ചെന്നൈ: തമിഴ്‌നാട്ടിലെ പൊതുഗതാഗത സംവിധാനത്തില്‍ വന്‍ മാറ്റത്തിനൊരുങ്ങി സര്‍ക്കാര്‍. ഇനി മുതല്‍ വാങ്ങുന്ന എല്ലാ പുതിയ സര്‍ക്കാര്‍ ബസുകളും എ.സി സൗകര്യമുള്ളവയായിരിക്കുമെന്ന് മുഖ്യമന്ത്രി വിജയ് ഉത്തരവിട്ടു. ഗതാഗത മന്ത്രി വിജയ് തമിഴന്‍ പാര്‍ത്ഥിപനാണ് മുഖ്യമന്ത്രിയുടെ തീരുമാനം മാധ്യമങ്ങളെ അറിയിച്ചത്. സംസ്ഥാനത്തെ പൊതുഗതാഗത മേഖല കൂടുതല്‍ ആധുനികമാക്കുകയും യാത്രക്കാര്‍ക്ക് മികച്ച യാത്രാനുഭവം ഉറപ്പാക്കുകയും ചെയ്യുകയെന്ന ലക്ഷ്യത്തോടെയാണ് പുതിയ തീരുമാനം.

തമിഴ്‌നാട്ടിലെ ഉള്‍നാടന്‍ ഗ്രാമങ്ങളെപ്പോലും മികച്ച ബസ് ശൃംഖലയിലൂടെ പരസ്പരം ബന്ധിപ്പിക്കണമെന്നതാണ് മുഖ്യമന്ത്രിയുടെ ലക്ഷ്യമെന്ന് മന്ത്രി പറഞ്ഞു. 'ഇനി മുതല്‍ തമിഴ്‌നാട്ടിലെ ജനങ്ങള്‍ എ.സി ബസുകളില്‍ യാത്ര ചെയ്യണം. അതുകൊണ്ടുതന്നെ, വരുംകാലങ്ങളില്‍ വാങ്ങുന്ന പുതിയ സര്‍ക്കാര്‍ ബസുകളെല്ലാം എ.സി സൗകര്യമുള്ളവയായിരിക്കണമെന്നാണ് മുഖ്യമന്ത്രിയുടെ നിര്‍ദേശം. യാത്രക്കാരുടെ സൗകര്യത്തിനും പൊതുഗതാഗതത്തെ കൂടുതല്‍ ആകര്‍ഷകമാക്കുന്നതിനുമാണ് ഈ തീരുമാനം,' മന്ത്രി പാര്‍ത്ഥിപന്‍ മാധ്യമങ്ങളോട് പറഞ്ഞു.

ALSO READ: അതിശക്തമായ മഴ തുടരും; നാളെ രണ്ട് ജില്ലകളില്‍ ഓറഞ്ച് അലര്‍ട്ട് https://www.suprabhaatham.com/details/465147?link=heavy-rain-alert-on-kerala-orange-alert

ഇതിനിടെ, സുതാര്യവും സത്യസന്ധവും അഴിമതിരഹിതവുമായ ഒരു ഭരണം ആഗ്രഹിച്ചാണ് ജനങ്ങള്‍ ഈ സര്‍ക്കാരിനെ തിരഞ്ഞെടുത്തതെന്ന് മുഖ്യമന്ത്രി വിജയ് വ്യക്തമാക്കി. ജനങ്ങളുടെ വിശ്വാസം കാത്തുസൂക്ഷിക്കുന്ന ഭരണമാണ് സര്‍ക്കാര്‍ ലക്ഷ്യമിടുന്നതെന്നും അദ്ദേഹം പറഞ്ഞു. സ്ത്രീകള്‍ക്കെതിരേയുള്ള അതിക്രമങ്ങളില്‍ അധികാരികളും പൊലിസും സീറോ ടോളറന്‍സ് നയം സ്വീകരിക്കണമെന്നും മുഖ്യമന്ത്രി കര്‍ശന നിര്‍ദേശം നല്‍കി. സ്ത്രീസുരക്ഷയുമായി ബന്ധപ്പെട്ട പരാതികളില്‍ യാതൊരു വീഴ്ചയും അനുവദിക്കില്ലെന്നും നിയമം കര്‍ശനമായി നടപ്പാക്കുമെന്നും അദ്ദേഹം വ്യക്തമാക്കി.

സാമൂഹിക സുരക്ഷ ഉറപ്പാക്കുന്നതിനൊപ്പം സംസ്ഥാനത്തിന്റെ അടിസ്ഥാന സൗകര്യ വികസനത്തിലും സര്‍ക്കാര്‍ അതീവ ശ്രദ്ധ പതിപ്പിക്കുന്നുണ്ടെന്ന് മുഖ്യമന്ത്രി പറഞ്ഞു. റോഡുകള്‍, ഗതാഗതം, നഗര വികസനം, പൊതുസേവനങ്ങള്‍ എന്നിവയില്‍ കൂടുതല്‍ നിക്ഷേപം ഉറപ്പാക്കുന്നതിനുള്ള നടപടികളാണ് സര്‍ക്കാര്‍ സ്വീകരിച്ചുവരുന്നതെന്നും അദ്ദേഹം ചൂണ്ടിക്കാട്ടി.

അധികാരമേറ്റെടുത്ത ശേഷം വിവിധ മേഖലകളില്‍ തമിഴ്‌നാട് സര്‍ക്കാര്‍ നടത്തുന്ന നീക്കങ്ങള്‍ ദേശീയതലത്തില്‍ തന്നെ ശ്രദ്ധ നേടിയിട്ടുണ്ട്. ലഹരിവിരുദ്ധ പ്രവര്‍ത്തനങ്ങള്‍ക്ക് കൂടുതല്‍ പ്രാധാന്യം നല്‍കിക്കൊണ്ട് മുഖ്യമന്ത്രി വിജയ് അടുത്തിടെ ചെന്നൈ മരീന ബീച്ചിന് സമീപം സംഘടിപ്പിച്ച 'സ്റ്റാര്‍ട്ട് റണ്‍, സ്റ്റോപ്പ് ഡ്രഗ്‌സ്' മാരത്തണിന് നേതൃത്വം നല്‍കിയിരുന്നു. മന്ത്രിമാരായ ആദവ് അര്‍ജുന, പി. വെങ്കടരമണന്‍, ചീഫ് സെക്രട്ടറി എം. സായ് കുമാര്‍ എന്നിവര്‍ക്കൊപ്പം മൂന്ന് കിലോമീറ്റര്‍ ദൂരം മുഖ്യമന്ത്രിയും ഓടി. 'കായികം സ്വീകരിക്കൂ, ലഹരി ഉപേക്ഷിക്കൂ' എന്ന സന്ദേശം ജനങ്ങളിലെത്തിക്കുകയെന്ന ലക്ഷ്യത്തോടെയായിരുന്നു മാരത്തണ്‍ സംഘടിപ്പിച്ചത്. യുവാക്കള്‍ക്കിടയില്‍ ലഹരി ഉപയോഗം തടയാന്‍ ബോധവല്‍ക്കരണ പ്രവര്‍ത്തനങ്ങള്‍ കൂടുതല്‍ ശക്തമാക്കുമെന്നും സര്‍ക്കാര്‍ വ്യക്തമാക്കിയിട്ടുണ്ട്.

സംസ്ഥാനത്തിന്റെ വികസന ആവശ്യങ്ങള്‍ ഉന്നയിച്ച് മുഖ്യമന്ത്രി വിജയ് കേന്ദ്രസര്‍ക്കാരുമായി കൂടിക്കാഴ്ചയും നടത്തിയിരുന്നു. പ്രധാനമന്ത്രി നരേന്ദ്ര മോദി, ധനമന്ത്രി നിര്‍മ്മല സീതാരാമന്‍ എന്നിവരുമായുള്ള കൂടിക്കാഴ്ചയില്‍ തുറമുഖ വികസനം, ദേശീയപാത പദ്ധതികള്‍, റെയില്‍വേ വികസനം എന്നിവയ്ക്കായി കൂടുതല്‍ കേന്ദ്രസഹായം അനുവദിക്കണമെന്ന് അദ്ദേഹം ആവശ്യപ്പെട്ടു. തമിഴ്‌നാട്ടിന്റെ വികസനത്തിന് നിര്‍ണായകമായ വിവിധ അടിസ്ഥാനസൗകര്യ പദ്ധതികള്‍ക്ക് കേന്ദ്രത്തിന്റെ പിന്തുണ അനിവാര്യമാണെന്നും മുഖ്യമന്ത്രി ചൂണ്ടിക്കാട്ടി.

മേക്കേദാട്ടു അണക്കെട്ട് വിഷയം, മത്സ്യത്തൊഴിലാളികളുടെ അറസ്റ്റ് തുടങ്ങിയ വിഷയങ്ങളിലും സംസ്ഥാനത്തിന്റെ അവകാശങ്ങളും താല്‍പര്യങ്ങളും സംരക്ഷിക്കണമെന്ന ഉറച്ച നിലപാടാണ് സര്‍ക്കാര്‍ കേന്ദ്രത്തിന് മുന്നില്‍ അവതരിപ്പിച്ചിരിക്കുന്നത്. ജനക്ഷേമവും വികസനവും ഒരുപോലെ മുന്‍നിര്‍ത്തിയുള്ള ഭരണമാണ് സര്‍ക്കാര്‍ ലക്ഷ്യമിടുന്നതെന്നും അതിനായി വിവിധ മേഖലകളില്‍ പരിഷ്‌കാര നടപടികള്‍ തുടരുമെന്നും മുഖ്യമന്ത്രി വിജയ് വ്യക്തമാക്കിയിട്ടുണ്ട്.

The Tamil Nadu government is preparing for a major change in the public transport system. Chief Minister Vijay has ordered that all new government buses purchased from now on will be air-conditioned. Transport Minister Vijay Thamizhan Parthipan conveyed the Chief Minister’s decision to the media.