്നത ഉദ്യോഗസ്ഥര്‍ക്ക് ഇപ്പോഴും അമേരിക്കയിലേക്കുള്ള യാത്രാനുമതി ലഭിച്ചിട്ടില്ല. സെക്രട്ടറി ജനറല്‍ ഹെദായത്ത് മൊംബിനി, വൈസ് പ്രസിഡന്റ് മെഹ്ദി മുഹമ്മദ് നബി എന്നിവരുള്‍പ്പെടെ 14 ഉദ്യോഗസ്ഥര്‍ വിസയ്ക്കായി കാത്തിരിക്കുകയാണ്. ഫെഡറേഷന്‍ പ്രസിഡന്റ് മെഹ്ദി താജിന് വിസ അനുവദിച്ചോയെന്ന കാര്യത്തിലും വ്യക്തതയില്ല.

വിസ ലഭിച്ച താരങ്ങളും പരിശീലകരും ശനിയാഴ്ച തുര്‍ക്കിയില്‍നിന്ന് സ്‌പെയിന്‍ വഴി യാത്ര തിരിച്ചു. യഥാര്‍ഥ കായികതാരങ്ങള്‍ക്കും പരിശീലകര്‍ക്കും അമേരിക്കയിലേക്ക് പ്രവേശനം അനുവദിക്കുമെങ്കിലും ഇറാന്റെ ഇസ്‌ലാമിക് റെവലൂഷനറി ഗാര്‍ഡ് കോര്‍പ്‌സുമായി ബന്ധമുള്ള ആരെയും രാജ്യത്തേക്ക് പ്രവേശിപ്പിക്കില്ലെന്ന് യു.എസ് വിദേശകാര്യ സെക്രട്ടറി മാര്‍ക്കോ റൂബിയോ വ്യക്തമാക്കിയിട്ടുണ്ട്.

US imposes strict restrictions on Iran team for World Cup: Come only on match day, then leave immediately