കോഴിക്കോട്: വൃത്തിഹീനമായ സാഹചര്യത്തിലും ആവശ്യമായ രേഖകളില്ലാതെയും പ്രവര്‍ത്തിച്ച സോഡ ഫാക്ടറിക്കെതിരെ ഭക്ഷ്യസുരക്ഷ വകുപ്പ് നടപടി. കൂടരഞ്ഞി ഗ്രാമപഞ്ചായത്ത് പരിധിയില്‍ പ്രവര്‍ത്തിച്ചിരുന്ന എസ്.കെ. സോഡ ഫാക്ടറിയാണ് അധികൃതര്‍ പൂട്ടിച്ചത്.

ഫാക്ടറിയില്‍ നടത്തിയ പരിശോധനയില്‍ ഗുരുതരമായ ആരോഗ്യസുരക്ഷാ വീഴ്ചകള്‍ കണ്ടെത്തിയതായി ഭക്ഷ്യസുരക്ഷ വകുപ്പ് അറിയിച്ചു. സ്ഥാപനത്തിലെ കുടിവെള്ള ടാങ്കില്‍ പഴുതാരയുടെ സാന്നിധ്യം കണ്ടെത്തിയതും പരിശോധനയില്‍ പുറത്തുവന്ന പ്രധാന കണ്ടെത്തലുകളിലൊന്നാണ്.

ALSO READ: പാലക്കാട് കെഎസ്ആര്‍ടിസി ബസ് മോഷണക്കേസ്; പ്രതി പിടിയില്‍ 

മെഡിക്കല്‍ ഫിറ്റ്‌നസ് സര്‍ട്ടിഫിക്കറ്റ് ഇല്ലാത്ത ജീവനക്കാരാണ് സ്ഥാപനത്തില്‍ ജോലി ചെയ്തിരുന്നതെന്നും സോഡ നിര്‍മാണത്തിന് ഉപയോഗിച്ച വെള്ളത്തിന്റെ ഗുണനിലവാര പരിശോധന റിപ്പോര്‍ട്ട് ലഭ്യമല്ലായിരുന്നെന്നും അധികൃതര്‍ കണ്ടെത്തി. കൂടാതെ, സോഡ കുപ്പികളില്‍ നിര്‍ബന്ധമായും രേഖപ്പെടുത്തേണ്ട ലേബല്‍ വിവരങ്ങളും ഉള്‍പ്പെടുത്തിയിരുന്നില്ല.

ഭക്ഷ്യസുരക്ഷാ മാനദണ്ഡങ്ങള്‍ക്ക് വിരുദ്ധമായി പൊട്ടിപ്പൊളിഞ്ഞ തറ, പൂപ്പല്‍ ബാധിച്ച ചുമരുകള്‍, വൃത്തിഹീനമായ ഉല്‍പ്പാദന അന്തരീക്ഷം എന്നിവയും പരിശോധനയില്‍ കണ്ടെത്തി. ഇത്തരം ഗുരുതരമായ ലംഘനങ്ങള്‍ പൊതുജനാരോഗ്യത്തിന് ഭീഷണിയാണെന്ന് വിലയിരുത്തിയതിനെ തുടര്‍ന്നാണ് സ്ഥാപനത്തിന്റെ പ്രവര്‍ത്തനം ഉടന്‍ നിര്‍ത്തിവയ്ക്കാന്‍ ഉത്തരവിട്ടത്.

ഫുഡ് സേഫ്റ്റി ഓഫീസര്‍ ഡോ. സനീന മജീദിന്റെയും കൂടരഞ്ഞി ഹെല്‍ത്ത് ഇന്‍സ്‌പെക്ടറുടെയും നേതൃത്വത്തിലായിരുന്നു പരിശോധന. ഫാക്ടറിയില്‍ നിന്ന് ഗുണനിലവാര പരിശോധനയ്ക്കായി സാമ്പിളുകള്‍ ശേഖരിച്ച് റീജണല്‍ ലബോറട്ടറിയിലേക്ക് അയച്ചിട്ടുണ്ട്. പരിശോധനാഫലം ലഭിച്ച ശേഷമാകും തുടര്‍നടപടികള്‍ സ്വീകരിക്കുക.

The Food Safety Department took action against a soda factory operating in unhygienic conditions and without required documents. Officials shut down the S.K. Soda Factory, which was operating within the Koodaranji Grama Panchayat limits.