തൃശൂര്‍: പത്ത് വര്‍ഷത്തിലധികമായി പുലിക്കൂട്ടത്തിന്റെ മെയ്യെഴുത്ത് വേദിയില്‍ സുജിത്ത് ഉണ്ട്. വിവിധ ദേശങ്ങള്‍ക്കായി പുലിരൂപങ്ങള്‍ രൂപപ്പെടുത്തിയിട്ടുള്ള സുജിത്ത് കഴിഞ്ഞ കുറെ വര്‍ഷങ്ങളായി നായ്ക്കനാല്‍ ദേശത്തിനൊപ്പമാണ്. നായ്ക്കനാലിന്റെ പുലിമടയില്‍ വയറന്‍പുലികള്‍ക്കും അല്ലാത്തവര്‍ക്കുമായി വ്യത്യസ്തമായ പത്ത് രൂപങ്ങളാണ് ഒരുക്കിയത്. കുവൈറ്റില്‍ ഇന്റീരിയര്‍ ഡിസൈനറായ സുജിത്ത് തൃശൂര്‍ നായ്ക്കനാല്‍ സ്വദേശിയാണ്. മെയ്യെഴുത്തിനായി മാത്രം കഴിഞ്ഞ ദിവസമാണ് കുവൈറ്റില്‍ നിന്ന് എത്തിയത്. നായ്ക്കനാല്‍ ദേശത്തിന്റെ ഫ്‌ളോട്ടുകള്‍ തയാറാക്കുന്നതിലും സുജിത്തിന്റെ പ്രാവീണ്യം ഉപയോഗിച്ചിട്ടുണ്ട്.
നായ്ക്കനാലിലെ നടുവില്‍പുരയ്ക്കല്‍ വീട്ടില്‍ സുജിത്തിന്റെ കുടുംബത്തിലെ മിക്കവരും മെയ്യെഴുത്ത് രംഗത്തുണ്ട്. മറ്റ് ദേശങ്ങളിലെ പുലികളെ വരയ്ക്കുന്നതിന് അമ്മാവന്മാരും മറ്റ് ബന്ധുക്കളുമായി 20ളം പേരാണ് പുലിക്കളി സമയത്ത് സജ്ജീവമാകുന്നത്. കുടുംബത്തിന്റെ എല്ലാ പിന്തുണയും ഈ കലാകാരനൊപ്പം ഉണ്ട്.