തിരുവനന്തപുരം: ഓണാഘോഷത്തിനിടയില്‍ അത്തപ്പൂക്കളം പൊളിക്കുന്നതുമായി ബന്ധപ്പെട്ടുണ്ടയ തര്‍ക്കത്തെ തുടര്‍ന്നുണ്ടായ കൊലപാതകക്കേസിലെ  പ്രതി പിടിയില്‍. നേമം കല്ലുവിളക്കോണം കമുകറ പണയില്‍ എസ്.എസ് ഭവനില്‍  സുനി എന്നുവിളിക്കുന്ന സുനില്‍കുമാര്‍ (42) ആണ് അറസ്റ്റിലായത്.
വ്യാഴാഴ്ച പുലര്‍ച്ചെ 4.30നായിരുന്നു കേസിനാസ്പദമായ സംഭവം. അമ്പലംകുന്ന് കല്ലുവിളക്കോണം കമുകറ പണയില്‍ വീട്ടില്‍  രാകേശി (30)നെ ഇയാള്‍ കുത്തിപ്പരുക്കേല്‍പ്പിക്കുകയായിരുന്നു.  ഗുരുതരമായി പരുക്കേറ്റ മണികണ്ഠനെ തിരുവനന്തപുരം മെഡിക്കല്‍കോളജ് ആശുപത്രിയില്‍ പ്രവേശിപ്പിച്ചുവെങ്കിലും അന്നുതന്നെ മരിച്ചു.
മരിച്ച മണികണ്ഠനും പ്രതി സുനില്‍കുമാറും ബന്ധുക്കളുമാണ്.  ഫോര്‍ട്ട് എ.സി ഗോപകുമാറിന് ലഭിച്ച രഹസ്യവിവരത്തിന്റെ അടിസ്ഥാനത്തില്‍ നേമം സി.ഐ ദിലീപ്കുമാര്‍ ദാസിന്റെ നേതൃത്വത്തിലുള്ള സംഘം തിരുവല്ലം ജങ്ഷനു സമീപത്തു നിന്നാണ് പ്രതിയെ പിടികൂടിയത്. ഇയാള്‍ രക്ഷപ്പെടാനുള്ള ശ്രമത്തിലായിരുന്നു.   എസ്.ഐമാരായ ശ്രീകാന്ത് മിശ്ര, ശിവകുമാര്‍, സംഗീത്, എച്ച്.എആസ് ഹരി, എ.എസ്.ഐ സുരേഷ്‌കുമാര്‍, എസ്.സി.പി.ഒമാരായ സുധീര്‍, രാധാകൃഷ്ണന്‍, ഡ്രൈവര്‍ സാജിത്ത് എന്നിവരും  പൊലിസ് സംഘത്തിലുണ്ടായിരുന്നു.   കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.