കുവൈത്ത് സിറ്റി: കുവൈത്തിനെ ലക്ഷ്യമിട്ട് വീണ്ടും വൻതോതിലുള്ള മിസൈൽ, ഡ്രോൺ ആക്രമണശ്രമം. രാജ്യത്തിന് നേരെ പാഞ്ഞടുത്ത  മിസൈലുകളെയും ഡ്രോണുകളെയും കുവൈത്തിന്റെ വ്യോമ പ്രതിരോധ സംവിധാനം സജീവമായി നേരിട്ടുകൊണ്ടിരിക്കുകയാണെന്ന് കുവൈത്ത് ആർമി ജനറൽ സ്റ്റാഫ് സ്ഥിരീകരിച്ചു. ഒടുവിൽ ലഭിക്കുന്ന വിവരങ്ങൾ പ്രകാരം രാജ്യത്ത് അതീവ ജാഗ്രതാ നിർദ്ദേശം പുറപ്പെടുവിച്ചിട്ടുണ്ട്.

ആക്രമണശ്രമങ്ങളെ പ്രതിരോധ സംവിധാനങ്ങൾ ആകാശത്തുവെച്ച് തന്നെ തകർക്കുന്നതിനാലാണ് രാജ്യത്തിന്റെ വിവിധ ഭാഗങ്ങളിൽ ശക്തമായ സ്ഫോടന ശബ്ദങ്ങൾ കേൾക്കുന്നതെന്ന് സൈനിക വക്താക്കൾ വ്യക്തമാക്കി.

രാജ്യത്തുടനീളം മുന്നറിയിപ്പ് സൈറണുകൾ

വ്യോമാക്രമണ ഭീഷണിയെത്തുടർന്ന് കുവൈത്തിലുടനീളം അടിയന്തര മുന്നറിയിപ്പ് സൈറണുകൾ മുഴങ്ങി. അപ്രതീക്ഷിതമായി സൈറണുകൾ സജീവമായതോടെ ജനങ്ങൾ കടുത്ത ആശങ്കയിലാണ്. അതീവ ഗുരുതരമായ സാഹചര്യമായതിനാൽ ബന്ധപ്പെട്ട സുരക്ഷാ അധികാരികൾ നൽകുന്ന എല്ലാ സുരക്ഷാ നിർദ്ദേശങ്ങളും കർശനമായി പാലിക്കാനും സുരക്ഷിത സ്ഥാനങ്ങളിൽ തുടരാനും പൊതുജനങ്ങളോട് ഭരണകൂടം അടിയന്തരമായി അഭ്യർത്ഥിച്ചിട്ടുണ്ട്.

കഴിഞ്ഞ ദിവസവും കുവൈത്ത് വ്യോമാതിർത്തി ലംഘിച്ചെത്തിയ രണ്ട് ബാലിസ്റ്റിക് മിസൈലുകളും 13 ഡ്രോണുകളും സൈന്യം വെടിവെച്ചിട്ടിരുന്നു. അതിന് തൊട്ടുപിന്നാലെയാണ് രാജ്യത്തെ വീണ്ടും യുദ്ധഭീതിയിലാഴ്ത്തിക്കൊണ്ട് പുതിയ ആക്രമണശ്രമം നടക്കുന്നത്. കൂടുതൽ വിവരങ്ങൾ ലഭ്യമാകുന്നതേയുള്ളൂ.

ALSO READ: ഹോര്‍മുസില്‍ ആക്രമണം; 'അല്‍ റികയ്യാത്ത്' കപ്പലിലെ ജീവനക്കാര്‍ സുരക്ഷിതരെന്ന് നഖിലാത്ത്

Kuwait's air defense systems intercepted missiles and drones during a major aerial security incident, prompting heightened nationwide vigilance amid escalating regional tensions.