മാഡ്രിഡ്: സ്പാനിഷ് ലാലിഗയില്‍ വമ്പന്‍മാരായ ബാഴ്‌സലോണയ്ക്ക് തകര്‍പ്പന്‍ ജയം. ഒന്നിനെതിരേ അഞ്ചു ഗോളുകള്‍ക്ക് തുടക്കക്കാരായ ലെഗാനസിനെയാണ് ബാഴ്‌സ തകര്‍ത്തത്. സൂപ്പര്‍ താരം ലയണല്‍ മെസ്സി ഇരട്ട ഗോളുളുമായി ടീമിനെ മുന്നില്‍ നിന്ന് നയിച്ചു. ശേഷിച്ച ഗോളുകള്‍ ലൂയി സുവാരസ്, നെയ്മര്‍, റഫീന എന്നിവര്‍ സ്വന്തമാക്കി.
ഡീപോര്‍ട്ടീവോ അലാവസിനോട് അപ്രതീക്ഷിത തോല്‍വി ഏറ്റുവാങ്ങേണ്ടി വന്നതിന്റെ ക്ഷീണവുമായിട്ടാണ് ബാഴ്‌സ കളത്തിലിറങ്ങിയത്. എന്നാല്‍ തുടക്കം മുതല്‍ എതിരാളികളെ സമ്മര്‍ദത്തിലാക്കിയ ബാഴ്‌സ 15ാം മിനുട്ടില്‍ തന്നെ അക്കൗണ്ട് തുറന്നു. മെസ്സിയായിരുന്നു സ്‌കോറര്‍. അധികം വൈകാതെ സുവാരസ് ലീഡ് ഉയര്‍ത്തി. മെസ്സിയുടെ പാസില്‍ നിന്നായിരുന്നു ഗോള്‍ പിറന്നത്. ആദ്യ പകുതി അവസാനിക്കാന്‍ മിനുട്ടുകള്‍ ശേഷിക്കെയായിരുന്നു മൂന്നാം ഗോള്‍. മെസ്സി നല്‍കിയ പാസുമായി മുന്നേറിയ സുവാരസ് പന്ത് നെയ്മര്‍ക്ക് നല്‍കി. താരം മികച്ചൊരു ഷോട്ടിലൂടെ ഗോള്‍ നേടുകയായിരുന്നു.
രണ്ടാം പകുതിയില്‍ ആദ്യ ഗോള്‍ നേടിയതും മെസ്സിയായിരുന്നു. 55ാം മിനുട്ടില്‍ ടീമിന് ലഭിച്ച പെനാല്‍റ്റിയില്‍ മെസ്സി സ്‌കോര്‍ ചെയ്യുകയായിരുന്നു. അധികം വൈകാതെ തന്നെ റഫീനയും സ്‌കോര്‍ ചെയ്തതോടെ പട്ടിക  പൂര്‍ത്തിയായി. ആപെല്‍റ്റ് പൈറസാണ് ലെഗാനസിന്റെ ആശ്വാസ ഗോള്‍ നേടിയത്.
മറ്റു മത്സരങ്ങളില്‍ മുന്‍ ചാംപ്യന്‍മാരായ അത്‌ലറ്റിക്കോ മാഡ്രിഡ് എതിരില്ലാത്ത അഞ്ചു ഗോളിന് സ്‌പോര്‍ട്ടിങ് ഗിജോണിനെ തകര്‍ത്തു. അന്റോണിയോ ഗ്രിസ്മാന്‍, ഫെര്‍ണാണ്ടോ ടോറസ് എന്നിവര്‍ ഇരട്ട ഗോള്‍ നേടി. ശേഷിച്ച ഗോള്‍ ഗമെയ്‌റോ സ്വന്തമാക്കി. റയല്‍ ബെറ്റിസ്-ഗ്രനാഡ മത്സരം 2-2ന് സമനിലയില്‍ പിരിഞ്ഞു.